TSV Wachau II

– SJ Chrósćicy 0:1 (0:1)

Zestawa hosći: Králíček – Pöpel, Zahrodnik, Cyž, Bětnar, Schulze, Žur, Domaška, Runt, Šiman (46. Dehn), Věchet

Chróšćanscy koparjo maja z nišoklasowymi přećiwnikami přeco zaso swoju lubu nuzu. W štwórćfinalu mějachu hižo ćeže přećiwo klóšterskim koparjam a minjenu sobotu dyrbjachu do Wachauwa. Tež přećiwo tamnišej rezerwje wjele hinak njewupadaše. Přeco zaso spytaštej sej wobaj cyłkaj z dołhimi třělwami a přihrawkami móžnosće wuhrawać. Tak prawje pak so to žanomu z njeju njeporadźi. Po jednorej wysokej třělwje Zahrodnika ze škita do nadběha po­dlěši ju Žur cyle jednorje do směra na wrota. Dokelž wrotar kročel předaloko před klětku steješe, njezamó wón bul wotwobarać, tak zo hosćo­ k nawjedowanju trjechichu (29.). Zbožowne, ale přiwšěm rjane wrota to za Chróšćansku SJ. A to bě hižo wšo! Tež Wachaučenjo hdys a hdys nadběhowachu, wulke składnosće pak žane njemě­jachu.

Rakečanske ST II

– Sokoł Ralbicy/Hórki II 3:1 (1:0)

Zestawa hosći: Cyž – Materna, M. Matka, T. Matka, Čornak, Bogusz, Šwejda, Kobalc, Serbin, Šmit, Krawc (46. Šołta)

Znajmjeńša jednoho koparja narunać steji pola Sokoła Ralbicy/Hórki na dnjowym porjedźe. Tak dyrbješe znowa 44lětny Daniel Krawc wupomhać. Za njeho přińdźe po přestawce 48lětny Roland Šołta na trawnik. Zdobom běše wón jenički hrajer za wuměnu. Žane optimalne wuměnjenja to za wuspěch rezerwy Sokoła. Rakečenjo, jako druhi tabulki, hru diktowachu a hosćo hladachu, zo pod kolesa njepřińdu. W 27. min. docpě Naaser z hłójčku nawjedowanje.

Po połčasu zwyši Reineke ze sylnym solom na změrowace 2:0 (68.) Dźesać mjeńšin pozdźišo zniži Šmit na 2:1. Rakečenjo hru přiwšěm dale postajachu a w po­­dlěšenju na kónčne 3:1 (92.) zwyšichu. Kobalc dyrbješe druheje žołteje karty dla hrajnišćo dočasnje wopušćić. Maik Brězan

Awtor dźensa

Tomaš Faska

To njeběch po zazběhu lětušich swětowych mišterstwow w lodohokeju hižo wočakował. Němska wubranka je so za štwórćfinale kwalifikowała. A to najebać šwarnu ličbu zra­njenych hrajerjow. Bjez štyrjoch kruće w mustwje zakótwjenych muži wudobychu sej chowancy trenarja Marca Sturma přećiwo Madźaram ze zasłuženym 4:2 doskónčny skok do koła poslednich wosom cyłkow. Při tym bě to poprawom hižo dočasnje zaručene, dźak dobyću Kanady přećiwo Francoskej. Ale wo to pokoj.

Nětko čaka na němsku wubranku wězo wjetši kaliber – pak hosćićel Ruska pak Čěska pak Šwedska. Kóžde z tychle narodnych mustwow drje Němcam puć do přichodneho koła bjez problemow zarući. Wšo druhe by sensacija była, ale tajkich wšak runje w sporće maš. Wočakńmy!

Što w interneće runje čitam? Miroslav Klose, něhdyši němski narodny kopar, so nawróći? Dźenik Süddeutsche Zeitung znajmjeńša twjerdźi, zo je sej Eintracht Frankfurt 38lětneho rodźeneho Polaka, z 71 wrotami najwuspěšnišeho třělca němskeje wubranki, „kupił“.

Wokrjesna wyša koparska liga

Połčnica – Hnašecy1:4 (0:3)

1. Chrósćicy 29 68  : 26 69

2. Hory 28 70  : 34 53

3. Ralbicy/Hórki 28 66  : 30 52

4. Rakecy 29 62  : 45 51

5. Großröhrsdorf 28 71  : 51 49

6. Hnašecy 28 67  : 40 46

7. Póst Budyšin 29 70  : 59 46

8. Ćisk 28 64  : 55 41

9. Kumwałd 28 71  : 63 40

10. Połčnica 28 49  : 53 37

11. Ramnow  28 57  : 68 37

12. Bukecy 28 50  : 73 32

13. Kulow 28 49  : 51 29

14. Kinspork 29 57  : 63 29

15. Wjelećin 28 45  : 77 26