Čěska pruwuwje dodawanje granatow
Praha (dpa/SN). Narodna wěstotna rada Čěskeje chce na swojim posedźenju 7. januara wo přichodźe tak mjenowaneje municiskeje iniciatiwy na dobro Ukrainy rozsudźić. Tole je ministerski prezident Andrej Babiš po posedźenju knježerstwa w Praze připowědźił. Zasadnje je tale iniciatiwa dobra wěc, nastanje pak prašenje, hač je wona bjez korupcije a znjewužiwanja zastojnstwa wotběžała, 71lětny rjekny. Nawoda prawicarsko-populistiskeje ANO bě projekt we wólbnym boju wospjet kritizował.
Wón je zakitowanskemu ministerstwu přikazał, podłožki za skónčenje projekta přihotować. We wobłuku iniciatiwy su Ukrainje dotal 1,8 milionow granatow wulkeho kalibra přewostajili. Granaty pochadźeja z wjacorych krajow. K najwjetšim pjenjezydawarjam słušeja Němska, Danska a Nižozemska.
Ukrainski prezident Wolodymyr Zelenskyj je so na swojim wopyće w Praze za iniciatiwu dźakował a ju jako efektiwnu wuzběhnył. W Praze je minjeny tydźeń nowe knježerstwo nastupiło.
„Wostanjemy putnicy nadźije“
Bamž Leo XIV. wěriwych namołwja – biskopja Němskeje z poselstwom
Rom (dpa/SN). Bamž Leo XIV. je na połnje wobsadźenym Pětrowym naměsće w Romje přiběracy wotstawk mjez bohatymi a chudymi na swěće kritizował. „Bohatstwo swěta leži w rukach małeje skupiny ludźi, jara małeje“, rjekny bamž na swojej poslednjej jubilejnej awdiency w swjatym lěće.
Bohatstwo swěta koncentruje so njesprawnje w rukach tych, kotřiž nochcedźa na žałosćenje swěta a chudych słuchać. Bóh pak je pokłady zemje za wšěch postajił, zo móhli je wšitcy wužiwać. Zdobom bamž ludźi namołwješe, nadźiju njespušćić. „Wostanjemy putnicy nadźije“, wón přitomnym wěriwym přiwoła.
Po hodźoch so swjate lěto nachila, swjate wrota so zaso zawru. W swjatym lěće mějachu wěriwi składnosć, wotpusk za swoje hrěchi zdobyć. Jako prěnje zawru prěni swjaty dźeń hód wrota cyrkwje Santa Maria Maggiore.
6. januara 2026 so swjate lěto oficialnje skónči. Hody 2024 bě ze strowotnymi problemami so hižo chětro bědźacy bamž Franciskus w jězdnym stole sedźo swjate lěto zahajił a swjate wrota Pětroweje cyrkwje wotewrěł.
Našim čitarjam
Hodownych swjatych dnjow dla dóstanjeće přichodne wudaće našeho wječornika póndźelu, 29. decembra.
Redakcija Serbskich nowin
Bjez rumpodicha žana patoržica
Čěšćinarjo hodowne debjenki zhotowili
Budyšin (JŠ/SN). Kurs čěšćiny 11. lětnika měješe tydźenja wosebity wopyt: Čłonce Towarstwa přećelow Serbow, Eliška Oberhelová a Vladimíra Holmanová, předstajištej šulerkam a šulerjam krasnu hodownu rjemjeslnisku tradiciju z Kyrkonošow. Zhromadnje z hosćomaj smědźachu młodostni sami kreatiwni być a filigranu hodownu pychu ze škleńčanych parličkow zhotowić.
Wuměłstwo pyšnych škleńčanych parličkow a parličkow za hodowny štom ma dołhu tradiciju: Hižo we 1870tych lětach wuwi so w Poniklá, małej wjesce w Kyrkonošach, centrum tutoho njewšědneho rjemjesła. 1902 zadomi so tam Stanislav Horna ze swojej swójbu a załoži prěnju manufakturu parličkow. Po Prěnjej swětowej wójnje běchu drobne, z ruku dute ornamenty jara woblubowane a po wšěm swěće předawane. To přewzachu wikowanske firmy w Jablonecu nad Nisu, kiž bě srjedźišćo eksporta debjenkow.
To a tamne (23.12.25)
Zražka z kozu w zwěrjencu zaběraše dźensa sudnistwo w Stralsundźe. Chorobna kasa 63lětneje žony je Ptači park Marlow w Předpomorskej wobskoržiła a žadaše sej 31 000 eurow wotškódnjenja za nastate wudawki za lěkowanje žony. Wona je w zwěrjencu za majkanje padnyła, jako bě koza do njeje bodła. Koleno žony dyrbjachu operować. Chorobna kasa parkej wumjetuje, zo dźerži agresiwne zwěrjata. Tón tole wotpokazuje.
Pozdatny sobudźěłaćer firmy Microsoft je 70lětneho muža w sewjerorynsko-westfalskim Lindlaru wo wjacore tysac eurow wobšudźił. Na wobrazowce jeho kompjutera jewješe so pokiw, zo měł hnydom zazwonić, dokelž so něchtó na jeho konto měri. Sobudźěłaćerjej Microsoft muž swoje kontowe čisło a klučowe hesło zdźěli. Pozdźišo wón zwěsći, zo je so njeznaty na konće posłužował.
Tradicija swjedźenjow
Berlin (B/SN). Hody su křesćanam nimo jutrow a swjatkow wurjadny swjedźeń. Do 1963 traješe hodowny čas w Němskej wot adwenta hač do swěčka Marije 2. februara. Wot 11. lětstotka hraja so hodowne hry, hodowne štomy pochadźeja ze 16. lětstotka, adwentny wěnc wot lěta 1839. Swjaty Mikławš, jako biskop z Myry hižo 1 700 lět 6. decembra dary wobradźa. Hakle Martin Luther, kiž njeje swjatych připóznał, je wobradźenje darow k hodam přez Bože dźěćo zawjedł.
Hody w druhich krajach
Frankfurt n. M. (B/SN). W Americe napjelni 25. decembra rano Santa Claus dźěćace nohajcy z darami. W Awstralskej swjeća partyje a spěwaja hodowne pěsnje na přibrjohu morja. W Chinje zetkawaja so ludźo na naměstach, pyšenych ze swěcami a rumpodichami, dary za dźěći su w nohajcach na žerdźach. Finojo jědźa, po tym zo su w sawnje pobyli, tradicionalnu swinjacu pječeń, w Indiskej pyša město jědle bananowcy abo mangowcy, w Španiskej rejuja wokoło wohenja a jědźa praženeho trutaka.
Kulturne objekty wróćili
Ličba zhubjenych so měnja
Lipsk (dpa/SN). Sta ludźi po wšej Sakskej su tuchwilu zhubjene. Po informacijach krajneho kriminalneho zarjada (LKA) w Drježdźanach bě spočatk decembra 338 padow njerozrisanych. Mjez nimi je 133 młodostnych a 62 dźěći. „Ličby chětro chabłaja a so wšědnje a w běhu krótkeho časa změnja“, rěčnik LKA w Drježdźanach na naprašowanje zdźěli.
Kóždy dźeń so ludźo pola policije přizjewja, dokelž za někim pytaja. Často móža zastojnicy pady spěšnje rozrisać. Potrjechene su wšitke starobne skupiny – młodostni, kotřiž wot doma ćeknu abo starši chori ludźo, kotřiž puć domoj njenamakaja. Za wosobami, kiž njejsu hišće połnolětne, policija hnydom intensiwnje a z wulkej wobstatku pyta, dokelž strach wo jich žiwjenje wobsteji. W aprylu bě so 12lětna w Oschatzu zhubiła. Zastojnicy w Sakskej su wusko z kolegami w Braniborskej hromadźe dźěłali a holcu dźeń po tym w Želmje (Baruth)/Mark namakali. W awgusće bě 13lětny hólc ze swójbu we Łazu na campingowanišću přenocował a so zhubił. Něhdźe 100 policistow je za nim pytało. Po dwěmaj dnjomaj nańdźechu ćěło při železniskej čarje.
Tysac podhladnych trutow
Berlin (dpa/SN). Zwjazkowy kriminalny zarjad (BKA) je lětsa hač dosrjedź decembra wjele podhladnych trutow registrował. „Wot spočatka lěta wjedźemy tak mjenowany ‚aktualny wobraz połoženja‘ ze wšěmi datami podhladnych pohibow w powětře. Zapřijamy tež daty zwjazkoweje wobory. Lětsa smy wjace hač tysac trutow zličili“, rjekny prezident BKA Holger Münch nowinje Bild. Wojerske objekty, lětanišća a kritiska infrastruktura su najbóle potrjechene.
Twarja nowy lětadłonošak
Paris (dpa/SN). Francoska twari wotnětka nowy, wot atomoweho reaktora ćěrjeny lětadłonošak. Wón budźe 310 metrow dołhi, 85 metrow šěroki a změje městno za 30 bojowych lětadłow a 2 000 matrozow. Z něhdźe 80 000 tonami budźe dwójce tak ćežki kaž předchadnik „Charles de Gualle“. „W času agresorow dyrbimy sylni być, zo bychu so nas bojeli. Sym rozsudźił, Francosku z nowym lětadłonošakom wuhotować“, zdźěla prezident Emmanuel Macron.
Měrja so na dalši tankowc
