Wočakuje wujasnjenje EVP
Berlin (dpa/SN). Ministerski prezident Porynsko-Pfalcy Alexander Schweitzer (SPD) žada sej jasne stejišćo CDU/CSU k dorěčam mjez frakciju Europskeje ludoweje strony EVP a AfD w Europskim parlamenće. Předsyda EVP Manfred Weber bě do wólbow potwjerdźił, zo njeje zhromadneho dźěła z prawicarsko-radikalnej stronu, rjekny Schweitzer powěsćerni dpa. Rešerša powěsćernje dpa pak je wunjesła, zo ma EVP, kotrejž tež CDU a CSU přisłušatej, dosć wuske styki k AfD.
EU wuradźuje wo wójnje
Brüssel (dpa/SN). Wonkowni ministrojo čłonskich krajow EU su so dźensa prěni króć po zahajenju wójny přećiwo Iranej wosobinsce w Brüsselu zešli. Mjez druhim su wo tym rěčeli, kak móhła EU k wotputanju konflikta přinošować. Starosćiwje wobkedźbuja wosebje wuskutki wójny na płaćizny energije kaž tež móžne nowe prudy ćěkancow. Dalša tema je połoženje w Ukrainje a wosebje blokada Madźarskeje přećiwo kreditej wjacorych miliardow eurow za Ukrainu.
Nowa koalicija w Podstupimje
Ze swjatočnej ceremoniju su wčera wječor w italskim měsće Cortina ...
CDU w Hessenskej dale najsylniša
Wiesbaden (dpa/SN). Při komunalnych wólbach w Hessenskej je CDU po dotalnych zwěsćenjach najsylniša strona wostała. Wona je wčera po wšěm kraju 29,7 procentow hłosow dóstała, statistiski zarjad minjenu nóc zdźěli. Slěduje SPD ze 20,2 procentomaj. AfD je na nahladnosći přidobyła a zawěsći sej z 15,9 procentami třeće městno. Zeleni docpěchu po dotalnym wuličenju 14,4 procenty a z tym štwórte městno. Lěwica zdoby sej 5,8 procentow a FDP 3,7 procentow.
W Hessenskej su wčera nowe wokrjesne sejmiki, měšćanske a gmejnske parlamenty kaž tež wjesne rady wolili. Wólbne wobdźělneje wučinješe 54,4 procenty. Před pjeć lětami běchu 50,4 procenty ludźi wolili.
Wyši měšćanosta iniciatiwu šwika
Wo płaćiznach ćěriwa wuradźowali
Berlin (dpa/SN). Wot zwjazkoweho knježerstwa zasadźena komisija je dźensa wo raznje přiběracych płaćiznach ćěriwa a energije wuradźowała. Na tym su so tež zastupnicy koncernow mineralneho wolija wobdźělili. Přitomni běchu nimo toho tež prezident zwjazkoweho karteloweho zarjada Andreas Mundt a politikarjo zwjazkoweho sejma. Hladajo na widźomnje stupace płaćizny běchu wjacori politikarjo koncernam wumjetowali, zo ludźi njetrjebawšo „wotkasěruja“. Branša tole wotpokazuje. Fachowcy nimo toho na to pokazuja, zo njejsu płaćizny w žanym europskim kraju takle masiwnje rozrostli kaž w Němskej.
Zwjazkowe knježerstwo je minjene dny wjacore naprawy připowědźiło. Tak chcedźa tankownjam po přikładźe Awstriskeje přichodnje předpisać, zo smědźa płaćizny jenož jónu wob dźeń zwyšić. Znižić smědźa płaćizny porno tomu kóždy čas. Nimo toho chcedźa kartelowe prawo přiwótřić, zo móhli jednorišo přećiwo wulkim wolijowym koncernam a jich płaćiznowej politice postupować.
Trump žada sej pomoc NATO
Hormuska dróha za łódźe dale blokowana – nowe nalěty na Iran a Israel
Washington (dpa/SN). We wójnje přećiwo Iranej sej prezident USA Donald Trump wot zwjazkarjow NATO z chětro konfrontowacymi słowami žada, zo měli wolijowe transporty w Hormuskej dróze zaručić pomhać. Jeli partnerojo w tym nastupanju USA njepodpěruja, steji NATO před struchłym přichodom, rjekny Trump nowinarjam Financial Times. Jeli „žana reakcija njedóńdźe abo reakcija negatiwnje wuńdźe, budźe tole jara špatnje za přichod NATO“, nowinarjo Trumpa cituja.
Wójny USA a Israela přećiwo Iranej dla je wobchad łódźow w Hormuskej dróze, kotraž je jara wažna za mjezynarodny transport zemskeho wolija a běžiteho płuna, praktiske zlemjeny. Wall Street Journal rozprawja po informacijach zastojnikow USA, zo chcedźa wjacore kraje koaliciju załožić, kotraž chce łódźe přez chětro wusku mórski dróhu přewodźeć. Tole je knježerstwu we Washingtonje znate.
Připowědźeny scenarij
To a tamne (16.03.26)
Z plěchom na Instagramje je so předsydka badensko-württembergskeje FDP Nicole Büttner předstajiła. „Sym so sadźiła, sym přěhrała a nětko sym swoje přilubjenje zwoprawdźiła“, rjekny Büttner w krótkim wideju. Pozadk toho je poražka FDP w njedawnych wólbach krajneho sejma w Badensko-Württembergskej. Tam bě strona na mjezy pjeć procentow zwrěšćiła a tak ze sejma zlećała. Do wólbow bě Büttner přilubiła, zo da sej w tymle padźe plěch třihać.
Na swětowym mišterstwje młodych pjekarjow w Taiwanje je sej němske mustwo třeće městno zdobyło. Olympiske rynki z chlěboweho ćěsta a z olympiskim wohenjom su jurorow přeswědčili. Němsku zastupowaštaj němska mišterka młodźiny Lilly Jahn z Frankfurta nad Wódru a Jonah Rosentreter z Essena.
Rozdźěl do wólbow snadny
Mainz (dpa/SN). Něhdźe tydźeń do wólbow w Porynsko-Pfalcowskej wostanje wotstawk mjez knježacej SPD a opoziciskej CDU snadny. We woprašowanju „Politbarometer Extra“ sćelaka ZDF je načolny kandidat CDU Gordon Schnieder z 28 procentami hłosow wusko před stronu ministerskeho prezidenta Alexandera Schweitzera (SPD) ze 26 procentami. Třeće městno zabjerje tuchwilu AfD z 19 procentami hłosow.
Žadaja sej bjezpłatnu jědź
Podstupim (dpa/SN). W Braniborskej su ludowu iniciatiwu za bjezpłatnu jědź w šuli do žiwjenja zwołali. Politikar Gregor Gysi tute prócowanje jako prawiznik přewodźuje. Iniciatiwa žada sej bjezpłatnu a strowu jědź za šulerki a šulerjow 1. do 6. lětnika. Samsne žadanje bě krajny sejm 2024 formalnych zmylkow dla wotpokazał. Znajmjeńša 20 000 płaćiwych podpismow je trěbnych, zo by so wone do skutka stajić móhło. Jeli je nazběraja, dyrbi so krajny sejm z naležnosću zaběrać a wo njej rozsudźić.
Wupokazy dyrbja přiměrić
