Znowa protest
Zakaz njepłaći
Nowy kancler snano populist
Burja pytaja za alternatiwami
Wulkeho zadołženja zawoda BayWa dla starosćeja so burja wo swoje žně
Mnichow (dpa/SN). Kriza zadołženja najwjetšeho agrarneho wikowarja BayWa ma lětsa w lěću wočiwidne wuskutki: Mnozy burja wosebje na juhu Němskeje pytaja sej druhich woteběraćelow za swoje žně. Mnozy burja woprašeja so priwatnych wikowarjow agrarnych tworow, hač móhli jim swoje twory předać abo je tam składować. Podobne rozprawjeja tež ratarske drustwa.
„Problemy BayWy maja wuskutki na cyły branšu“, praji Michael Osterholzer, jednaćel ratarskeho wikowanišća ze samsnym mjenom w delnjobayerskej gmejnje Massing. „Prěni raz smy na jednym z našich stejnišćow žito wotpokazali, dokelž žane městno wjace nimamy. To pak njezaleži jeničce na BayWa“, wón dale rozprawja. Mnozy burja maja mjenujcy hišće žito lońšich žnjow składowane.
Namóc hórje hač słowa
To a tamne (15.08.24)
Tři žony přisadźichu při pospyće zatykany nuznik wurjedźić, w thailandskej prowincy Chon Buri swoje žiwjenja. 60lětna a jeje 34 a 25lětnej dźowce běchu k tomu syrikowu kisalinu a natronowu lawgu wužiwali – smjertna to měšeńca, kaž policija zdźěli. W 1,20 metrow šěrokim a 2,50 metrow dołhim rumje z jeno małym woknješkom wužiwachu žony zakazany produkt ze syrikowej kisalinu. Wopory hakle něšto časa pozdźišo namakachu. Policija ludnosć nětko před wužiwanjom tajkich srědkow warnuje.
Prěni dźěl noweje stafle znateje serije „Emily in Paris“ je wot dźensnišeho na platformje Netflix wozjewjeny. Znowa je sej team zajimawe lubosćinske stawiznički před rjanymi kulisami a w njemało drohich kostimach wumyslił. Kak so stawizna w mjeztym štwórtej stafli wuwije, je překwapjenka.
Krajny rada je přesłapjeny
Zhorjelc (SN). Krajny rada Zhorjelskeho wokrjesa dr. Stephan Meyer (CDU) bě přesłapjeny, zo je zwjazkowa ministerka za nutřkowne naležnosće Nancy Faeser (SPD) wčera kónčinu wopytała. Hižo loni w awgusće bě wón w zjawnym lisće ministerku namołwjał, wobmjezowane kontrole na hranicy přikazać Z tym hodźało so ilegalnemu zapućowanju a kriminaliće při mjezy do Pólskeje zadźěwać. Nancy Faeser je přeprosył, so wo połoženje na městnje wobhonić.
Wospjet je Meyer ministerku přeprosył, nihdy njeje tomu sćěhowała. Bjez připowědźenja bě wčera naraz w Zhorjelskim wokrjesu po puću. „Sym přesłapjeny, zo njejsmy jako potrjechene lokalne zarjadnistwo žane informacije dóstali. Tuž so wězo prašam hač bě jeje wopyt wólbny bój abo hač měješe woprawdźe zajim za situaciju“, dr. Stephan Meyer zwurazni.
Předewšěm je jemu konstruktiwny dialog wažny. Nuznje je trěbne, zhromadnje wužadanja w hraničnym regionje zmištrować a situaciju rozrisać. „Naš zaměr wostanje wěstota našich wobydlerjow. Za to je komunikacija a zhromadne dźěło na wšitkich runinach trěbne.“
Kretschmer so słowa jimał
Zhorjelc (SN). Na kromje wólbneho foruma w Zhorjelcu je so sakski ministerski prezident k wukročenjam prawicarjow na CSD zašłu sobotu w Budyšinje wuprajił. Wohroženje wobdźělnikow přez prawicarskich ekstremistow je njeznjesliwe. Wo tym pisaja dźensa regionalne nowiny. Wón praji, zo so wšitcy, kiž za wopodstatnjenjom tajkeho wustupowanja pytaja, „zwonka kóždeho rozumneho konsensa“ hibaja. Kretschmer dźakowaše so tohorunja policiji za škit sprjewinym měsće.
Zwyšenje pjenjez wobzamknyli
Berlin (dpa/SN). Zwjazkowy kabinet je wčera wobzamknył, zo dóstawaja zwjazkowe kraje w lětomaj 2025 a 2026 dohromady štyri miliardy eurow za polěpšenje kwalitneho standarda w pěstowarnjach. Pjenjezy su dźěl dalewuwića tak mjenowaneho „zakonja wo kwaliće pěstowarnjow“. Dale wobzamkny kabinet wčera zwyšenje bydlenskeho pjenjeza wot 1. januara. Kóžde druhe lěto dyrbja so přiražki přiměrić. Wot klětušeho dóstanu potrěbni přerěznje mjez 15 a 30 procentami wjac pjenjez .
Pytaja podhladneho
