Na kóncu zarjadowanja wčera sej Sieghard Kozel a Axel Arlt přeještaj, zo so něchtó namaka, kiž stawizny serbskeho nowinarstwa raz porjadnje přeslědźi. Zajimawy to nadawk, wšako tole dotal nichtó činił njeje. Jako pak so jeju přitomni prašachu, hdźe su wotpowědne dokumenty składowane, dyrbještaj wobaj přiznać, zo tute hišće w priwatnymaj archiwomaj chowataj. Po přewróće je so potajkim tójšto zhubiło. A Bóh wě, kelko dokumentow su zamołwići tehdy zničili. Zajimawe wšak je, zo so nětko, nimale 40 lět po kóncu NDR, zjawnje wo censurje a wašnju dźěłanja w Nowej dobje rěči. Hišće zajimawše, zo sej ći, kiž drje běchu prawdźepodobnje tehdy tarč a mječ strony, nětko swoje stawizny pisaja. Za diskusiju wo stawiznach stej stajnje znajmjeńša dwě perspektiwje trěbnej. Tych, kiž bychu liniji tehdyšeho wjednistwa redakcije znapřećiwili, pak wčera nichtó přeprosył njeje. Škoda, wšako je dźeń a mjenje ludźi, kiž móža so k tomu wuprajić. Maximilian Gruber

Jědojty płun fosfin su w Istanbulu w hotelowej stwě zemrěteje Hamburgskeje swójby našli. Maćiznu su na meblach kaž tež na trjenjach hotela zwěsćili. Hač je płun smjerć swójby woprawdźe zawinował, njeje přiwšěm hišće dopokazane. Přećiwo škódnikam zasadźuja často aluminiumowy fosfit. W zwisku z włóžnotu powětra wuwiwa so jědojty fosfin. Zo je so swójba z jědźu zajědojćiła, fachowcy mjeztym wuzamkuja.

Wopačne zapodaće do nawigaciskeho nastroja je w Bayerskej zasadźenje policije zawinowało. Dźěłaćer z Durinskeje chcyše po bencin jěć. Přez misnjenje pak njewodźeše jeho nawi do dźewjeć kilometrow zdaleneho Neukirchena pola Sulzbacha, ale do 116 kilometrow zdaleneho Neukirchena w Čornym lěsu. Dokelž bě tež aku jeho telefona prózdny, wołachu kolegojo policiju. Hakle po pjeć hodźinach tu 58lětny zaso bě.

Wojerecy (AK/SN). Dobrowólni a čestnohamtsce angažowani su rjap demokratije. „Dyrbimy wo demokratiju a wo zhromadnosć wojować. Za to trjebamy mnohostronske městnosće za zetkawanje“, wuzběhny zwjazkowy prezident Frank-Walter Steinmeier wčera we Wojerecach. We wobłuku rjada „Rumnosće zetkawanja“ wopyta wón wobydlerski centrum a tamnišu Kulturnu fabriku. Jednaćel Uwe Proksch, Wojerowski wyši měšćanosta Torsten Ruban-Zeh (SPD) a sakska ministerka za kulturu a turizm Barbara Klepsch (CDU) jeho witachu.

Zwjazkowy prezident so do złoteje knihi města zapisa. Rozmołwjał je so Steinmeier z čłonami młodźinskeje měšćanskeje rady, ze zastupjerjemi kofejownje „repair“, z akterami Nowoměšćanskeho foruma a ze zamołwitej za serbske naležnosće Dianu Karbowej.

Dźěłowa skupina słowjanskich mjeńšin FUEN (AGSM) je so minjeny tydźeń w měsće Nova Gorica/Gorizia schadźowała. Słowjenska mjeńšina z Italskeje bě hosćićel zeńdźenja. Nimo předsydy AGSM dr. Hartmuta Leipnera staj so na nim ze stron Serbow referent Domowiny Clemens Škoda a čłon zwjazkoweho předsydstwa Beno Bělk wobdźěliłoj.

Nova Gorica/Gorizia (SN). Čłonojo dźěłoweje skupiny AGSM zaběrachu so sobotu, třeći dźeń schadźowanja, wosebje ze słowjanskimi mjeńšinami, z jich situaciju a wužadanjemi. Tak předstaji so nowy sobustaw, ukrainska mjeńšina w Madźarskej, kotraž nětko swoje šule wudźeržuje a swoje prócowanja na kulturnym a rěčnym polu z podpěru madźarskich statnych instancow wutwarja.