„Online first“ je strategija mnohich
Cziksereda (SN/MG). Na swoje kóždolětne schadźowanje bě zwjazk europskich dźenikow mjeńšinowych a regionalnych rěčow (MIDAS) lětsa do Rumunskeje přeprosył. Madźarska mjeńšina wučinja tam, w regionje Harghita, na wšěch 86 procentow ludnosće. Kónčina kraja, kotraž rěka Transilwaniska, bě historisce dołho dźěl Madźarskeje, doniž so po Prěnjej swětowej wójnje Rumunskej njepřirjadowaše. Najwjetša madźarska nowina w tutej kónčinje rěka Harghita Nepe, kotraž bě zdobom hosćićelka zetkanja. Žurnalisća ze wšeje Europy so na štyridnjowskim zetkanju wobdźělichu. Nimo madźarskeje mjeńšiny zaběrachu so woni wosebje tež ze situaciju dźenikow po wšej Europje, kaž tež z temu fake news. Kak hodźeli so młódši čitarjo tohorunja za dźeniki wabić, tež to woni diskutowachu. Jasne wuwidźeć bě, zo sćěhuje najwjace nowinow strategiju „online first“, štož woznamjenja, zo so powěsće najprjedy digitalnje a pozdźišo w ćišćanej nowinje wozjewjeja.
Měrowe myto Nawalnyjej
Drježdźany (dpa/SN). Znatemu politikarjej ruskeje opozicije Aleksejej Nawalnyjej su wčera, njedźelu, posthum prěnje Mjezynarodne Drježdźanske měrowe myto spožčili. Toho wudowa Julija Nawalnaja je 10 000 eurow hódne myto přijimowała. Bywši zwjazkowy prezident Joachim Gauck wopominaše skutkowanje Nawalnyja. Kritikar ruskeho prezidenta Wladimira Putina bě 16. februara w sibirskim chłostanskim lěhwje zemrěł.
Israel chce so dale wobarać
Tel Aviv (dpa/SN). Israelski statny prezident Isaac Herzog je wčera wječor na kóždolětnym wopominanskim dnju za padłych wojakow a wopory terorizma wolu Israela na samopostajowanje wobkrućił. „Dopominam nas a wšón swět na to: Tutu surowu wójnu nihdy nochcychmy“, rjekny wón na centralnym zarjadowanju w Jerusalemje. „Dołhož pak chcedźa nas njepřećeljo zničić, mjeć z rukow njepołožimy“, Herzog praji.
Iran za nowe jednanja z USA
Zwjazkowy prezident Frank-Walter Steinmeier (srjedźa) je wčera ...
AfD wostanje podhladny pad
Zakitowanski minister pušćeny
SPD a Zeleni šwikaja plany FDP
Wolóženja na dobro ratarjow
Europska unija reaguje z naprawami na protesty europskich burow
Brüssel (dpa/SN). Čłonske staty Europskeje unije chcychu dźensa doskónčnje dalše wolóženja na dobro ratarjow wobzamknyć. Po wulkich a zdźěla namócnych protestach burow we wjacorych europskich krajach su so institucije EU mjez druhim na to dorozumili, ratarjam wolóžene směrnicy nastupajo škit přirody přizwolić a wšelake kontrole wotstronić. Prezidentka komisije EU Ursula von der Leyen bě wotpowědne namjety předpołožiła. Parlament EU bě změny hižo před třomi tydźenjemi wotžohnował.
We wurjadnym ratarskim wuběrku běchu so čłonske kraje EU hižo minjenu srjedu za wolóženja wuprajili. Nětko dyrbja ratarscy ministrojo krajow tomu hišće přihłosować. Němska bě so srjedu při wothłosowanju hłosa wzdała.
Hamtski „ženje wjac“
Přistup Čěskeje a Pólskeje k EU před 20 lětami Serbja wobrubili
„Radosć a nadźije na jednotu Europu“ takle titulowachu Serbske Nowiny přistup dźesać nowych krajow k Europskej uniji 3. meje před dwaceći lětami. „Historiski dźeń“ woswjeći so cyły kónc tydźenja na wosebite wašnje w třikrajowym róžku Němska-Pólska-Čěska, mjez městami Žitawa, Bogatynia a Hrádek nad Nysu. Na kóždym krajnym dźělu předstajichu wopytowarjam krajej wotpowědowace kulturne programy a k tomu poskićachu kulinariske wosebitosće. Dopołdnja hižo je na čěskim jewišću Serbska rejwanska skupina Smjerdźaca a wječor we wulki němskim stanje wustupiła, SN pisachu
To a tamne (13.05.24)
Jiří Korn – rady widźany hósć legendarneje telewizijneje show NDR „Kotoł pisaneho“ hotuje so na swoje 75. narodniny, kotrež woswjeći pjatk, 17. meje. Najebać to steji nadarjeny multitalent dale na jewišću. Hakle w februaru pjelnješe w Čěskej dale woblubowany star w Praze cyłu halu ze swojimi přiwisnikami. Korn jenož njespěwa, ale je tež dźiwadźelnik. Njedawno měješe hłownu rólu w bajkowym filmje a wustupuje prawidłownje w Praskim hudźbnym dźiwadle Karlin.
Plyšowa hrajka je wčera we Wiesbadenje zasadźenje policije zawiniła. Dospołnje rozpjeršeny muž bě 150 centimetrow wulkeho pozdatneho hada na parkowanišću nakupowanišća wuhladał a nuzowe čisło wolił. Zastojnikam skićeše so spočatnje samsny wobraz. Spěšnje pak so wukopa, zo jednaše so wo plyšowu hrajku. „Strašneho hada“ popadnychu.
