Kretschmer: Tak njeńdźe dale
Berlin (dpa/SN). Sakski ministerski prezident Michael Kretschmer (CDU) žada sej po wólbnych wuspěchach AfD na wuchodźe Němskeje wot amploweje koalicije zwjazkoweho kanclera Olafa Scholza (SPD), ale tež wot swójskeje strony jasnu změnu dotalneje politiki. „Kraj trjeba stabilnu demokratiju, kotraž problemy ludźi rozrisa“, rjekny Kretschmer dźensa do posedźenja nawodnistwa CDU w Berlinje. Na nim wobdźěli so tež prezidentka komisije EU Ursula von der Leyen.
Gantz wopušći knježerstwo
Tel Aviv (dpa/SN). Wšelakich měnjenjow přichoda Gazaskeho pasma dla wopušći minister Benny Gantz nuzowe knježerstwo w Israelu, kotrež běchu po terorowym nadpadźe Hamas 7. oktobra wutworili. Gantz bě tež čłon wažneho wójnskeho kabineta. Israelske knježerstwo pak wotstup Gantza njepowali: Ministerski prezident Benjamin Netanjahu ma ze swojim prawicarsko-nabožnym kabinetom dale wjetšinu w parlamenće.
Rozdźělenje přetorhnjene
Přewšo spokojom je pólski ministerski prezident Donald Tusk ...
Le Pen a Meloni wuspěšnej
Paris/Rom (dpa/SN). Prawicarsko-narodna strona Rassemblement Nationale politikarki Mariny Le Pen je jasna dobyćerka europskich wólbow w Francoskej. Skeptikarjo napřećiwo EU su sej po dotalnym wuličenju 31,36 procentow hłosow zdobyli. Lisćina prezidenta Emmanuela Macrona a toho zwjazkarjow přińdźe ze 14,6 procentami na bjezwuhladne druhe městno. Jako reakciju na poražku je Macron hišće wčera parlament rozpušćił a nowowólby 30. junija wukazał.
W Italskej je prawicarska ministerska prezidenta Giorgia Meloni ze swojej stronu Fratelli d‘Italia europske wólby dobyła. Najwjetša knježerstwowa strona dósta 28,9 procentow. Z tym leži wona jasnje před wšěmi druhimi politiskimi mocami. Meloni chce swój wliw na europskej runinje zesylnić a spjećuje so prezidentce komisije EU Ursule von der Leyen.
Söder žada sej nowowólby
AfD w Sakskej cyle jasnje dobyła
Drježdźany (dpa/SN). Wólby Europskeho parlamenta je AfD w Sakskej z jasnym předskokom dobyła. Po wuličenju wšitkich hłosow dźensa rano docpěwa wona 31,8 procentow a je porno 2019 (25,3 procenty) jasnje přidobyła. Tež we wulkoměstach kaž Lipsku, Kamjenicy a Drježdźanach je AfD najsylniša móc.
Hakle z widźomnym wotstawkom slěduje strona ministerskeho prezidenta Michaela Kretschmera, CDU, z 21,8 procentami a ma tak hišće mjenje hač 2019 (23 procentow). Jasnje dobył je tež politiski nowačk w Sakskej: Zwjazk Sahry Wagenknecht je sej 12,6 procentow hłosow zdobył.
Strona zwjazkoweho kanclera Olafa Scholza, SPD, dóstanje jenož 6,9 procentow. Dalši koaliciski partner Zeleni ma 5,9 procentow, Lěwica ma 4,9 procentow.
Krajny předsyda AfD Jörg Urban je z wólbnym wuslědkom přewšo spokojom. Jemu je wažne, zo su „zeleni ekosocialisća dramatisce přisadźili“. Předsydka Zelenych Anna Cavazzini chce špatny wuslědk strony „dokładnje analyzować“.
Unija najsylniša – Zeleni słabi
Wólby Europskeho parlamenta politiski spektrum na prawo přesunyli
Berlin (dpa/SN). Jasne dobyće za CDU, plista za amplowu koaliciju, jasne polěpšenje AfD: Při wólbach Europskeho parlamenta je so politiska waha Němskeje do prawicarskeho směra přesunyła. AfD je mjeztym druha najsylniša móc w Němskej, we wuchodźe samo najsylniša. SPD, Zeleni a FDP dyrbja jasne straty na so wzać a docpěja zhromadnje runje hišće třećinu wšěch wolerskich hłosow. Tež Lěwica je zwrěšćiła, dokelž je ju nowy Zwjazk Sahry Wagenknecht přesćahnyła.
Kaž je zwjazkowy wólbny nawoda dźensa rano zdźělił, je so unija CDU/CSU snadnje na 30,0 procentow (2019: 28,9) polěpšiła. AfD docpěwa ze 15,9 procentami swój dotal najlěpši wuslědk w cyłoněmskim wothłosowanju (2019: 11). Na wuchodźe Němskeje je strona z wulkim wotstawkom najsylniša móc. SPD, kotraž bě so we wólbnym boju na nahladnosć zwjazkoweho kanclera Olafa Scholza spušćała, je na 13,9 procentow spadnyła (2019: 15,8). Je to najšpatniši wuslědk při cyłoněmskich wólbach scyła. Zeleni dóstanu jenož hišće 11,5 procentow (20,5). Jenož snadnje přisadźiła je FDP, kotraž dóstanje 5,2 procentaj (5,4).
Menetekl za krajny sejm
Wobnowjenje demokratije trěbne
Drježdźany (BD/SN). Dowěra do politiki stronow z wulkej parlamentariskej tradiciju so dale a bóle drjebi. Pod tym ćerpi demokratija, kotraž měła so wobnowić – a to ze sylnišimi prawami a formami soburěčenja cyłeje ludnosće. Wo tym bě sej derje wopytane rozmołwne koło přezjedne, kotrež bě so na přeprošenje socialdemokratiskich jednotkow z Łužicy a sakskeje krajneje stolicy minjeny pjatk w Drježdźanskim Chinskim pawiljonje zešło. Pod moderaciju Astrid Riechmann, předsydki SPD w Budyskej měšćanskej radźe, rozjimachu juristisce zdźěłani eksperća staw a wuhlady kaž tež strachi a mjezy tak mjenowaneje direktneje demokratije.
Hapag: Atomowe reaktory za łódźe
Hamburg (dpa/SN). Nawoda sobu najwjetšeho łódźniskeho předewzaća swěta Hapag-Lloyd, Rolf Habben Jansen, móhł sej k docpěću klimowych zaměrow předstajić, zo pojědu wulke kontejnerowe łódźe přichodnje z atomowymi reaktorami. „Tajke reaktory maja wěsty potencial, dokelž přinošuja k redukowanju wuhlikoweho dioksida“, rjekny 57lětny časopisej Spiegel. Prawdźepodobnje by tole tež kóšty znižiło, dokelž móhli łódźe potom zaso tróšku spěšnišo jěć. „Njesměli tole wuzamknyć, dołhož njejsmy to dokładnje přepytowali“, wón rjekny.
Hapag-Lloyd chce motory swojich łódźow hač do lěta 2024 na klimje přichilene systemy přestajić. Zo bychu ćěriwo lutowali a wustork wuhlikoweho dioksida znižili, jědu łódźe hižo nětko pomałšo. Nimo toho koncentruje so koncern na wuslědźenje a wobstaranje „zelenych ćěriwow“ kaž ekologisce zhotowjeneho methanola. Moderne nuklearne reaktory njejsu přirunujomne z wulkimi připrawami lětadłonošakow. Jich wuslědźenje pak hišće traje. Hapag-Lioyd wobsedźi 266 kontejnerowych łódźow a transportuje 12 milionow kontejnerow wob lěto.
To a tamne (10.06.24)
Najwjetšu Božu słužbu motorskich su wčera w Hamburgu swjećili. Něhdźe 3 000 ludźi ze swojimi mašinami su wosrjedź města zličili. Minjene lěta bě wjace hac 20 000 wobdźělnikow přišło. Lětsa pak dyrbjachu twarskich dźěłow na awtodróze 7 dla tradicionalny korso motorskich po měsće wotprajić. Tuž bě mjenje ludźi přišło. Božu słužbu motorskich swjeća w Hamburgu wot 1980tych lět.
Ćeknjena kruwa je w badensko-württembergskim Balingenje za kolesowarjom hač na toho ležownosć běžała. Jako muž do pincy dźěše, kruwa jemu tež po schodach slědowaše. Přiwołana policija zwěsći, zo steji zwěrjo přeco hišće w pincy. Do toho bě wona po šulskim dworje błudźiła. Wobsedźer móžeše howjado přeswědčić, pincu wopušćić a na připowěšak zalězć. Načinjenu škodu w pincy trochuja na wjacore sta eurow.
