Philipp Raimund sensacionelnje sej złotu medalju w skakanju zdobył
Třeći wubědźowanski dźeń Olympiskich zymskich hrow w Italskej postaješe z wida Němskeje skok, kotryž móhł do olympiskich stawiznow zańć. Němski sněhakowarski skakar Philipp Raimund docpě na normalnym skakanišću w Prezzo złoto a krónowaše z tym dźeń, na kotrymž němscy sportowcy we wjacorych disciplinach prědku sobu měšachu.
Raimund wobchowa we woběmaj přechodomaj sylne čuwy. Z 274,1 dypkom doby wón před Kacperom Tomasiakom z Pólskeje. Bronza dźěše na Rena Nikaidō z Japanskeje a Gregora Deschwandena ze Šwicarskeje, kotrajž měještaj samsnu ličbu dypkow. Topfaworit Domen Prevc ze Słowjenskeje wosta bjez medalje. Wubědźowanje muži na wulkim skakanišću wotměje so sobotu.
Francoska so wo Kurdow stara
Erbil (SN). Wonkowny minister Francoskeje Jean-Noël Barrot je w kurdiskej kónčinje Iraka ze zastupjerjemi samozarjadnistwa Sewjerowuchodneje Syriskeje wo škiće tamnišich kurdiskich kónčin wuradźował. Zdobom wěnowachu so w rozmołwje, na kotrejž so wjeršny rozkaznik Syriskich demokratiskich mocow (SDF) Mazloum Abdi wobdźěli, wojowanju přećiwo islamistiskim teroristam. Francoska chce prawa syriskich Kurdow najebać islamistiske knježerstwo zaručeć.
Nowe warnowanske stawki
Berlin (dpa/SN). Po wšej Němskej su dźensa rano warnowanske stawki w zjawnej słužbje zahajili. Dźěłarnistwo ver.di a Zwjazk zastojnikow stej přistajenych k tomu namołwjałoj. Potrjechene běchu wosebje uniwersitne chorownje, wysoke šule a dróhotwarske zarjadnistwa. W někotrych zwjazkowych krajach kaž w Sewjerorynsko-Westfalskej su tež w dźěćacych přebywanišćach a šulach stawkowali. Ver.di žada sej sydom procentow wjace mzdy, znajmjeńša pak 300 eurow.
Debatuja wo socialnym staće
Ultraortodoksni židźa w Israelu su wčera znowa přećiwo hrožacemu ...
Klöckner wopyta Israel
Berlin (dpa/SN). Prezidentka zwjazkoweho sejma Julia Klöckner je so dźensa na tři dny trajacy nastupny wopyt do Israela podała. Politikarka CDU slěduje přeprošenje kolegi, prezidenta israelskeho parlamenta Knesset Amira Ohany. W rozmołwach z nim chce Klöckner po informacijach zwjazkoweho sejma wosebje mjezsobne poćahi, połoženje w regionje, swětowu situaciju a wěstotu w interneće za škit parlamentow wobrěčeć.
Předwidźane je tež zetkanje z nawodu opozicije Jairom Lapidom a z němskoisraelskej přećelskej skupinu Knesset. Dale wopyta Klöckner wopomnišćo Yad Vashem za wopory nacionalsocialistiskeho holocausta. Zdobom wopomina wona wopory nadpada Hamas 7. oktobra 2023.
Pólske wójsko natwari rezerwu
Waršawa (dpa/SN). Pólska planuje w zwisku z powjetšenjom wójska wutworić nowu kategoriju wojerskich rezerwistow, kotrychž móža w padźe wójny w najkrótšim času mobilizować. Nowa jednotka za spěšne zasadźenje ma z derje wukubłanych a stajnje zaso zwučowacych wojakow rezerwy wobstać, zdźěli zakitowanski minister Władysław Kosiniak-Kamysz powěsćerni PAP we Waršawje. Kóždy rezerwist měł so wosom dnjow wob lěto na zwučowanjach wobdźěleć.
Naprawa je dźěl prócowanja knježerstwa, ličbu wojakow w Pólskej jako čłonskim kraju EU a NATO hač do lěta 2039 na 500 000 zwyšić. Tuchwilu maja něhdźe 200 000 wojakow. Dokelž čuje so Pólska wot Ruskeje wohrožena, kraj tuchwilu masiwnje bróni.
Korupcija na swěće so dale rozšěrja
Berlin (dpa/SN). Korupcija so po informacijach organizacije Transparency International po wšěm swěće dale rozšěrja. Němska steji po kóždolětnym přepytowanju na dźesatym městnje. Z tym je so porno loni wo pjeć městnow polěpšiła. Tomu pak je tež pohubjeńšenje druhich krajow kaž Awstralskeje, Irskeje a Uruguayja přinošowało. Korupcija po měnjenju Transparency International w tej měrje přiběra kaž prawicarscy nacionalisća a populisća mjez ludźimi přidobywaja, organizacija w Berlinje zdźěli.
Tak mjenowany začuwany indeks korupcije poćahuje so na posudk wo korupciji w zjawnym wobłuku, kotryž fachowcy w jednotliwych krajach zapodadźa. Skala saha wot nul dypkow – hdyž zdawa so korupcija jara wulka – hač do sto dypkow za kraj bjez korupcije. Posudk wobsahuje 182 statow a regionow.
Wosmy króć je Danska mjez wšěmi krajemi najwjace dypkow dóstała. Slědujetej Finska a Singapur. Poslednjej městnje wobsadźitej Južny Sudan a Somalia. Globalny přerězk je 42 dypkow.
EU měła Epsteina dla slědźić
Skandal wokoło seksualneho złóstnika z USA so w Europje dale rozšěrja
Brüssel (dpa/SN). Přeslědźenju skandala wokoło seksualneho złóstnika Jeffreyja Epsteina měli po měnjenju zapósłancow Europskeho parlamenta tež institucije EU přinošować. Předsydka wuběrka za wěstotu a zakitowanje w Europskim parlamenće Marie-Agnes Strack-Zimmermann (FDP) rjekny nowinarjam: „Europske institucije kaž Europol a zamołwity Zarjad za bój přećiwo płokanju pjenjez měli hižo nazběrane dopóznaća hnydom systematisce wuhódnoćić a při tym wusko z mjezynarodnymi partnerami hromadźe dźěłać.“ Přećiwo mjezy přesahowacym syćam dyrbjeli zamołwići zhromadnje postupować, zo bychu je woprawdźe a skutkownje wotkryli.
Zwisk mjez ludami
To a tamne (10.02.26)
Paduch je so w cuzym bydlenju na Rujanach kupał. Do toho bě sej muž w kuchni něšto k jědźi zwarił. Susodce swěca w domje we wsy Lohme napadny. Přiwołana policija widźeše, zo muž w kupjeli we wani sedźi. Jako tón zastojnikow wuhlada, spytaše wón ćeknyć. W domje policisća naheho muža nańdźechu. 25lětny paduch wustupowaše agresiwnje a so wobaraše. Tuž jeho nachwilnje zajachu.
Zakaz wužiwanja socialnych syćow za dźěći a młodostnych, wo kotrymž we wjacorych krajach diskutuja, SPD a Lěwica w Němskeje wotpokazujetej. SPD sej město toho žada, socialnym platformam wjace sobuzamołwitosće napołožić. Tež předsydka frakcije Lěwicy Heidi Reichinnek planowany zakaz za młodostnych pod 16 lětami kritizuje. CDU chce kónc februara wo wótrišich prawidłach na šulach rozsudźić.
Sylny zazběh na olympiskich hrach za Němsku
Zymske olympiske hry w Italskej su so połne začućow, medaljowych wuspěchow za němski team a njewočakowanych podawkow zahajili. Wosebje za alpinske sněhakowanje a sankowansku čaru je so zjawnosć wote wšeho spočatka jara zajimowała. Napjaty a dramatiski bě w alpinskim sněhakowarskim sporće předewšěm wotjězd žonow. Wukon němskeje sněhakowarki Emmy Aicher bě nimale perfektny, wona doby slěbornu medalju. Zastatk na złoto wučinješe jeničce štyri stoćiny sekundow. Olympiske złoto doby ze snadnym předskokom US-Američanka Breezy Johnson. Lokalna matadorka Sofia Goggia zdoby sej bronzu. Zaćěmnjene bu wubědźowanje wot ćežkeho njezboža US-Američanki Lindsey Vonn. Podawk postara so wo čujomny njeměr w cilu. Vonn sej při ćežkim njezbožu lěwu nohu złama a bu hižo wčera wuspěšnje operowana.
