Serbskosć njepatriotisce posrědkować
Njedawno wotmě so mjezynarodne zetkanje Syće młodych akademikarjow- sorabistow w Budyskim Serbskim instituće. 21 referentow je tam wo swojich slědźenjach rozprawjało. Někotrych tu w małym serialu předstajamy.
Wotkrywaja talenty
Mjeztym hižo wosmy raz su abiturienća Drježdźanskeho křižneho ...
Na dróze dźiwadźelili a na bubonach hrali
Wojerecy (KD/SN). Dohromady sydom wuměłcow-jednotliwcow, hudźbnych a dźiwadłowych skupin z Němskeje, z europskich krajow, Israela a samo Brazilskeje su minjenu njedźelu mjeztym hižo dźewjaty nadróžny dźiwadłowy swjedźeń Wojerowskeje Kulturneje fabriki wuhotowali. Na torhošću před starej radnicu, na susodnych tak mjenowanych Čornych wikach kaž tež při wobydlerskim centrumje Piwarska hasa 1 wustupichu artisća, skupina bubnarjow a bubnarkow DrumTastic, brazilske dźiwadło na štabrach Skaramouche a israelska wuměłča Jay Toor ze swojim comedy-programom. W nim předstaji wona njewšědny dowolowy dźeń na přibrjohu a zapřija k wjeselu publikuma tohorunja někotrych přihladowarjow. Tež serbscy zajimcy z Kulowa, Njeswačidła, Pančic-Kukowa a wot druhdźe běchu sej do Wojerec dojěli. Dožiwichu tam přijomnu atmosferu, kotraž měješe něšto dowoloweho na sebi.
Hłowne myto čěskemu filmej
Praha (ČŽ/K). Lětuši 52. mjezynarodny filmowy festiwal w Karlovych Varach – najstarše zarjadowanje kategorije A na swěće a tuž runja na př. Berlinskemu – je so za Čěsku z wulkim wuspěchom skónčił. Po 15 lětach bu zaso raz domjaca produkcija z hłownym mytom wuznamjenjena. Kristalowy globus, dotěrowany z 25 000 dolarami, spožči jury twórbje režisera Václava Kadrnki „Křižáček“ (Mały křižer). Je to adapcija episkeje basnje Jaroslava Vrchlickeho „Svojanovský křižáček. Specialne myto a 15 000 dolarow přepodachu chorwatskemu paskej režisera Alena Drljevića „Muškarci ne plaču“ (Mužojo njepłakaja). Film, rysowacy wosudy něhdyšich wojakow w Bosniskej-Hercegowinje, wudoby sej zdobom myto Europa Cinema Label za najlěpši europski film.
Wo Kristalowy globus bě so dwanaće produkcijow wubědźowało, z nich štyri z Němskeje. Cyłkownje pokazachu w běhu tydźenskeho festiwala na wšěch 200 filmow. Na zarjadowanju wobdźěli so dohromady 1 200 filmowych ekspertow kaž režiserow, scenaristow a dalšich.
Popłatk dobra ideja
Nowa zběrka
Dr. Herman Šleca
Nowa spěchowanska směrnica
Na swojim posedźenju 4. apryla bě załožbowa rada změnu spěchowanskeje směrnicy Załožby za serbski lud wobzamkła, kotraž nabywa nětko płaćiwosć. Štóž chce próstwu wo spěchowanje stajić, dyrbi hižo lětsa nowe terminy wotedaća wobkedźbować.
Budyšin (SN/CoR). Potencielnych partnerow a nošerjow projektow je Załožba za serbski lud hižo informowała, zo bychu so chóry, ansamble, institucije, regionalne a nadregionalne towarstwa na nowe – přechodne – terminy wotedaća spěchowanskeje próstwy nastajić móhli. Tak maja so próstwy za planowane projekty w druhej połojcy lěta 2017 hač do 30. awgusta wotedać a hač do 31. oktobra za projekty, kotrež su za prěnju połojcu lěta 2018 předwidźane. „Je cyle wažne tónle termin dodźeržeć, hewak njemóžemy próstwje wotpowědować“, podšmórny zastupjerka direktora serbskeje załožby Michaela Mošowa.
Dotal su mnozy próstwu hakle wosom tydźenjow do projekta wotedali, štož nětko hižo njemóža. „Smy lětsa hižo přechodne postajenje zaplanowali, dokelž je časowy ćišć tola chětro wulki. Chcemy wšitkim zmóžnić so za spěchowanske srědki přizjewić“, Mošowa rjekny.
Wuměłstwowa kniha wušła
Drježdźany (SN). Spočatk julija je wušła zběrka „AUS DEM WORT“ z originalnymi rysowankami molerki Gerdy Lepke w křidowym ćišću a z 13 prěni raz wozjewjenymi basnjemi Róže Domašcyneje. Je to z ruku wjazana a ćišćana kniha. Jeje wotměry su 44 x 32 x 1 cm. Nakład wopřijima 20 čisłowanych eksemplarow – kóždy wot wuměłče a basnicy signowany. Je to štwórta wuměłstwowa kniha blisko Drježdźan bydlaceje molerki. Do toho bě wona hižo publikaciju hromadźe z awtoromaj Richardom Pietraßom a Ingom Schulzom wuhotowała.
W čisle II/2017 (čo. 84) literarneho časopisa „Ostragehege“, kotryž dwójce wob lěto w Drježdźanach wuchadźa, je zapřijate krótkopowědančko Jurja Chěžki „Rubježnik“ w němskorěčnym přełožku Róže Domašcyneje. Nimo toho su tam štyri teksty basnicy wozjewjene a recensija Petera Gehrischa wo zběrce Milana Hrabala „Eine schimmernde Wabe Glimmer“, dale tež recensija Patricka Wildena wo zběrce Róže Domašcyneje „Die dörfer unter wasser sind in deinem kopf beredt“.
