Přazu za zajimcow su tele dny w Janšojskim domizniskim muzeju organizowali. Nawodnica­ muzeja Diana Šejcowa (naprawo) cyle praktisce rozłoži, kak starodawna technika funguje. Wobdźělnicy pak so tež w plećenju a šiću pospytachu. Mjez 14 wobdźělnikami běštaj Michael Döding a jeho mandźelska Marion (2. a 3. wotlěwa). Wobaj chcetaj stary kołwrót, kotryž běštaj zdźědźiłoj, zwuporjedźeć dać a z nim wowču wołmu přasć. Foto: Rosemarie Karge

Wutupjenje Židow steješe w srjedźišću konferency, wotměwaceje so před 75 lětami, 20. januara 1942, we wili SS nad jězorom Großer Wannsee na juhu Berlina. Konferenca słužeše předewšěm dorozumjenju we wobłuku mócnarskeho apa­rata nacionalsocialistow, morić wšitkich Židow Europy, zwěsća připóznaty slědźer wo holocausće Peter Longerich. Hižo krótko po nadpadźe na Sowjetski zwjazk 22. junija 1941 eskalěrowachu tam selektiwne systematiske zezatřělenja Židow. Pod nawodom šefa wěstotneje słužby SD Reinharda Heydricha tworjachu SSownicy, wyši zastojnicy stata a zastupjerjo NSDAP na konferency běrokratiski zakład industrializowaneho ludmorjenja z přikazom, wšitkich europskich Židow zamordować. To wobswědča 15stronski protokol, kotryž bě Heydrichowy referent za „naležnosće Židow“ a organizator deportacijow Adolf Eichmann spisał. 6,3 miliony Židow stachu so z woporom holocausta. Heydricha běchu čěscy spjećowarjo 4. junija 1942 při atentaće w Praze morili. Eichmanna su po wusudźe israelskeho sudnistwa 1962 wotprawili. at

Budyšinje (SN/CoR). Čas domoweho tarifa je w Serbskim ludowym ansamblu po zdaću najprjedy nimo. „Kaž je nam Załožba za serbski lud nětko zdźěliła, njejsu přichodnje žane nowe jednanja wo domowym tarifje předwidźane. Móžemy nětko po normalnym modusu dale dźěłać, a to nadźijomnje hač do lěta 2020“, praji jednaćelka SLA Diana Wagnerec našemu wječornikej. Hač do 2020 płaći za Załožbu za serbski lud třeće financne zrěčenje ze Zwjazkom, Braniborskej a Sakskej. „Nichtó wězo njewě, hač abo kotre tarifowe zwyšenja budu, wěstota je tuž jenož nachwilna“, doda Diana Wagnerec. Loni 31. julija je lěta 2014 wobzamknjeny domowy tarif za ansamblowcow wuběžał. Tehdy běchu so dźěłarnistwa po ćežkich jednanjach z wjednistwom SLA a Załožbu za serbski lud na zniženje mzdow ansamblowcam wo 6,5 procentow dojednali.

SLA ma tuchwilu 89,75 dźěłowych městnow, z toho je 23 za hudźbnikow, 17 za spěwarjow a dwanaće za rejwarjow. K tomu přińć matej elewowej połojčnej městnje za chór a dalšej połměstnje za balet.

Po wutornej Berlinskej premjerje přeprosy pianistka Heidemarja Wiesnerec wčera do Choćebuskeho Serbskeho domu na wosebity koncert k nowemu lětu. Nimo nowych twórbow serbskich komponistow zaklinča tež hudźba staromištrow Johanna Sebastiana Bacha, Ludwiga van Beethovena, Sergeja Prokofjewa, Fryderyka Chopina a Felixa Mendelssohna Bartholdyja.

Choćebuz (UL/SN). Moderator, recitator a knižny awtor Detlef Seydel prócowaše so wječorej čerwjenu nitku spožčić, připowědźejo twórby hudźbnych stawiznow a (serbskeje) awantgardy. Přispomnić so ma, zo hodźa so nowe twórby lědma awantgardistiske mjenować. Prapremjery Jana Cyža, Ulricha Pogody, Hinca Roja, Detlefa Kobjele a Sebastiana Elikowskeho-Winklera – nadawki to za tónle koncert k citatam a choralam Martina Luthera – stejachu w poradźenym kontrasće k hudźbje minjenych pjeć lětstotkow. Teksty Berlinjana dr. Petera Jarchowa wo serbskich komponistach a jich twórbach na programowym łopješku njejsu publikumej bohužel pomhali, emocije a mysle w twórbach dodnić a wotpowědne zwiski začuwać.