Mjeztym 23 lět skutkuje přewšo spomóžnje Smjerdźečanske kubłanske srjedźišćo LIPA. Tež přichodnje to tak wostanje. To staj sej iniciatoraj a sobuzałožerjej, Lucija a Alfons Handrik wěstaj. Dawno staj wonaj na wuměnku. Swoju LIPU pak staj hłuboko we wutrobje zakótwiłoj.
Dopomnjenki na spočatk LIPY
Myslo na spočatki so Lucija Handrikowa dopomina, zo dyrbjachu so derje wobhonić, kak tajke towarstwo załožić. „To bě swój čas trochu ćešo je zapisać dać hač dźensa“, wona powěda, „smy wo tym rozmyslowali, što chcemy wšitko činić, što budźe ludźi zajimować, kotre poskitki wone snano derje přiwozmu. Po prěnich zarjadowanjach smy rozmyslowali, što móhli nowe poskićeć a kak referentow zdobyć. Stajnje je nas prašenje zaběrało, hač budu wobdźělnicy našich kursow a poskitkow spokojom.“
Drježdźany (SN/MiR). Po cyłej Sakskej su wučerjo dale wulce požadani. Sakske ministerstwo za kultus je wozjewiło, zo su ze zahajenjom šulskeho lěta 2022/23 při-stajili wjace hač tysac nowych wučerjow. Najwjetša ličba, mjenujcy 306, skutkuje wotnětka na jednym z gymnazijow, 299 na jednej zakładnej, 186 na wyšej, 143 na spěchowanskej a 90 na powołanskej šuli. W cyłku je to 1 024 nowych přistajenych wučerkow a wučerjow. Kaž SMK zdźěli, je podźěl wučerjow, kotřiž su swój studij a referendariat wuspěšnje zakónčili, nimale stabilny wostał. Podźěl přidružnikow wučinja aktualnje něhdźe dwanaće procentow. W předchadźacych lětach tón bě hišće 30 procentow wysoki. Mjez nowymi wučerjemi je 121 přidružnikow a 60 pedagogiskich fachowych mocow. Přidružnicy wopytaja hižo wot 1. meje trěbnu kwalifikaciju a započinaja wot dźensnišeho wuwučować.