Na titulu aktualneho Rozhlada je k měsacej hodźace so foto Maćija Bulanka wo jutrownym spěwanju loni w Čornym Chołmcu zwěčnjene. Płaćiwych postajenjow w zwisku z koronu dla trjebachu młode žony we Wojerowskej drasće tehdy škitny nahubnik, při čimž maš jako wobhladowar spodźiwny zaćišć, zo móhła čorna maska přirodny dźěl narodneje drasty być.

20. nalětnika 1992 zemrě w Praze w starobje 85 lět přećel našeho ludu, spěchowar powójnskeho serbskeho šulstwa w sewjernej Čěskej Karel Macků. 20. junija 1945 běchu jeho za direktora Srjedźneje šule we Varnsdorfje powołali. Hižo bórze wobhoni so w Budyšinje pola Pawoła ­Neda a Pawoła Krječmarja, što móhli na do­bro nas Serbow činić. Skutkownu pomoc zdokonja 1. nazymnika, jako wote­wza ze swojim awtom w Budyšinje hudźbnika Bjarnata Krawca, kiž bu 13. februara w Drježdźanach wubombardo­wany. Macků zaměstni mištra najprjedy w swojim bydlenju, po tym dósta Krawcec swójba w měsće wilu. Bjarnat Krawc bu na iniciatiwu Mackůwa čestny měšćan. Šulski direktor organizowaše koncertaj Radworskeje Meje we Varnsdorfje a Rumburku. Runje tak bě spiritus rector prě­njeho koncerta Varnsdorfskeje filhar­monije w hodowniku 1945 w Budyšinje. Macků rjadowaše zhromadnje z direktorom ­Serbskeho gymnazija prof. Mikławšom Krječmarjom wuwučowanje młodych Serbow we wulkej Měšćance, kotrež traješe hač do julija 1949. Hakle lěto do smjerće dósta Karel Macků Čestne znamješko ­Domowiny. Mikławš Krawc

Wojerecy (SiR/SN). Wjace hač 30 zajimcow sćěhowaše wčera wječor přeprošenju do Wojerowskeho hrodoweho muzeja. W zhromadnym dźěle muzejoweho towarstwa z tamnišej Towaršnosću za domiznowědu su zarjadowanje, po tym zo bu wjacore razy koronapandemije dla přestorčene, skónčnje přewjedli.

Wustajeńcu „Kunstraum XXV“ z wobrazami a fotami Ludwiga Raucha su minjeny pjatk we Wojerowskej Kulturnej fabrice wotewrěli. Wobrubjene bu zarjadowanje z hudźbu na kontrabasu. Znaty Wojerowski moler Michal Kruscha (na foće), bydlacy w Berlinje, přednjese lawdaciju. Wobaj wuměłcaj staj spřećelenaj, a tak bě Kruscha Raucha do Wojerec wabił. Rauch bě hač do lěta 1988 swobodny wuměłc a wot lěta 2009 docent na Ostkreuzschule za fotografiju w Berlinje. Jeho wobrazy zwjetša paralelny­ swět multidimensionalnje pokazuja. Wone su struchłe a zdobom lóštne. Po lawdaciji wužiwachu přitomni składnosć, z Rauchom a Kruschu so rozmołwjeć. Foto: Achim Nowak