Přechodne knježerstwo a zastupjerjo Kurdow so na přiměr dojednali

Ar-Raqqa/Damaskus (SN/mb). Syriske demokratiske mocy (SDF), wobrónjene jednotki pod nawodom Kurdow za zakitowanje demokratiskich kónčin Sewjerowuchodneje Syriskeje, a islamistiske přechodne knježerstwo w Damaskusu su so na přiměr dojednali. To je pjatk Berlinske zastupnistwo demokratiskeho samozarjadnistwa wobkrućiło. Zašłe tydźenje běchu islamistiske milicy masakry přećiwo kurdiskej ludnosći skućeli, we woblěhowanym měsće Kobanê bě po informacijach ko-měšćanostki a ko-měšćanosty hač do 400 000 ćěkancow. Nic jenož tu hrožeše humanitarna katastrofa.

Dobra organizacija njeje tajka, kotraž perfektnje dźěła – perfektnosće móžemy so za wěčnosć nadźijeć, pod wuměnjenjemi časa tajke něšto njeeksistuje. Tohodla je najmudriši princip: Spytaj hłupe zmylki z mudrišimi zmylkami narunać! Domowina je zašły kónc tydźenja pokazała, zo njeje jenož brjuch, ale tež hłowa serbskeho ludu: Zwjazkowe předsydstwo je so na puć podało, wjac transparentneje zjawneje diskusije wo bytostnych temach zwoprawdźeć. To budźe kwaliće wuslědkow tyć. Přetož potom móže kóždy pruwować, hač su argumenty plawsibelne a hač ­je woprawdźe skutkownych praktiskich konkluzijow. Hewak budu so serbske gremije hišće lětdźesatki na přikład z kubłanjom zaběrać, mjeztym pak nichtó wjac serbsce móc njebudźe. Hdyž nochcemy, zo w přichodźe sto tysac ludźi jenož „dobry dźeń“ a „božemje“ móže, dyrbimy kwalitu (kubłansko)politiskich debatow zwyšić. Rady tón proces přewodźamy, kaž je to nadawk medijow. Marcel Brauman

Wuprawa sorabistow do Slepoho, wo ­kotrejž sće w Předźenaku čitali, wězo science­fiction njebě – najebać mylne zapiski kaž „9. februara 2026 ...“ w dźeniku. Podrjadka napisma „we wulkim róžku 2026“ je pokiw na prawy čas dała.

Drježdźany (dpa/SN). Mjez mnohimi młodymi ludźimi w Sakskej zawinuja sćěhi pandemije a trajace krizy přiběrajcy psychiske problemy. Tole pokazuje najnowša rozprawa chorobneje kasy DAK wo stawje strowoty dźěći a młodostnych. Wědomostna studija je zwěsćiła, zo je dale a wjace holcow w starobje mjez 15 a 17 lětami, kiž ćerpja na wšelake strachi a depresije a z tutych přičin na strowe wašnje njejědźa. Ze studije wuchadźa, zo bě lěta 2024 něhdźe 67 wot cyłkownje tysac pola DAK zawěsćenych młodostnych tajkich problemow dla pola lěkarja. Porno časej do koronapandemije 2019 je tole rozrost wo 73 procentow. Zdobom je ličba chroniskich strachowanjow wo 88 procentow přiběrała. Holcow, kiž prawje njejědźa, bě wo 57 procentow wjace hač do pandemije. Tež depresije nastupajo rěči kasa dale wo wulkej ličbje ludźi, kotřiž pytaja w tym zwisku za lěkarskej pomocu, w rozprawje chorobneje kasy rěka.