21. meje 1997 zemrě w Złyčinje komponist, awtor a narodny prócowar Jan Pawoł Nagel. W susodnym Łazu bě so wón 8. meje 1934 jako syn frizera narodźił. Po maturiće na Serbskej wyšej šuli studowaše w Berlinje hudźbu. Po tym bě wučer hudźby na Serbskej wyšej šuli w Choćebuzu, je při serbskej redakciji rozhłosa dźěłał a chóry dirigował. Nagel bě swobodny komponist, kiž je ně­hdźe 400 kompozicijow stworił. Wot 1970 bě sydom lět předsyda Koła serbskich hudźbnikow. Do jeho kompozicijow słuša „Strowa sy Marija – Ave Marija“, „Tři spěwy za bariton a orchester na basnje Bobrowskeho“, „Tři modlitwy“, „Dźesać serbskich rejow za smyčkowy kwartet“ a spěwy a hudźbu „Posledni čołm“ a „Lubka lilija, moja nadźija“. Nagel je Łazowski spěwnik wudał, za NSLDź „Duet za fletu a staru knjeni“ a „Passacaglia za wulki orchester a bagrownika“ spisał. „Dźěćatstwo we Złyčinje“ je w LND wušła. Nazymu 1989 je Serbsku narodnu zhromadźiznu sobu załožił. 1991 bu za połdra lěta za předsydu Domowiny wu­zwoleny. Serbske ewangelske towarstwo je sobu załožił kaž tež Spěchowanske towarstwo za Dom Zejlerja a Smolerja we Łazu a bě prěni předsyda. Manfred Laduš

Festiwal „Intersonancy“, wuhotowany wot Braniborskeho towarstwa Nowa hudźba (BVNM), słuša k wusahowacym wjerškam moderneje „klasiskeje“ hudźby w Němskej. Kaž w minjenych lětach wopřijima program znowa prapremjery tež serbskich komponistow.

Podstupim (SN/bn). We wobłuku „preludija“ festiwala pod hesłom „Swójske swěty“ chce gitarowe duwo Conradi/Gehlen jutře, štwórtk, wosebitu wustajeńcu wubranych, wulkoformatnych partiturow w Podstupimskim wuměłstwowym domje „Sans titre“ wotewrić. Nimo twórbow mjez druhim Violety Dinescu a Gerharda Stäblera zahrajetaj prapremjernje nowostku a prěni wudźěłk za tajkule wobsadku z pjera Jana Cyža. Na slědowacym oficialnym zahajenju w Muzeju Podstupim předstaji dwójka najnowši kruch Ulricha Pogody kaž tež twórby Marka ­Andréja a Toruwa Takemitsuwa. Přizamkowacy so zahajenski koncert na samsnym městnje wuhotuje Bremenski bija­dłowy ansambl, na kotrymž zaklinča prěni raz kompozicije na přikład Benjamina Langi, Ralfa Hoyera a Volkera Friedela.