Leandra Nowakec (12): Wječorna disko a wšěd­ne skupinske wubědźo­wa­nja so mi jara lu­bja. Lětsa je hłowny skupinski ­nadawk hudźbny widejo k serb­ske­mu spěwej wjer­ćeć, štož wjele wjesela wobradźa. Wo lěhwje sym wot swojich pře­ćelkow zho­niła, kotrež hižo loni tu běchu a wo ­tójšto wjeselu rozprawjachu.
Antonio Gruber (9): Mi so tu lubi, zo mó­žu swój prózdnin­ski čas z pře­ćele­mi doži­wić, so z nimi rozmołwjeć a zo to tu wšitko w serbskej rěči wotběži. Přijěł sym sem, dokelž staj mojej bratraj tež tu.
Marija Nukec (10): Sym tu, dokelž staj mojej bratr a so­tra tež tu a mi so tu jara lubi. Fajn je tež, zo je kóždy swójsku blešu dóstał, kotruž móžemy sej w kafeteriji přeco zaso znowa z wodu abo čajom napjelnić.
Hanka Fryčec (10): Sym hižo druhi raz w lěh­wje, zho­ni­ła sym wo nim wot swojich bratrow. Mjer­zace je lětsa, zo nje­mó­že­my ža­ne lěsne běhi přewjesć, dokelž njesměmy do lěsa. Za to pak činja mi skupinske dźěła a wubě­dźo­wa­nja jara wulke wjeselo, tež, hdyž njejsmy najlěpša skupina.
Patricia ­Dittrichec (11): Sym mjez­tym druhi króć tu a naj­lě­pje so mi zhromad­nosć w na­šej skupinje lubi.

Hnydom wot spočatka: woprawdźiteho mamuta, ewolucionarneho předchadnika nam dźensa znateho elefanta, w Protečanskej mamutowej zahrodźe nichtó namakać njebudźe. Tam mjenujcy tajkeho nimaja. Chiba jako maskotku noweje atrakcije w Halštrowskim wjesnym dźělu Protecy. Štož namakaš, su mamutowe štomy, kotrež swojemu mjenu wšu česć činja. Přetož wone móža jara wulke narosć a wysoku starobu docpěć. Zajimcy pak nachadźeja w nowej botaniskej zahrodźe tež wšelke botaniske žadnostki ze wšěch kóncow swěta. Tak mjez druhim 300lětny wolijowc z mjenom „Old Lady Olivia“, złotu cedru z Himalaje abo andiske jědle ze Chile a z Argentinskeje. Hakle krótko do wotewrjenja zesadźane buchu wysoke japanske Sawara-cypresy, kotrež dyrbja tohodla hišće z powjazami stabilizować. Jörg Kohout, mějićel štomownje ze samsnym mjenom, je ju z jedneje ze swojich pućowanjow po swěće sobu přinjesł a w štomowni plahował.

Kak ze stawizny wjeski Miłoraz wopisowacymi objektami wobchadźeja

Sewjernje Slepoho, mjez Lěšćanskim a Dźěwinskim pućom, nastawa Nowy Miłoraz. Hač do lěta 2024 ma přesydlenje wobstejaceje wsy Miłoraz wotzamknjene być. Wo to prócuje so předewzaće Łužiska energija a milinarnje (LEAG), kotrež wothłosuje so z Trjebinskej gmejnu, z wobdźělenymi wobydlerjemi a gmejnu Slepo, kotraž budźe nowa domizna za přesydlenu wjes Miłoraz. W Miłorazu, kotryž bu w lěće 1377 prěni raz naspomnjeny, namakamy dopomnjenske hódnoty a tójšto twarjenjow pod pomnikoškitom. „W lisćinje kulturnych pomnikow Swobodneho stata Sakskeje je 19 twarjenjow we wosom objektach zapisanych“, wuswětla referentka za zjawnostne dźěło kaž tež medijowa a wobydlerska społnomócnjena Sakskeho krajneho zarjada za hladanje pomnikow Sabine Webersinke. „Hladajo na kulturne pomniki jedna so wo wojerski pomnik, wo jednotliwe twarjenja kaž kładźite bróžnje, bydlenske domy w klinkerowym stilu a wo štyri burske statoki.“

Rentnar a što potom – wuměnkarsku swobodu wužiwać abo wužadanje přiwzać (37)

Ličby su abstraktne matematiske objekty, kotrež su so w stawiznach čłowjestwa z předstawow wo wulkosći a mnóstwje wuwili. Tola nic jenož matematika, tež fundament stawizniskeje wědy su daty a ličby. Woboje, matematika a stawizny, běštej a wostanjetej bytostna zaběra wuměnkarja, Eckharda Klimana.

Kolebka agilneho Wudworčana steješe před 70 lětami w Biskopicach. Wot 1953 bydleše swójba we Wudworju, hdźež zastupi Eckhard 1958 do šule we Worklecach. Po wuspěšnym złoženju abitury na Kamjenskej rozšěrjenej wyšej šuli studowaše wón pedagogiku a bě hač do wuměnkarskeje staroby wučer za matematiku we Worcynje, w Budyšinje a Pančicach-Kukowje. Z lěta 1974 je z Jadwigu Kmjećec woženjeny. Jimaj narodźištej so dwě dźěsći. Eckhard, kotryž je sej mjeztym serbšćinu poměrnje derje přiswojił, jara na to dźiwaše, zo buštaj wobaj synaj serbsce kubłanaj.