Michendorf/Großschirma (SN/at). Wobstatk pólnych zajacow w Braniborskej je loni sylnje přiběrał. Mjez nalěćom a nazymu je plus 21 procentow wučinił, kaž zdźěli to rěčnica informaciskeho systema za dźiwje zwěrjata krajow Němskeje (WILD) powěsćerni dpa. Po sto hektarach mějachu loni w nalěću 5,5 zajacow, nazymu běchu jich 6,4 zajacy. Loni nazymu su 50 000 zwěrjatow zličili. Po cyłym zwjazku je wobstatk dale stabilny.

Wobšěrny monitoring kaž w Braniborskej hońtwjerjo w Sakskej hišće nimaja. Tu pak su w Němskim zwjazku hońtwjerjow organizowani hońtwjerjo na dobrym puću, monitoring dźiwiny na płoninje, tež zajacow, zawěsćić. Po słowach Ma­thiasa Rehma, sakskeho krajneho dohladowarja projekta WILD, su za to sobu njeorganizowanych hońtwjerjow dobyli.

Ćopłota a suchota w prěnich tydźenjach žiwjenja wo přetraću młodych zajacow­ rozsudźitej. Woteběranje na zelach bohatych pólnych kromow je za zajacy zahubne. Tohodla žada sej Němski zwjazk hońtwjerjow njeběrokratiske honorowanje ratarjow, hdyž kćějace kromy z dźiwimi zelemi zapołoža.

Budyšin (SN). Wjedro w měrcu njeje polěpšenju na dźěłowych wikach polěkowało. We wuchodnej Sakskej bě w nalětniku 19 697 bjezdźěłnych, 73 resp. 0,4 procenty wjace hač w małym róžku. Přirunujo z lońšej samsnej dobu přirost 12,7 procentow resp. 2 216 wosobow wučini. Aktualna kwota bjezdźěłnosće je 7,2 procentaj, kaž Budyska wotnožka Zwjazkoweje agentury za dźěło dźensa zdźěli.

Znowapřistajenje bjezdźěłnych w sezonowych powołanjach so hišće dliji. „Dźěłodawarjo zdźeržliwi wostanu a předewzaća mjenje swobodnych dźěłowych městnow přizjewjeja, hač běše to loni w měrcu“, hódnoći Kathrin Groschwald, předsydka jednaćelstwa Budyskeje agentury za dźěło. Wuchodne dźěłowe wiki pak su dale stabilne a kwota bjezdźěłnosće njezměnjena.

Wo 0,8 procentow wyša kwota bjezdźěłnosće hač loni w měrcu hłownje z toho rezultuje, zo jobcenteraj w Budyšinje a Zhorjelcu ludźi dohladujetej, kotřiž su z Ukrainy ćeknyli. Aktualnje je tam 1 344 přizjewjenych dźěłokmanych wosobow z ukrainskim staćanstwom, 1 297 wjace hač loni w juniju.

Berlin (dpa/SN). Płunowi zastaraćeljo Němskeje warnuja před iluzijemi, zo je zastaranje z płunom na dotalnym stabilnym niwowje hižo nětko zaručene. Byrnjež w zymje 2022/23 dosć płuna k dispoziciji było, dyrbjeli ludźo dale płun lutować, rjekny šef předsydstwa branšoweho zwjazka Timm Kehler powěsćerni dpa. „Nětko je wažne, płunowe składy zaso napjelnić a zastaranje w zymje 2023/24 ­zawěsćić.“ Płunowe wiki su dale jara njewěste, jasne zwyšenje płaćiznow w běhu lěta je bjeze wšeho móžne, wón rjekny.

Hłowne přičiny za dobre zmištrowanje minjeneje zymy su po słowach Keh­lera spěšny wutwar infrastruktury za ­wužiwanje židkeho płuna, zalutowanje płuna w předewzaćach a ludnosći kaž tež powšitkownje miła zyma. Nětko měła so infrastruktura za židki płun dale wutwarić. To je „nuznje trěbne, zo bychmy wěste a stabilne zastaranje ze zapłaćomnymi płaćiznami zaručili“. W Němskej su dotal tři terminale za židki płun natwarili, dalše tři chcedźa kónc 2023 a spočatk 2024 wužiwać započeć. Kritikarjo pokazuja na negatiwne sćěhi za škit klimy přez wyšu přetrjebu płuna.