Wurjadny pósłanc USA w Krjemlu
Moskwa (dpa/SN). Wurjadny pósłanc USA Steve Witkoff je wčera do ruskeje stolicy Moskwy dolećał. Tam wočakowaše jeho dźensa prezident Wladimir Putin k rozmołwam wo skónčenju wójny w Ukrainje. Zetkanje wobeju bě popołdnju planowane, nowiny rozprawjeja.
Předwčerawšim, njedźelu, bě so ukrainska delegacija ze zastupjerjemi USA w Floridźe zetkała. Při tym so pokaza, zo wostanje tójšto prašenjow njerozrisanych. Hłowna tema je 28 dypkow wopřijacy měrowy plan USA, kiž ma nimale štyri lěta trajacu wójnu w Ukrainje skónčić. Zapadni politikarjo běchu plan jako „lisćinu ruskich přećow“ kritizowali. Wosebje bolostnje začuwa Ukraina žadanja Ruskeje za dospołnej kontrolu štyrjoch ukrainskich prowincow.
Ruske wójsko wozjewja, zo je strategisce wažne ukrainske město Pokrowsk w kónčinje Donjecka po lěto trajacych wojowanjach zdobyło. Wobkedźbowarjo widźa powěsć w zwisku ze zetkanjom Putina a Witkoffa: Krjeml chce pokazać, zo ma wojersku iniciatiwu a wuspěch.
Tusk: Chwatajće, čas ćěka!
Na němsko-pólskich konsultacijach wo wotškódnjenju woporow rěčeli
Berlin (dpa/SN). Pólska je Němsku namołwjała, nastupajo wotškódnjenje hišće žiwych woporow němskeje okupacije za čas Druheje swětoweje wójny spěšnje jednać. „Chwatajće, jeli chceće tole woprawdźe činić. Čas ćěka“, rjekny ministerski prezident Pólskeje Donald Tusk po němsko-pólskich knježerstwowych konsultacijach w Berlinje na nowinarskej konferency ze zwjazkowym kanclerom Friedrichom Merzom (CDU).
Pólski ministerski prezident na to pokaza, zo ličba hišće žiwych woporow němskeho nacionalsocialistiskeho terora spochi woteběra. Jako bywši kancler Olaf Scholz w juliju 2024 tajku podpěru přilubi, bě w Pólskej po informacijach Załožby za němsko-pólske wujednanje hišće 60 000 woporow žiwych, mjeztym je jich hišće 50 000. „Jeli so naležnosć bórze njerozrisa, rozsudźu klětu, zo Pólska tute prašenje ze swójskimi srědkami zrjaduje“, Tusk rjekny.
Spěšnišo planować
Potrěbni na hosćinu prošeni byli
To a tamne (02.12.25)
Na raka schorjeny moderator Thomas Gottschalk njeje po słowach swojeje žony Kariny k lěkarjej hić chcył. Spočatk julija je jej switało, zo z jeje mužom něšto njetrjechi. „Thomas bě přiběrajcy měrny a blědy a dyrbješe často na nuznik. Tajkeho jeho njeznajach.“ W Mnichowskej chorowni raka zwěsćichu a Gottschalka hnydom operowachu. 75lětny bě nowinarjam njedawno přeradźił, zo je chory. Nětko čaka zhromadnje ze žonu na wuslědk dalšich přepytowanjow.
Skupinu třoch padušnicow je policija w sewjerorynsko-westfalskim Hammje lepiła. Swědkojo běchu wobkedźbowali, kak žony při durjach susodneho domu klinkaja a po tym do zahrody du. Jako policija dojědźe, spytachu žony přez płót ćeknyć, čemuž zastojnicy zadźěwachu. Padušnicy běchu 14, 16 a 24 lět stare. Posleńca – zadnje durje domu – bě wobškodźena.
Z Yad Vashem kooperować
Jerusalem (B/SN). Durinski ministerski prezident Mario Voigt je na swojej jězbje do Israela daloko sahacu kooperaciju z wopomnišćom holocausta Yad Vashem doporučił. Nimo wuměny wučerjow by zhromadne dźěło z wopomnišćom w Buchenwaldźe blisko Weimara spomóžne było. 1937 zarjadowa SS pod nawodom Heinricha Himmlera tute koncentraciske lěhwo, kotrež sta so ze synonymom za nacionalsocialistiske złóstnistwa.
Přećiwo hidźe zakročić
Brüssel (B/SN). Po słowach biskopskeje konferency Europskeje unije (COMECE) ma so přećiwo přiběracej intolerancy a hidźe konsekwentnišo zakročić. Na posedźenju frakcije přesahowaceje dźěłoweje skupiny w Europskim parlamenće žadaše sej zastupowacy generalny sekretar A. Calcagno zasadźenje koordinatora. Loni bu 2 211 antikřesćanskich padow hidy a 274 nadpadow registrowanych.
Měrowy zwón w Jerusalemje
Twarcy brónjow wyskaja
Stockholm (dpa/SN). Sto najwjetšich brónjenskich koncernow swěta je lěta 2024 rekordne dochody 679 miliardow dolarow (585 miliardow eurow) nadźěłało. Tole wuchadźa z noweje rozprawy Stockholmskeho měroweho slědźenskeho instituta Sipri. To je najwyši hdy registrowany dobytk. Swoje dochody su tež štyrjo wodźacy twarcy brónjow w Němskej stopnjowali: Rheinmetall, Thyssen-Krupp, Hensoldt a Diehl. Jich plus wučinja 36 procentow.
Spahn warnuje před blokadu
Berlin (dpa/SN). Předsyda frakcije CDU/CSU Jens Spahn je před negatiwnymi sćěhami móžneho zwrěšćenja rentoweje reformy knježerstwa CDU/CSU a SPD warnował. W padźe wotpokazanja njemóhło zwjazkowe knježerstwo dale činić, jako njeby so ničo stało, rjekny Spahn w sćelaku ARD. Potom bychu zdobom projekty kaž wobydlerski pjenjez, migracija a energijowa politika blokowane byli. Tuchwilu pak njeje w zwjazkowym sejmje žaneje alternatiwy, je sej Spahn wěsty.
Maduro: USA chcedźa naš wolij
Dospołnje zludani steja ludźo w Hongkongu před wupalenymi ...
Nowa młodźinska organizacija AfD
Nadźija na měr w Ukrainje
Washington (dpa/SN). Prezident USA Donald Trump je so po wuradźowanjach zastupnikow Ukrainy ze swojim knježerstwom wo móžnosćach za skónčenje wójny w Ukrainje optimistiski wuprajił. Wón je sej wěsty, zo su wuhlady na měrowe rozrisanje, kotrež by wšitkim wobdźělenym dobry kompromis był, dosć dobre. Porno tomu zwurazni wonkowny minister USA Marco Rubio, kiž bě so na jednanjach wobdźělił, zo je „hišće wjele dźěła“. Zwjazkowy wonkowny minister Johann Wadephul (CDU) je kedźbliwy, ale optimistiski: „Smy nětko w rozsudnym tydźenju“, rjekny wón w sćelaku ARD.
Trump je sej wěsty, zo chcetej Ruska kaž tež Ukraina wójnu skónčić. Jeho zastupnik Steve Witkoff pojědźe tutón tydźeń do Moskwy do Krjemla.
