Von der Leyen do Kijewa dojěła
Kijew (dpa/SN). Prezidentka komisije EU Ursula von der Leyen a prezident Rady EU António Costa staj składnostnje štwórteje róčnicy nadpada Ruskeje na Ukrainu na wopyt do Kijewa dojěłoj. Von der Leyen rjekny, zo ma wopyt pokazać, zo steji Europa tež w tutej krutej zymje pjenježnje a wojersce njepowalnje po boku Ukrainy. Costa chcył zmužitosć a rozsudźenosć ukrainskeho ludu mytować, kotryž so mjeztym štyri lěta ruskemu nadpadźe wobora.
Zasćinjeny je wopyt wot blokady nowych sankcijow přećiwo Ruskeje ze stron Madźarskeje a Słowakskeje. Madźarska bě swoje weto přećiwo rozsudej EU zapołožiła, Ukrainje nowy kredit 90 miliardow eurow přewostajić.
Šmjatki cłow dla
Słowakska wotpinje Ukrainje milinu
Bratislava (dpa/SN). Słowakski ministerski prezident Robert Fico je připowědźenu „přećiwnu naprawu“ přećiwo susodnej Ukrainje zwoprawdźił. Dokelž dale žadyn ruski zemski wolij přez wolijowód „Družba“ přez Ukrainu do Słowakskeje njeběži, je Fico wukazał, dodawanje słowakskeje miliny do Ukrainy přetorhnyć.
Fico w tym zwisku zdźěli, zo je do toho ukrainskeho prezidenta Wolodymyra Zelenskeho naležnje wo telefonat prosył. Dokelž pak bě tón hakle jutře, srjedu, k tomu zwólniwy, bě Słowakska nuzowana, swójske naprawy přesadźić. Ručež transit wolija zaso funguje, tež milina do Ukrainy zaso ćeče, Fico přilubi.
Słowakska dóstanje přez wolijowód zemski wolij z Ruskeje, dokelž je energetisce wot toho wotwisna. Wot kónca januara žadyn wolij wjace njedochadźa, dokelž je pipeline pječa přez ruske bomby wobškodźena. Słowakska a Madźarska Ukrainje wumjetujetej, zo wolij wotpohladnje blokuje. Kónc tydźenja bě słowakske knježerstwo nuzowy staw wukazało a statne rezerwy wolija mobilizowało.
Skórnik zymu derje přetrał
Mnóstwo škodowaneho drjewa w Sakskej minjene lěta woteběrało
Pirna (dpa/SN). Dołha zyma ze sněhom a krutym zmjerzkom njeje skórnikej (Borkenkäfer) zeškodźała – nawopak. Zymske wjedro je škódnikej skerje polěkowało, dokelž wón tak dobu „zymskeho spara“ dočasnje njeskónči. Tole zwěsća Sven Sonnemann, wěcywobdźěłar za škit lěsow w statnym zawodźe Sachsenforst. „Měnjace so wjedro z chłódnymi a ćopłymi wotrězkami su za skórnika skerje problematiske, dokelž njemóže so bruk do swojeho zymskeho modusa nawróćić. Jeli so potom zyma hišće raz nawróći, njeje skórnik wjace škitany.
Zasadnje su wšitke domjace družiny na wuměnjenja zymy w našich kónčinach derje nastajene. „Skórniki škitaja so z wosebitym srědkom přećiwo zymje, kotryž same produkuja. Takle tež kruty zmjerzk bjez škody derje přetraja“, Sonnemann rozłoži. Tuž fachowcy z toho njewuchadźeja, zo normalne zymske wjedro jich populaciju negatiwnje wobwliwuje.
Politiski signal z lětadła
Porjedźenka
Wjace lěkarjow z wukraja
To a tamne (24.02.26)
W kamorje wostać móže zymski kabat wot jutřišeho. Tole lubja nam wjedrarjo. Na zapadźe Němskeje wočakuja hač do 20 stopnjow ćopłoty. Na wuchodźe dyrbimy so najprjedy ze dźesać stopnjemi spokojić. Pjatk móže žiwe slěbro hač na 15 stopnjow zalězć. Tež přichodny tydźeń přewodźa nas nalětnja ćopłota.
Smjertne powostanki katolskeho swjateho Franza z Assisija su prěni króć po nimale wosom lětstotkach zaso šěrokej zjawnosći přistupne. Wustajeńca z relikwijemi swjateho w bamžowskej bazilice San Francesco w srjedźowěkowskej gmejnje Assisi traje cyły měsac hač do 22. měrca. Nimale 400 000 ludźi ze wšeho swěta je so po informacijach rjadu franciskanow hižo přizjewiło.
Swjate znamjo
Trier (B/SN). Loni popjelnu srjedu bě njewočakowano wjele ludźi, wosebje młodostnych, w Francoskej do cyrkwje po swjate znamjo – popjelny křižik – přišło. Popjeł wužiwa so wot 12. lětstotka zwjetša wot spalenych palmowych hałužkow jako „znamjo žiwjenja a dobyća“. Na platformje Tiktok su młodostni, wěriwi a njewěriwi, za to wirtuelnu zhromadnosć wutworili.
Pokorna a awtentiska cyrkej
Praha (B/SN) Bamž Leo XIV. je arcybiskopa Stanislava Přibyla jako primasa Morawy a nawodu arcybiskopstwa Prahi pomjenował. Arcybiskopej Přibylej je wažne, zo je cyrkej dźěl ciwilneje towaršnosće, zo je wona pokorna awtentiska a jednora. Wón kritizuje noweho parlamentariskeho prezidenta Tomija Okamaru z jeho prawicarskimi nahladami a wočakuje solidaritu z Ukrainu.
Zwěrina we woponach
Rěča wo krediće za Ukrainu
Brüssel (dpa/SN). Krótko do štwórteje róčnicy zahajenja wójny Ruskeje přećiwo Ukrainje su wonkowni ministrojo čłonskich krajow EU dźensa wo wažnym krediće 90 miliardow eurow na dobro Ukrainy a wo dalšich sankcijach přećiwo Ruskej wuradźowali. Při tym wočakowachu razne diskusije z madźarskej delegaciju. Ta bě kónc tydźenja připowědźiła, zo kreditej njepřihłosuje, doniž njeje zastaranje Madźarskeje z płunom zaručene.
Wadźa so wo chorobny lisćik
Berlin (dpa/SN). Nastupajo telefoniski chorobny lisćik njejstej sej CDU a SPD dale přezjednej. Mjeztym zo je sej CDU na swojim zjězdźe žadała, dotalnu praksu skónčić, parlamentariski jednaćel SPD w zwjazkowym sejmje Dirk Wiese SPD dale na tym wobstawa. „Telefoniski chorobny lisćik je zmysłapołny. Wona praksam dźěło wolóži a zadźěwa natyknjenjam w čakarnjach“, rjekny wón nowinarjam. CDU porno tomu je sej wěsta, zo polěkuje telefoniska warianta znjewužiwanju.
Zelenskyj: Garantije bjez Trumpa
