Woheń w składźe drjewjanych třěskow
To a tamne (07.01.26)
Kuriozny wopyt mějachu wčera w předawarni žiwidłow w delnjofrankskej gmejnje Burgsinn: Něhdźe 50 wowcow běžeše runu smuhu do wotnožki discountera Penny a wosta něhdźe 20 mjeńšin we wobchodźe. Zwěrjata běhachu mjez regalemi a před kasu. Zadźiwani kupcy scenu z mobilnymi telefonami dokumentowachu. Pomocnicy wjedźechu wowcy z wobchoda a jón wurjedźichu.
Do pasli zalězł je sej wčera jedyn z dweju paduchow na Lipšćanskim hłownym dwórnišću: Zhromadnje z dalšim skućićelom chcyše wón we wobchodźe parfim za 250 eurow pokradnyć. Jako jeju lepichu, mužej ćeknyštaj. Při tym skućićel swój mobilny telefon zhubi. Policija telefon namaka. Paduch smě sej jón na straži wotewzać, jeli tam swoje wosobinske daty zawostaji.
Koalicija SPD a BSW nimo
Podstupim (dpa/SN). Po wšej Němskej prěnja koalicija SPD a BSW w Braniborskej je rozpadnyła. Zakład zhromadneho dźěła njeje hižo daty, rjekny ministerski prezident Dietmar Woidke (SPD) dźensa w Podstupimje. Najebać to Woidke nowowólby wotpokazuje, kotrež sej AfD žada. Město toho měri so wón nětko na zwjazk z CDU. Tón by po přestupje ministra Roberta Crumbacha z BSW do SPD nětko samo wjetšinu měł.
Wuradźuja wo přiměrje
Paris (dpa/SN). Zastupnicy tak mjenowaneje „koalicije zwólniwych“ su dźensa w Parisu wo dalšim postupowanju w prócowanju wo móžny přiměr we wójnje w Ukrainje wuradźowali. Cyłkownje 35 krajow je so wobdźěliło. Němsku zastupowaše zwjazkowy kancler Friedrich Merz (CDU). Tež ukrainskeho prezidenta Wolodymyra Zelenskeho w Parisu wočakowachu. Wo wuslědkach chcychu zjawnosć w běhu popołdnja informować.
FDP před wažnymi nadawkami
Přiwisnicy venezuelaskeho prezidenta Nicolása Madura a jeho ...
Merz: 2026 hospodarstwo zaso wožiwić
Berlin (dpa/SN). Wožiwjenje hospodarstwa Němskeje ma zwjazkowy kancler Friedrich Merz (CDU) lětsa za najwažniši zaměr swojeho skutkowanja. Tole je wón zapósłancam CDU/CSU a SPD w zwjazkowym sejmje w nowolětnym lisće zdźělił. Wšitke dotalne rozsudy hospodarsku wubědźowansku kmanosć Němskeje hišće dosć polěpšili njejsu. Połoženje je „w někotrych wobłukach jara kritiske“, rěka w štyri strony wopřijacym pismje nawody němskeho knježerstwa.
„Dyrbimy so tuž 2026 na to koncentrować, prawe politiske a zakońske rozsudy nastorčić, zo bychmy hospodarske wuměnjenja zasadnje polěpšili.“ Jenož tak móže so hospodarstwo Němskeje zaso zhrabać a krizu přewinyć, piše předsyda CDU.
Ukrainje přilubja kancler dale trajacu podpěru. Z wobzamknjenjom nastupajo wužiwanje w EU blokowaneho ruskeho zamóženja su pjenježne wuměnjenja stworili, zo móhli Ukrainu hišće dołho při zakitowanju přećiwo ruskemu nadpadnikej podpěrować. „Ruska njesmě na našej rozsudźenosći dwělować.“
Merz zapósłancow prosy, dowěru ludźi do politiki a do demokratije sylnić.
UNO postupowanje USA kritizuje
New York (dpa/SN). Venezuela, Ruska a China su sej hnydomne pušćenje wot wójska USA zajateho prezidenta Venezuele Nicolása Madura a jeho mandźelskeje žadali. Po nadpadźe USA na južnoameriski kraj minjeny kónc tydźenja kritizowachu wulkopósłancy UNO mjenowanych krajow na wurjadnym posedźenju wěstotneje rady UNO agresiwne postupowanje USA, kotrež maja za ranjenje prawa ludow. Knježerstwo w Caracasu bě z pomocu Ruskeje a Chiny wo wurjadne posedźenje prosyło.
Ruski wulkopósłanc mjenowaše postupowanje USA předznamjo nawróta do časa njezakonitosće a dominancy USA přez namóc, chaos a swojowólnosć z mócnarsko-politiskich a hospodarskich přičin. China kritizowaše: „Žadyn kraj njemóže jako swětowy policist wustupować a žadyn kraj njesmě sej dowolić, so jako mjezynarodny sudnik wupěrać.“
63lětneho Madura su wčera na sudnistwje w New Yorku wikowanja z drogami dla wobskoržili. Tón wumjetowanja wotpokazuje a ma so za njewinowateho.
Woidke wěšćenjam njewěri
Braniborski ministerski prezident zhladuje na wólbne lěto 2026
Podstupim (dpa/SN). Ministerski prezident Braniborskeje Dietmar Woidke (SPD) na spočatku wólbneho lěta 2026 warnuje, so přejara na wólbne woprašowanja spušćeć. „Wólby krajneho sejma častodosć hinak wuńdu, hač woprašowanja to hišće tydźenje a měsacy do toho wěšća“, rjekny politikar SPD powěsćerni dpa w Podstupimje. Hladajo na woprašowanja je wón jara zdźeržliwy, Woidke nowinarjam rjekny.
Lětsa wola krajne parlamenty w Badensko-Württembergskej (8. měrca), w Porynsko-Pfalcy (22. měrca), w Saksko-Anhaltskej (6. septembra), w Berlinje a w Mecklenburgsko-Předpomorskej (20. septembra). Nimo toho přewjedu w Bayerskej, Hessenskej a Delnjosakskej komunalne wólby. W Braniborskej wola šěsć krajnych radow a wjacorych měšćanostow.
Runje tak kaž w Braniborskej AfD tež w jeje susodnymaj krajomaj SakskoAnhaltskej a Mecklenburgsko-Předpomorskej we woprašowanjach nawjeduje. W Saksko-Anhaltskej bliži so wona ze 40 procentami absolutnej wjetšinje.
Prosće teroristiski akt
Porjedźenka
Rjemjeslnicy derje předawali
Olbernhau (dpa/SN). Dohodowna předań je mjez wuměłskimi rjemjeslnikami w Rudnych horach dobry wothłós zbudźiła, byrnjež so tež někotre negatiwne hłosy předewzaćow jewili, kotřiž běchu lěpši wunošk wočakowali. Tole rjekny Frederic Günther ze Zwjazka rudnohórskich wuměłskich rjemjeslnikow a twarcow hrajkow powěsćerni dpa. Najwjetši dźěl rjemjeslnikow je spokojom. Njewěste je, kak so eksport nowych cłow USA dla w přichodźe wuwije. Tež prezenca na hodownych wikach njeje za někotre předewzaća přichodnje zaručena, dokelž bědźa so ze stupacymi kóštami za personal, energiju a popłatki za stejnišćo.
„Rudnohórske wuměłske rjemjesło je nadal woblubowane“, předsyda zwjazka zwěsća. Adwentne wiki běchu derje wopytane, štož so we wobroće wotbłyšćuje. Tež internetne wikowanje so derje wuwiwa. Doskónčne ličby drje hišće njepředleža, nalada pak je dobra.
W zawodach předwjeduja tele dny inwenturu. Runočasnje zhotowjeja nowostki za přichodnu sezonu. Te prezentuja w februaru na wikach „Christmasworld“ w Frankfurće nad Mohanom.
