W migraciskej politice wojuja wěriwi legendow: Ći na lěwym boku twjerdźa, zo „dyrbješe“ kóždy požadar azyla ćeknyć a je škita potrěbny. A ći na prawym boku maja kóždeho, kiž njeje so nas do přichada w Němskej prašał, hač je witany, za skućićela „iregularneje migracije“. Běchu přesydlency z NDR do zapada ćěkancy ­komunistiskeje njeprawdy dla abo migranća z hospodarskej motiwaciju? Snadź běše kaž dźensa tak, zo tworitej hustodosć žedźba za swobodu a materielnje lěpšim žiwjenjom cyłk motiwacije. Ministerski prezident Schleswigsko-Holsteinskeje ­Daniel Günther (CDU) namjetowaše, azylantam bjez potrjeby škita perspektiwu poskićeć, hdyž su integrowani a zwólniwi dźěłać. To njeje so konsekwentnje přesadźiło, kaž rozprawy wo zadwělowanych gastronomach tež we Łužicy pokazuja: Woni so ze zarjadami nasadźuja, kotrež chcedźa jim ćěkancow preč brać, kotřiž su dawno aktiwny stołp zawoda. Prošu wjac pragmatizma! Marcel Brauman

Mnozy wćipni su so sobotu a njedźelu při Picnjanskim plahowanskim haće (Hälterteich) zhromadźili, zo bychu rybarjam tamnišeho rybarskeho zawoda při wułójenju přihladowali. Dohromady mějachu na kóncu wjace hač 60 tonow karpa a něhdźe dźesać tonow dalšeje ryby – mjez druhim suma a šćuku – w swojich sakach. Plahowanski hat ze swojimi 145 hektarami je jenož jedyn z 35 hatow, kotrež kołowokoło Picnja wobhospodarjeja. Cyłkownje liča Picnjanscy rybarjo w tutej sezonje ze 400 do 450 tonami karpa. Najpožadniši je Picnjanski karp za čas wokoło hód a silwestra – předawanska doba wšak kónči so hakle w jutrownym času. Foto: Michael Helbig

Wolfsburg (dpa/SN). Hišće minjenu srjedu běše němski awtotwarc VW problemow dodawanja chipow dla před krótkodobnym nachwilnym stopom produkcije warnował, mjez druhim tež w Šwikawskim zawodźe za elektriske jězdźidła. Kónc tydźenja podšmórny rěčnik koncerna, zo VW w tutym tydźenju z wupadami produkcije na němskich stejnišćach njeliči. „Dodawanske ćeže Nexperia-chipow tuchwilu wuskutki na produkciju jězdźidłow w zawodach koncerna Volkswagen w Němskej nimaja“, wón piše. Na naprašowanje wobkrući rěčnik, zo płaći to tež za zawody dalšich markow pod třěchu koncerna w Němskej kaž tež we wukraju, kaž na přikład Audi, Porsche, Škoda abo Seat. Tež w němskich twornjach awtowych komponentow, kotrež koncernej přisłušeja, planuja w tutym tydźenju z regularnej produkciju. Prognozu, kak w nowembru dale póńdźe, VW tuchwilu podać nochce. „Hladajo na přewšo dynamisku situaciju njemóžemy krótkodobne wuskutki na našu produkcisku syć zasadnje wuzamknyć“, rěčnik wuzběhny.

Dosć derje z alkoholom so zastarał je njeznaty paduch w Bendorfje pola Koblenza. Na wšěch 28 blešow Champanskeho a Whiskyja je wón z kupnicy pokradnył. Napadnyło je padustwo hakle při wuhódnoćenju awtomatiskich kamerow wobchoda. Skućićel je bleše do tošow stykał a we wozyčku transportował. Zawodźěł je wón wšitko z měchami drjewjanych třěškow za kóčki. Na kóncu ­móžeše wón z wozom přez njewobsa­dźenu kasu z wobchoda twochnyć.

Na wšěch 6,5 tonow kokaina je španiska policija na łódźi na Atlantiskim oceanje namakała a sćazała. Z Panamy jěducu łódź su dobre tysac kilometrow před pobrjohom Kanariskich kupow zadźerželi. Zaměr łódźe bě Vigo na sewjerozapadźe Španiskeje. Wšěch dźewjeć namórnikow su zajeli. Je to jedyn z najwjetšich wuspěchow španiskeje policije.