Na wšěch 59 kuskow butry je policija we wačoku třoch paduchow w Podstupimje namakała. Trójka bě nimale 15 kilo­gramow butry do wačoka tyknyła a so z kupnicy zminyła. Kedźbliwy kupc bě tole wobkedźbował. Přiwołana policija skućićelow njedaloko kupnicy zaja. Mužojo su policiji druhich padustwow dla derje znaći. Nětko ma sudnik rozsudźić, hač dyrbja do jastwa. Što cwólba z telko butru chcyše, njeje znate.

Ćeknjenu kruwu su po wjacorych měsacach błudźenja na brjoze jězora w hornjej Bayerskej popadnyli. Arielle, kaž ju pomocnicy mjenuja, je mjeztym na statoku organizacije za škit zwěrjatow. Kruwa bě před poł lětom z pastwy ćeknyła a žiworješe na kromje jězora. Wšitke pospyty, skoćo popadnyć, běchu zwrěšćili. Tuž ju nětko z třělbu pohłušichu. Zamołwići so bojachu, zo wona zymu njepřetraje.

Dr. Peter Reuss, kotryž je wot spočatka winowca wulkopósłanc Němskeje w Praze, je wčera Serbski seminar wopytał, zo by so wo stawiznach Serbow a jich stykach z Čechami informował.

„Dołhož Sakski kontaktny běrow w Praze eksistuje, je to prěni raz, zo je wulkopósłanc sam přeće a zajim jón wopytać zwuraznił“, rjekny nawodnica běrowa Josefina Ofner. Studowany stawiznar Reuss, kiž bě so 1964 w Freiburgu w Breisgauwje narodźił, bě dotal mjez druhim wulkopósłanc w Turkowskej a zastupowaše Němsku pola UNESCO w Parisu. Ofner rozprawja, zo je hnydom po nawjazanju kontakta a prěnjej rozmołwje wo termin w Hórnikowej knihowni prosył. Zastupjerka předsydy čěskeho towarstwa přećelow Serbow Společnost přátel Lužice (SPL) Eliška Oberhelová praji: „Zawěsće je hižo někotry wulkopósłanc Serbski seminar wopytał. Ale wón je najskerje prěni, kotryž je hnydom stawizny Serbow a jich zwisk z Čechami zrozumić chcył.“ Połdra hodźiny jeho předsyda SPL Lukáš Novosad po domje wodźeše.

Drježdźany/Podstupim (SN). Přećiwo planowanemu zawjedźenju woborneje winowatosće, wo kotrymž zapósłancy zwjazkoweho sejma jutře rozsudźa, chcedźa młodostni po cyłej Němskej samsny dźeń protestować a to z tym zo so na šulskej wučbje njewobdźěla. K tutej akciji namołwja zwjazkarstwo „Šulski stawk přećiwo wobornej winowatosći“. W Sakskej su dotal protestne akcije w sydom městach přizjewjene, mjez druhim w Drježdźanach, Lipsku a Kamjenicy. W Braniborskej chcedźa so šulerjo w Podstupimje a Choćebuzu na akciji wobdźělić. W namołwje zwjazkarstwo pisa: „Nochcemy poł lěta našeho žiwjenja w kasernach zawrjeni być, zo bychu nas tam k podwólnosći kubłali a nas morjenje nawučili. Wójna žana perspektiwa do přichoda njeje“. Protesty njeměrja so jenož přećiwo wobornej winowatosći, ale tež zasadnje přećiwo nanućenym winowatostnym słužbam. Kultusowe ministerstwa krajow pak skedźbnjeja na winowatosć wopyta šule. Zamołwići smědźa šulerjow jenož we wosebitych wuwzaćach wot wučby wuswobodźić. Wobdźělenje na demonstraciji k tomu njesłuša.

Drježdźany (dpa/SN). Na swoje poslednje posedźenje w tutym lěće je so Sakski krajny sejm dźensa zešoł. Na próstwu ­Zelenych debatowachu wo zakazu silwesterskich praskotakow. Zeleni chcedźa zwěrjata, sobudźěłaćerjow wuchowanskich słužbow a přirodu lěpje škitać. Lěwica diskutowaše wo renće a CDU wo modernizowanju stata. Dalše temy běchu lěkarske zastaranje w swobodnym staće a wuskutki titula Europskeje kulturneje stolicy za Kamjenicu.

Trump za transparencu

Washington (dpa(SN). Prezident USA Doland Trump chcył widejo wo nadpadźe mariny USA na pozdatny čołm drogowych kurěrow w Karibice wozjewić. Při tym běchu dweju přežiwjeneju zaměrnje morili. Na to bě diskusije wo tym wudyriła, hač bě nadpad w mjezynarodnych kónčinach morja a zaměrne morjenje ludoprawnisce w porjadku. Zakitowanski minister Pete Hegseth je připowědźił, zo USA z tajkimi nadpadami pokročuja.

Netanjahu so wukaza njeboji