Na wyše jězbne płaćizny so dojednali

štwórtk, 06. decembera 2018 spisane wot:

Budyšin (SN/BŠe). Z busom abo ćahom po puću być so w kónčinje zaměroweho wobchadneho zwjazka Hornja Łužica-Delnja Šleska podróši. Přičina toho su wyše wobhospodarjenske kóšty wobchadnych předewzaćow. Jeničce w prěnich dźewjeć měsacach lěta 2018 su so personalne kóšty wo tři procenty a energijowe wo dźewjeć procentow zwyšili.

Jednaćelka towaršnosće Regionalbus Hornja Łužica zwr Andrea Radtke je na wutornym posedźenju ZVON w Budyšinje argumenty wobchadnych předewzaćow radźićelam přednjesła a wo to prosyła, moderatnemu zwyšenju płaćiznow přihłosować, čemuž wotpowědowachu. Po dwěmaj lětomaj konstantnych płaći­znow maja sobujěducy wot klětušeho awgusta přerěznje 4,05 procentow wjace za swoju jězdźenku płaćić. Jednora jězba w měsće so wot nětko 1,50 eurow na 1,60 eurow podróši. W regionalnym wobchadźe maja kupcy tohorunja z podróšenjom wot 1,50 na 1,60 eurow ličić. Płaći­zna tarifoweje jednotki přiběra wot 27 na 29 centow.

Dobre rozrisanje za wšěch potrjechenych

srjeda, 05. decembera 2018 spisane wot:

Wuskidź (JoS/SN). Dokal budźe železniska čara mjez Běłej Wodu a Rěčicami přepołožena, stej Němska železnica a pře­dewzaće Łužiska energija a milinarnje (LEAG) tydźenja wozjewiłoj. Wudobywanja brunicy w Rychwałdskej jamje dla je naprawa trěbna a w brunicowym planje tež hižo předwidźana. Wobě přede­wzaći twjerdźitej, zo stej dobry kompromis našłoj, wo kotrychž bu w juliju hišće chětro diskutowane. (SN rozprawjachu.)

Tydźenja přewjedźechu w Rěčicach infor­maciske zarjadowanje, dźeń po tym dalše. „Cyłkownje 35 zajimcow je přišło, zwjetša wobsedźerjo lěsow. Wjesni wobydlerjo njejsu wot přepołoženja čary wulce potrjecheni“, měnješe fachowa referentka za komunikaciju Němskeje železnicy Susann Holtorp. W Holi, wjesnym dźělu Wuskidźe, to hinak wupada, štož so tež na zajimje ludźi pokazuje. Wjes njebudźe wot čary hižo přeprěkowana, tež nic komandatura wojerskeho zwučowanišća Zwjazkoweje wobory. Stare hatnišćo njebudźe tohorunja noweje železniskeje trasy dla wobćežene.

Jednaja z Maju

srjeda, 05. decembera 2018 spisane wot:
Kulow (SN). Čłonojo dźěłarnistwa Ku­low­skeho mebletwarca Maja su so wčera na hłowne dypki nastupajo tarifowe jedna­nja dojednali. Nimo žadanja, zo ma dźěłarnistwo IG metal wuchodneje Sakskeje z tamnišim jednaćelstwom jed­nać­, steji tarif drjewoweje a kumštnomaći­znoweje industrije w srjedźišću. Kaž prěni społnomócnjeny dźěłarnistwa na wuchodźe Sakskeje Jan Otto zdźěli, zhladuje Kulowski zawod na mjeztym dołhu a dobru tradiciju jako zhotowjer meblow za IKEA. To ma so nětko w sprawnych mzdach wotbłyšćować. Hižo před połdra lětom su w předewzaću Maja zawod­nu radu wolili. Wot toho časa je so tam hladajo na sobupostajowanje něštož­kuli změniło a polěpšiło.

Niskomzdowa kalamita

srjeda, 05. decembera 2018 spisane wot:
Ze zawodnej radu su w Kulowskej meblowej tworni Maja sobupostajowanje w předewzaću zawjedli, štož je DGB Sakskeje spočatk septembra z druhim městnom swojeho sobupostajowanskeho myta připóznał. Nětko namołwja dźěłarnistwo IG metal wuchodneje Sakskeje jednaćelstwo Maje k tarifowym jednanjam. Krok je logiski. Čehodla njeměli tež sobudźěłaćerjo Kulowskeho zawoda lěpšiny přestrjenjoweho tarifoweho zrěčenja drjewoweje a kumštnomaćiznoweje industrije Sakskeje wužiwać? Hnydom pak so přećiwk jewi: Dotalnych mjeńšich mzdow sobudźěłaćerjam dla bě zawod Maja na wikach swoju nišu našoł. Nětko so někotryžkuli boji, zo bychu z wyšej mzdu wobšěrniše nadawki, kaž na přikład za přede­wzaće IKEA, a tak na kóncu tež dźěłowe městna wohrožene byli. Tónle strach wuwědomja ći cyłu niskomzdowu kalamitu. Zawodne sobupostajowanje pak zdobom rěka, ćežke naležnosće zhromadnje rozrisać, tež w tworni Maja. Axel Arlt

Minirenty hroža wjace ludźom

wutora, 04. decembera 2018 spisane wot:

Budyšin (SN). W Budyskim wokrjesu hrozy chudoba w starobje, a to we wjetšim rozměrje hač dotal wočakowane. Toho­ boji so dźěłarnistwo Žiwidła, po­žiwadła a hosćency (NGG). 34 000 dźěłopřijimarjow w Budyskim wokrjesu by wuchadźejo ze swojeje dźensnišeje mzdy jenož rentu pod statnym zakładnym zawěsćenjom dóstało. A to, bychu-li so po 45 dźěłowych lětach na wuměnk podali. Kaž dźěłarnistwo NGG informuje, je 27 procentow dźěławych w Budyskim wo­krjesu wot toho potrjechenych.

Próh za „Hartz IV w starobje“ wučinja w Budyskim wokrjesu aktualnje 704 eura měsačnje. Při tym su bydlenske kóšty wobkedźbowane. To wuchadźa z rentoweje analyzy Hannoverskeho PESTEL-instituta, hdźež wuhódnoćichu za dźěłarnistwo NGG hamtske statistiki.

Woteběra-li přerězna renta hač do lěta 2030 na jenož hišće 43 procentow dochodow, móhła ličba wot chudoby wohroženych rentnarjow w Budyskim wo­krjesu přichodnje jasnje rozrosć. Wědomostnicy rěča potom wo 40 000 ludźoch z rentu pod statnym zakładnym zawěsćenjom po 45 přinoškowych lětach.

Michael Isensee z Němskeho chlěboweho instituta a Worklečanski pjekar Michael Šlapa (wotlěwa) staj wčera w Kamjencu wosuški wjacorych Kamjenskich a wokolnych pjekarnjow pruwowałoj. Posudźowałoj staj wonaj mjez druhim wonkowny napohlad, wonkownu worštu, mjechkosć ćěsta, kak wosušk wonja a nic na kóncu aroma. Foto: Feliks Haza

Budyšin (CK/SN). W Hornjej Łužicy bě w nowembru 17 842 bjezdźěłnych registrowanych. To je 20 mjenje hač měsac do toho. Tak je bjezdźěłnosć w regionje samo spočatk zymneho počasa hišće raz snadnje woteběrała, kaž rjekny tele dny Ilona Winge Paul. Ale tež prěnje přizjewjenja bjezdźěłnych, kotřiž sezony dla wupowědźenje dóstachu, dyrbjachu hižo zregistrować. Jednaćelka za operatiwne naležnosće Budyskeje agentury za dźěło skedźbnja na pjenjezy za krótkodźěło. Tónle instrument je so jako atraktiwna alternatiwa k pušćenju sobudźěłaćerjow wopokazał. Tak móža firmy přez zymu swojich fachowcow zdźeržeć. Kwota bjezdźěłnosće w Hornjej Łužicy cyłkownje wučinja 6,3 procenty. Rozdźěle pak sahaja wot 3,5 procentow w Kamjencu hač do 8,2 procentow w Běłej Wodźe. Z wulkim wotstawkom slěduje Zhorjelc z 10,8 procentami, jeničkej dwucyfrowej kwotu w dźěłozarjadniskim wobwodźe.

„Zetkanišćo insiderow“ za dorosćenych

štwórtk, 29. nowembera 2018 spisane wot:

Jobcenteraj wokrjesow Zhorjelc a Budyšin kročitej po nowych pućach. Prěni raz stej wonej na dźěłowe a wukubłanske wiki wčera do Lubija přeprosyłoj.

Lubij (UM/SN). Ličba dnja rěkaše 5 160. Tak wulka je wot předewzaćow Zhorjelskeho wokrjesa přizjewjena potrjeba personala hač do lěta 2022. W Budyskim wokrjesu so znajmjeńša runje telko nowych dźěławych přidruži. Wjace hač połojca poskitkow dźěłowych městnow, kotrež maja so wutworić abo znowa wob­sadźić, měri so na fachowcow. Na ludźi, kotřiž maja znajmjeńša kwalifikowane powołanske zakónčenje, w najlěpšim padźe samo hišće něšto wjace „w zaku“. Zwotkel pak jich brać?

Wot hodownika ma mjez Wojerecami a Zhorjelcom zaso ćah jězdźić

Wot 9. decembra pojědźe mjez Zhorjelcom a Wojerecami zaso ćah. Zwisk bu po nimale cyłej čarje dospołnje ponowjeny. Přičina toho bě plan Europskeje unije za wutwar železniskich zwiskow. Dźěl toho běše tež linija z mjenom RB64, kotraž tak na nadregionalnym wuznamje nabywa.

Ličby wobjim twarskeje naprawy wotbłyšćuja

Twarsku naprawu je Němska železnica we wjacorych twarskich wotrězkach přewjedła. Kónc decembra 2010 je přede­wzaće za to čaru mjez Wojerecami a Klětnom zawrěło, wot měrca 2013 wotrězk mjez Klětnom a Hórku pola Niskeje. Wobjim­ twarskich wukonow, daty a fakty wotbłyšćuja wuznam noweje čary. Něhdźe­ 200 přistajenych, wot twarskich dźě­łaćerjow, přez technikarjow hač k pro­jektnemu nawodnistwu, bě do naprawy zapřijatych. Podłu čary nasta 1 700 sćežorow za milinowód a 200 000 prě­kušow. Něhdźe 280 000 tonow šotra su nawozyli a připrawichu 16 kilometrow škitneje sćěny.

Jězor jara wažny za turizm

wutora, 27. nowembera 2018 spisane wot:

Na regionalnej konferency wo twarskich dźěłach w Złym Komorowje rěčeli

Rań (AK/SN). Po zesunjenju zemje w Złokomorowskim jězoru 13. septembra w juhozapadnej kónčinje kupy je znowawotewrjenje jězora we wobłuku kołopuća elementarnje wažny za turizm. „To je nam eksistencielnje wažne. Njedyrbja­ło-li so tole poradźić, dyrbimy skazanki storněrować. Potom dyrbjeli sej wotškódnjenje žadać“, rjekny Detlev Wurzler, wot oktobra nowy předstejićer zaměroweho zwjazka Braniborska łužiska jězorina, minjenu srjedu na mjeztym jědnatej regionalnej konferency w Ranju (Großräschen). Hłowna tema posedźenja bě łužiska jězorina jako motor regionalneje strukturneje změny. „Po podawkach je nětko zhromadne wothłosowanje z hórniskim saněrowanskim předewzaćom, hórniskim zarjadom, komunami, zaměrowymi zwjazkami a turistiskimi předewzaćemi wažniše dyžli prjedy.“

nawěšk

SERBSKE NOWINY podpěruja:

Novi Sad – kulturna stolica Europy

nowostki LND