Lessingowe myta 2017 w Kamjencu spožčili

Spožčenje myta – to je poprawom zwjeselace zarjadowanje. Tež na połnje wobsadźenej žurli Kamjenskeje radnicy bě nalada minjenu sobotu swjatočna-napjata, jako zetkachu so tam sakski statny sekretar Uwe Gaul, Kamjenski wyši měšćanosta Roland Dantz (njestronjan), zapósłanča Němskeho zwjazkoweho sejma Marja Michał­kowa, zapósłancaj Sakskeho krajneho sejma Alojs Mikławšk a Aline Fiedler (wšitcy CDU), přirjadnica Budyskeho krajneho rady Birgit Weber, Kamjenscy měšćanscy radźićeljo a wjacori kulturnicy, zo bychu awtorow Kurta Drawerta, Annu Kaleri a Tho­masa Freyera z Lessingowym mytom resp. ze spěchowanskim mytom počesćili. Čim bóle pak wječor postupowaše a čim wjace wo a wot lawreatow słyšach, ćim ćěmniša zdaše mi woprawdźitosć być, kotraž swětłu žurlu wobdawaše. Ćěmnotu pak su rěčnicy rozswětlili, a to w najlěpšim zmysle Lessinga.

Seismograf towaršnosće

Anna Kaleri :

„Der Himmel ist ein Fluss. Roman.“ Graf Verlag, 2012

„Hochleben. Roman.“ Mitteldeutscher Verlag, 2006

„Es gibt diesen Mann. Prosaminiaturen.“ Luchterhand Literaturverlag, 2003

Thomas Freyer (kruchi):

„kein land. August“. Prapremjera bě 20. januara 2017 w Statnym dźiwadle Drježdźany.

„mein deutsches deutsches Land“ (2014)

„Separatisten“ (2007)

„Amoklauf mein Kinderspiel“

(2006 )

Kurt Drawert:

„Der Körper meiner Zeit. Gedicht“. Verlag C. H. Beck, 2016

„Was gewesen sein wird. Essays 2004 bis 2014“. Verlag C. H. Beck, 2015

„Spiegelland. Roman, Prosa, Material“, Luxbooks-Verlag 2015

„Ich hielt meinen Schatten für einen anderen und grüßte. Roman“, Verlag C. H. Beck 2008

Lipsk (SN/CoR). Guntram Vesper je prěni lawreat Myta Ericha Loesta, kotrež bě Medijowa załožba Lipšćanskeje lutowarnje na česć 2013 zemrěteho spisowaćela z Lipska wupisała. Z 10 000 eurami dotěrowane myto chcedźa na Loestowych narodninach 24. februara w domje medijoweje załožby Mediencampus Villa Ida přepodać. Lawdaciju ma za literaturu a literariske žiwjenje zamołwity redaktor dźenika Frankfurter Allgemeine Zeitung přednjesć. „Na tysacstronskej časowej jězbje zwjazuje Guntram Vesper mikrokosmos swójbnych z historiskimi podawkami a městačko Frohburg z městnami towaršnostnych a politiskich změnow. Z jednotliwymi dóńtami w nacistiskim a NDRskim času wotkrywa wón zełžanosć diktatoriskeju režimow – bjez toho zo někoho rani, něšto rjane barbi abo zasudźa“, rěka we wopodstatnjenju jury. Z Mytom Ericha Loesta wuznamjenjeć chcedźa awtorow, kotřiž towaršnostne a politiske poměry w Němskej jenož njewopisuja, ale tež k demokratiskemu diskursej přinošuja.

Wot lěta 1993 wuznamjenja Swobodny stat Sakska wosobiny, čejež twórby steja w duchownej tradiciji rozswětlerja Gottholda Ephraima Lessinga. Sobotu je statny sekretar Uwe Gaul w Kamjenskej radnicy z 13 000 eurami dotěrowane Lessingowe myto spisowaćelej Kurtej Drawertej přepodał. Spěchowanskej myće w hódnoće dohromady 11 000 eurow spožčichu awtoromaj Thomasej Freyerej a Annje Kaleri.

Kamjenc (SN/CoR). „Bych-li nětko naličił, kotrych kolektiwnych złóstnistwow, politiskich wupadow, hospodarskich njeskutkow abo socialnych psychozow dla bych nablaku ... wobłudnić dyrbjał, bychmy hišće hač do přichodneho spožčenja Lessingoweho myta tule sedźeli. Skrótka tuž: Swět je so dźiwnje zaćěmnił, hačrunjež zda so swětliši być dyžli hdy prjedy.“ Z krótkej, runje tak jadriwej kaž intelektualnej naročnej analyzu je lawreat Kurt Drawert k tomu namołwił, sej rozswětlerstwo a jeho ideale humaneje towaršnosće dale wuwědomjeć. „Tamna strona krasnosće je nas docpěła – kontingenca, kotraž so z kromy zbliža, tež w formje ćěkancow tohole swěta“, zwěsći dźensa w Darmstadće bydlacy awtor.