Karlsruhe/Berlin (SN/mb). Generalne statne rěčnistwo je skóržbu třěšneho zwjazka Kurdow přećiwo syriskemu prezidentej wotpokazało, wšako je jako šef stata prawnisce imuny. Kurdojo wumjetuja al-Sharaa mordarstwo ludu, złóstnistwa přećiwo čłowjeskosći kaž tež tworjenje, nawjedowanje resp. podpěrowanje teroristiskeho zjednoćenstwa. Předsyda zwjazka Ali Ertan Toprak porokowaše zwjazkowemu knježerstwu, zo politikarjej hołduje, kotryž chce w Syriskej „sunitiske islamistiske knjejstwo wutworić“. We wjacorych městach Němskeje su wčera Kurdojo přećiwo tomu protestowali, zo chcyše kancler Friedrich Merz (CDU) al-Scharaa přijimać. Al-Scharaa sam je wopyt situacije w Syriskej dla wotprajił.

Washington (dpa/SN). Prezident USA Donald Trump nječuje so po informacijach medijow hižo nuzowany, jenož na měr myslić. Hladajo na konflikt Grönlandskeje dla je Trump norwegskemu ministerskemu prezidentej Jonasej Gahrej Støremu list pósłał: „Hladajo na to, zo je waš kraj wobzamknył, zo mi Měrowe Nobelowe myto njespožči, byrnjež wosom wójnow skónčił, nječuju so hižo na to wjazany, jeničce na měr myslić.“

Runočasnje Trump hišće raz potwjerdźi, zo chcył sej Grönlandsku kupu přiswojić. „Swět njebudźe wěsty, jeli nimamy totalnu kontrolu nad Grönlandskej“, Trump w lisće piše.

Norwegski ministerski prezident Støre je mjeztym wobkrućił, zo je list Trumpa dóstał. „Štož Nobelowe myto nastupa, sym wospjet rjekł, štož wšak je powšitkownje znate, mjenujcy, zo spožča myto njewotwisny Nobelowy komitej a nic norwegske knježerstwo.“

Trump hižo měsacy twjerdźi, zo je sej Nobelowe myto zasłužił, dokelž je wjacore wójny na swěće skónčił.

Zwada wo Grönlandsku tema na swětowym hospodarskim forumje

Davos (dpa/SN). W rozestajenju nastupajo žadanje USA za Grönlandskej je financny minister USA Scott Bessent Europsku uniju warnował. Jako jeho žurnalisća w šwicarskim Davosu na móžne chłostanske naprawy EU narěčachu, wón rjekny: „To by jara njemudre było. Kóždy měł sej toho wědomy być, zo prezident USA swoje słowa jara chutnje měni.“ Trump chce Danskej słušacu Grönlandsku kupu do teritorija USA zarjadować. Knježerstwo w Kopenhagenje je wospjet wotpokazało, kupu předać a ma mjeztym podpěru wjacorych europskich krajow.

Kak drje so zamołwitym Europskeje unije wjedźe, hdyž mysla na jutřiši wopyt prezidenta USA Donalda Trumpa na swětowym hospodarskim forumje w šwicarskim Davosu? Trump přijědźe do Europy, zo by swoje žadanja za Grönlandskej hišće raz potwjerdźił. Štó budźe zmužity dosć, jemu jasnje znapřećiwjeć? Ursula von der Leyen, Friedrich Merz abo Emmanuel Macron? Što by było, by-li Europa Trumpej zdźěliła, zo scyła přijěć njetrjeba? Agresorej hišće čerwjeny přestrjenc před noze połožić, to je tola absurdne. Trjechi, wón chce z wobdźělenymi rěčeć. Jeho majestosć so ponižuje a poddanam dowoli, jemu noze myć. Kajka to hnada!

Tuchwilu skići EU skerje wobraz kurjenca spłóšenych kokošow, kotremuž so liška bliži. Hdźe wostanje koalicija zwólniwych, kotraž swobodu, demokratiju a teritorialnu integritu Europy zakituje? Snano zamołwitym pomału swita, zo njehrozy nam strach z wuchoda, ale ze stron přewjerćaneho monarcha. Marko Wjeńka