Ćežišći třećeho wirtuelneho zetkanja łužiskich festiwalnikow a kulturnikow běštej prašeni, kak hodźeli so festiwale pod tuchwilnymi wuměnjenjemi scyła wuhotować a kotre modele spěchowanja móhli financielne rizika pomjeńšić. Nimo toho pokročowachu wobdźělnicy předwčerawšim z diskusiju wo serbskich aspektach na zarjadowanjach.

Serbski institut zhladuje na 70lětne wobstaće. Na to pokazuja tuchwilu předewšěm digitalne informacije a poskitki. W Budyskej měšćanskej bibliotece wabi nowa wustajeńca, so ze stawiznami a skutkowanjom instituta zaběrać.

Budyšin (CS/SN/MiR). Hdys a hdys je „wid wotwonka“ spomóžny. Tak je nowa sobudźěłaćerka Budyskeje Měšćanskeje biblioteki nadawk dóstała, zestajeć we witrinach wustajeńcu k 70. jubilejej Serbskeho instituta.

Stefanie Weißbach pochadźa z Rudnych horin a dźěła wot minjeneje nazymy w Budyskej hudźbnej bibliotece. Wona so nadźija, zo móže swoje dopóznaća, kotrež je při přihotach přehladki nazběrała, wosebje němskim wopytowarjam zbližić. Wuměnjenje je, zo biblioteka bórze zaso wotewrje. Na kóždy pad měła wustajeńca tak dołho přistupna być, zo maja wopytowarjo biblioteki składnosć ju tež na wědomje brać.