Wulkopósłanc Čěskeje republiki je so wčera w Budyšinje prašał, kak móže Serbam pomhać. Znowa so Čech we wysokej poziciji za nas angažuje. Hač pak je to Sakskej a z tym tež Serbam wědome? Předsyda Domowiny namjetowaše wožiwić program, w kotrymž čěscy wučerjo serbske a serbšćinu wuknjace dźěći wuwučuja. Nazhonjenje nas wuči, zo njeje to lochko zwoprawdźić. Na jednym boku žada sej sakski kultus wobknježenje němčiny na wysokim niwowje, hačkuli měli Češa jenož serbske dźěći wuwučować. Na druhim boku traje připóznaće powołanskich wotzamknjenjow čěskich zajimcow za přistajenje jara dołho. Nic na kóncu je Čech bórze zmotany, hdyž potom tola sem do Serbow přińdźe. Wšako nańdźe wón ćežko podpěru a wzajomnosć, kotraž by pokazała, zo tych wosebje witamy, kotřiž swoju domiznu na dobro Serbow a wosebje našeje rěče a kultury, wopušća. Čěskaj pedagogaj, kotrajž staj w Serbach wuwučować chcyłoj, dźěłataj mjeztym wuspěšnje na němskej šuli. Milenka Rječcyna

Kocoraj Hubert a Staller stej zaso zjednoćenej. Při přećahu do Budyskeho wo­krjesa běštaj muž a žona nimo swojich zmachow tež Stallera, jednoho z Birma-kocorow susodki, sobu wzałoj. Ta policiji swój podhlad zdźěli, zo staj susodaj kocora pokradnyłoj. Jako Budyscy zastojnicy zwěrjo w nowym bydlenju porika pytachu, spyta muž kocora hišće přez terasu won pušćić, štož pak so jemu njeporadźi. Za kocorow so šmjatańca zbožownje skónči, wšako policisća Stallera zaso k Hubertej dowjezechu.

Kulowate pječwo z mjenom „Amerikančan“ mnozy znaja. Pjekarni w Lüneburgu pak tute pomjenowanje lětsa hižo hódź njebě. Hdyž je w nalěću zaso do sortimenta wozmu, ma w filialach pjekarnje Harms „Grönlandźan“ rěkać. Za słódkosć wabja ze sloganom: „Make cake not war“ („Čińće tykanc město wójny“).

Wojerecy (AK/SN). Wuměnjenja za Wojerowsku přiradu za serbske naležnosće su so pohubjeńšili. Město dotal dwanaće smě so nětko jenož hišće štyri razy wob lěto schadźować. „To tež rěka, zo smy połojcu našich dwanaće planowanych projektow najprjedy raz wróćo stajić dyrbjeli“, praji předsydka přirady Evelin Graf. „Za zbywace projekty chcemy próstwu wo wosebite posedźenje zapodać.“

Spočatk lěta běštej přirada za zbrašenych a přirada seniorow zjawny list pře­ćiwo skrótšenjam města we wobłuku přiradow wozjewili. Město běše jej prosće zjednoćiło. Serbska přirada wostanje samostatna, wona pak je pismo podpěrowała. „Sym za to, zo měšćanska rada swój rozsud koriguje, zo tři přirady dale wobsteja a so tak husto kaž trjeba schadźuja“, wuzběhnje Graf.

Ralbicy/Chrósćicy (SN/MiR). Sakske ministerstwo za kultus (SMK) je městna šulskich nawodow na serbskich a serbšćinu wuwučowacych zakładnych šulach wu­pisało. Za Serbsku zakładnu šulu „Jurij Chěžka“ w Chrósćicach pyta Budyska wotnožka Krajneho zarjada za šulu a kubłanje (LaSuB) wospjet noweho nawodu. LaSuB chce městno hnydom wobsadźić. Zašłe ­lěta su tole zastupujo nawodźa druhich zakładnych šulow wukonjeli. Tuchwilu ­čini tole Aleksander Kozak ze šule „Ćišinskeho“ w Pančicach-Kukowje. Dotalnych zajimcow za tule poziciju po wotchadźe Měrka Šmita přistajili njejsu. Na Serbskej zakładnej šuli Ralbicy lětsa kónc šulskeho lěta Andrea Liehnowa swoje skutkowanje jako wučerka a nawodnica zakónči. Na ­karjerowym portalu SMK je wupisanje za šuli w Chrósćicach a Ralbicach w serbskej a němskej rěči wozjewjene. SMK wočakuje za tutej poziciji, za kotrejž móžeja so zajimcy hišće hač do 24. februara přizjewić, wěste wobknježenje ertneje a pisomneje serbšćiny. Na zakładnej šuli „Handrij ­Zejler“ we Wojerecach je městno nawody lětsa 1. oktobra wakantne. Doba poža­danja za nje kónči so 11. měrca.