Poskitk z dožiwjenjemi pjelnjeny był
Zo Radworčenjo dobru mjezsobnosć haja, stej njedawno młodźinski klub a staršiska iniciatiwa dopokazałoj, přihotujo wosebity poskitk swójbam. Najprjedy přewjedźe něhdźe 30 dźěći z młodostnymi přezpólnu hru po sydom stacijach. Hromadźe honjachu mjez hrodom a Radworskej kupu, zo bychu pokład knježka Rudija pytali. Na kóždej ze stacijow namakachu pokazki na pokład. To bě wulke wjeselo! A jako započa so ćmičkać, zalězechu sej dźěći na přihotowane konopeje, zo bychu sej „Šmjatańcu w raju bajkow“ wobhladali. Wo kinowu atmosferu prócowachu so młodostni. Woni su popcorn kaž tež napoje předawali. A čłonojo staršiskeje iniciatiwy běchu słódne pizzy wobstarali. W ćopłych přikrywach a spanskich měchach bě to dźěćom rjane filmowe dožiwjenje pod hołym njebjom. Jakub Wowčer, Bianka Šeferowa
Za žně so dźakowali
W Chróšćanskej šuli „Jurij Chěžka“ su šulerjo njedawno domchowanku swjećili. Tak přińdźe tamniši wosadny farar Měrćin Deleńk k nim a je z nimi nyšpor swjećił. Dźěći pak su program předstajili. Rjany to nazymski wjeršk, hdyž płody z polow a zahrodow zběramy a so za žně dźakujemy.
Foto: Feliks Haza
Wosebita tura
Kak ze žita muka nastawa a z njeje chlěb? Čehodla njehodźi so chlěb direktnje nad wohenjom pjec? Na tejle a dalše prašenja su šulerjo na projektnymaj dnjomaj w Čornochołmčanskim Krabatowym młynje wotmołwu dóstali.
Serbske ornamenty na rubiškach a krawatach?
Nowy film sćelaka Arte wo našim ludźe wulku chwalbu žnjał
Tych filmow w serbskej rěči a ze serbskej tematiku njeje mało. Nahrawali su tajke za čas NDR – mjez druhim w režiji njeboh dr. Tonija Bruka –, tež hišće po lěće 1990. Zwjetša su to dokumentacije wo stawiznach a ludowej kulturje Serbow a wo Łužicy. Na Choćebuskim filmowym festiwalu su wone w sekciji „Heimat – Domownja – Domizna“ minjene lěta přeco widźeć byli – krótke a dlěše, starše a nowe.
Nowowutworjena syć „Łužycafilm“ so jara prócuje, serbskim produkcijam nowy wotmach a impulsy dawać. Přeco pak hišće něšto faluje – tajki porjadny dołhi hrajny film w serbskej rěči. Ideje za to su, ale nadźija, zo tajki w blišim času nastanje, njeje wulka. Hišće njeje tón čłowjek namakany, kiž by za tajki film prawu mysličku měł a tež scenarij napisał.
Do serbskeho hudźbneho tworjenja wusce zapřijaty
Na wopyće pola spěwarja, hudźbnika a komponista Matthiasa Kießlinga w Žylowje
Něhdźe 200 hudźbnych nahrawanjow – su to wobdźěłanja serbskich spěwow a swójskich kompozicijow na serbskorěčne teksty – je mjeztym 65lětny spěwar, hudźbnik, komponist a producent Matthias Kießling dotal za delnjoserbski rozhłós sćelaka RBB a hornjoserbski rozhłós MDR produkował. Šwarna ličba to titulow, kotrež móžemy w serbskim rozhłosu słyšeć.
Roadtrip po Bosniskej
Awtorka Lana Bastašić powěda w swojej knize „Uhvati zeca“ (Dosahń zajaca) wo přećelstwje dweju holcow před pozadkom zańdźenosće Juhosłowjanskeje.
Nimo w němskej literaturje znatych awtorow, kaž Saše Stanišića, wěnuja so tež knihi, spisane w bkms (němska skrótšenka za bosnisko-chorwatsko-montenegrosko-serbisku rěč, prjedy serbochorwatšćina) temje adolescenca. W srjedźišću tak mjenowanych coming-of-age-powědkow steja młode wosoby a jich přechod do swěta dorosćenych. Čitarjam a čitarkam stawiznički pomhaja so ze swójskimi začućemi rozestajeć a je lěpje zrozumić, ale tež procesy reflektować, kotrež wjedu k přisłušnosći a připóznaću w jednej abo we wšelakorych towaršnosćach. Wusko zwjazane su wone z tradicijemi žanrow kubłanskeho romana (Bildungsroman), wuwiwanskeho (Entwicklungsroman) kaž tež swójbneho romana.
Šwejkjada łužiskeho dundaka
Impresije z přebytka w Gdańsku
Njedźela, 15. awgusta 2021
Běše hižo popołdnju po štyrjoch, jako docpěch z awtom Starogard Gdański. W zwisku z kašubskej wustajeńcu Serbskeho muzeja so na njón dopomnich. Wonkownje wupadaše kaž kóžde druhe pólske město: rondele, žołte markěrowanje, pisane wabjenja a trochu hinak rjadowany wobchad. Běch mjeztym hižo dlěje hač wosom hodźin po puću był.
Jubilejny tydźeń
Katolski serbski dźěćacy dom „Alojs Andricki“ w Radworju je jubilejny tydźeń přewjedł. Před 110 lětami bu dom załoženy. Poprawom dyrbješe so jubilej we wobłuku wosadneho swjedźenja w septembrje wotměć, tón pak bu wotprajeny. Přiwšěm chcychu jón kubłarjo a dźěći zhromadnje swjećić, a činjachu to nětko cyły tydźeń. Póndźelu zahajichu jón z nyšporom. Tež tortu mějachu spřihotowanu. To bě wulka překwapjenka! Marko Njek w mjenje kolegow a nawodnicy dźěćaceho domu
Šulerjo strowu snědań přihotowali
Pućowanski dźeń
Njedawno pućowachmy my kubłarki z dźěćimi Sulšečanskeje serbskeje pěstowarnje „Dom palčikow“ z wulkimi wočakowanjemi do Salowa. Sćěhowachmy přeprošenje šefiny Silwije Šenkeroweje na ležownosć zawoda „EVSE-Čorny Halštrow“, zo bychmy zastaraćela płuna našeje pěstowarnje dokładnišo zeznali. Jako w Salowje dóńdźechmy, čakaše na nas hižo rjenje kryte blido z lutymi chłóšćenkami, kotrež nam wězo słodźachu. Cyle wosebity wokomik bě, zo dósta naša pěstowarnja wulki šek přepodaty. To bě dźak za wobdźělenje na molowanskim wubědźowanju, štož bu hižo z wulkotnymi mytami hódnoćene. W mjenje wšitkich dźěći so cyle lubje dźakujemy. Po tym móžachu wšitcy na skakanskim hrodźe cychnować, sej rumnosće „EVSE“ zarjadnistwa wobhladać a sej samo dźěle „stareje cyhelnicy“ spřistupnić. Wosebje napjate bě dźěćom tajne městno za durjemi – tam chowachu so stare kachle bywšeje cyhelnicy. Skónčnje dósta kóždy jedne pjerjo pawa darjene. Podźakowawši so z małym spěwčkom podachmy so zaso na wróćopuć do pěstowarnje. Michaela Dömmelowa
