Wojerecy (SN/MWj). 13. mjezynarodny rězbarski sympozij na Wojerowskim hrodźe a w susodnym zwěrjencu wo lěto přestorča. Něhdźe dźesać dnjow trajace zarjadowanje ma so tuž w juniju 2022 wotměć. „To njebě žadyn lochki rozsud. Ale hladajo na hač do njedawna hišće wysoku incidencu w Budyskim wokrjesu a dale trajaceho lockdowna smy zarjadowanje wo lěto přestorčili“, praji nawodnica Wojerowskeho hrodu a měšćanskeho muzeja Kerstin Noack. Přihoty na rězbarski sympozij z mjezynarodnym wobdźělenjom započinaja so stajnje lěto prjedy. Lockdowna dla dyrbjachu je zas a zaso přestorčić. Nimo toho nasta wjele wotewrjenych prašenjow, kotre předpisy zapućowanja w juniju płaća a kotre před­pisy hygieny maja so dodźeržeć. Wšo to je porjadne planowanje znjemóžniło.

Budyšin (hš/hh/SN). Tuchwilu probuje chór 1. serbskeje kulturneje brigady pilnje z pomocu internetoweho programa Jamulus, kaž zhonichu SN wot wuměłskeho nawody chóra Friedemanna Böhme. Program pak ma wysoke techniske naroki, čehoždla njeje wšitkim čłonam ćělesa móžno sej trěbne nastroje, kaž headset, wobstarać a instalować. Tak so jenož 20 z cyłkownje 65 sobustawow chóra na digitalnych probach wobdźěla. Nimo toho špatna internetna syć we Łužicy zwučowanja poćežuje. Po měnjenju dirigenta so proby přiwšěm wudanja, byrnjež lochko njebyło so wobstejnosćam přiměrić. Su pak tajke digitalne proby woprawdźe efektiwne? Tež Friedemann Böhme njeje sej toho cyle wěsty. Samozrozumliwje bychu brigadnicy swoje proby najradšo zaso w Serbskim gymnaziju přewjedowali. Tola tajke drje tele šulske lěto korony dla wjace njebudu.

Zhorjelc (AK/SN). Pod hesłom „Travelling Wor(l)ds“ wotměja so wot 9. do 13. junija lětuše literarne dny nad Nysu digitalnje. Kulturna serwisowa towaršnosć Zhorjelc hromadźe z partnerami na nje přeproša.

„Runje nětko skići nam swět literatury bóle dyžli hewak składnosć, sej druhe kraje, rěče, kultury a samo swěty wot­krywać“, wabja Zhorjelscy zarjadowarjo za program, kotryž móža zajimcy lětsa bjezpłatnje přez livestream dožiwić. Na zahajenju 9. junija poda so awtor Hans-Christian Trepte hromadźe z pólskim awtorom knihi „Miedzianka“ Filipom Springerom a přełožerku Lisu Palmes na slědy mjenowaneje delnjošleskeje wsy, kotraž němsce Kupferberg rěkaše a dźensa wjace njeeksistuje. Po tym dunda na „Spoken Word Night“ pjeć wuměłcow z cellistku po swěće słowow.