Putace informacije posrědkował

štwórtk, 23. julija 2015 spisane wot:

Paweł Łachowski, doktorand stawi­znow na Zielonogórskej uniwersiće, rozestaja­ so w swojich slědźenjach hłownje z wikowanskimi dróhami Wulkopólskeje a Šleskeje. Tak je so započał­ zajimować za zasydlenje Serbow­ na tym teritoriju.

Choćebuz (MEW/SN). Wobdźělnicy kompaktneho rěčneho kursa delnjoserbšćiny na Choćebuskej Šuli za delnjoserbsku rěč a kulturu zaběrachu so wčera z temu „Serbja w Šleskej a regionje Wulkopólska – zjawy emigracije.“ Wšelke městne mjena pokazuja na slědy zasydlenja serbskeje ludnosće w dźensnišej Pólskej. Jedna wjes w Delnjej Šleskej njedaloko města Głogów mjenuje so hač do dźensnišeho Serby. We Wulkopólskej su tři wsy z mjenom Sarbia. Nastaće wšitkich štyrjoch wsow zwjazuja wědomostnicy ze zasy­dlenjom něhdyšich jatych z Łužicy.

Wuměłsku dźěłarničku přewjedli

štwórtk, 23. julija 2015 spisane wot:

Hižo dźewjaty króć wotmě so lětsa třinarodne wuměłske wubědźowanje pod hesłom „Legendarni rjekojo pomjez­neje kónčiny“. Biblioteka Karkono­ska w pólskej Jelenjej Górje kaž tež Towaršnosć za kulturu a dale­kubłanje wokrjesa Zhorjelc je mjeztym hižo dlěši čas za dźěći a młodostnych přihotuje a přewjeduje.

Na mjezynarodnym projekće wobdźěleja so dźěći a młodostni z euroregiona Nysa. Zaměr wubědźowanja je zwyšić popularnosć rjekow, serbskeho kuzłarja Krabata a hórskeho ducha Kyrkonoša, kiž so čěsce Krakonoš a pólsce Rzepiór mjenuje.

Šulerjo Kulowskeje wyšeje šule „Korla Awgust Kocor“ wobdźělichu so lětsa druhi króć na tymle wubědźowanju, kotrež so hižo wot lěta 1996 wotměwa. Pón­dźelu, 29. smažnika, zetkachu so woni k wuměłskej dźěłarničce. K tomu běchu sej tež zastupjerjow z partnerskeje šule w pólskim Lubomierzu přeprosyli. Zhro­madnje­ zaběrachu so z temu „Krabat a Kyrkonoš“. Poboku bě jim při tym Budyski wuměłc Marko Bruk, kotrehož bě sej nawodnistwo šule za wuměłskeho nawodu dźěłarnički zdobyło.

Cokorowu titu derje pjelnić

štwórtk, 23. julija 2015 spisane wot:
W cokorowej tiće móža starši tajke płody zaměstnić, kotrež často na jědźnym planje swójby njesteja. Tež rózynki ze wšelakimi worješkami změšane so derje do njeje hodźa. Kniha, do kotrejež móža so šulscy přećeljo zapisać, namaka w tiće runje tak městno kaž prěnja swójska móšeń abo připowěšatko za kluč. Zaběrje na šulskim dworje słuža powjaz za skakanje, gumijowy twist abo jojo. MiR

Studenća Serbski dom wopytali

wutora, 21. julija 2015 spisane wot:
Skupina studentow geologije Bayreuthskeje uniwersity je wčera po puću do Opola w Budyskim Serbskim domje přebywała. Po tym zo běchu so w Serbskej kulturnej informaciji rozhladowali, rozmołwjachu so z Clemensom Škodu, referentom Domowiny za kulturne naležnosće a wukraj. Mjez druhim chcychu wědźeć, kak třěšny zwjazk župow a towarstwow praktisce dźěła. Rólu hrajachu tež nadběhi na serb­skich młodostnych. Studenća wopytachu dale Serbski institut. Ekskursiju organi­zowałoj běštaj prof. dr. Martin Doevenspeck a student Nikolai Teufel. Foto: Jurij Helgest

Budyšin (SN/MiR). Rěčne a prózdninske lěhwo Serbskeho šulskeho towarstwa steji lětsa hišće bóle pod hesłom intensiwna zaběra z rěču. „Móžemy rjec, zo změja wobdźělnicy składnosć, sej serbšćinu ze wšěmi zmysłami přiswojić“, rjekny předsydka SŠT Ludmila Budarjowa. Hladajo na wukmanjenje dźěći a mło­dostnych w serbšćinje je SŠT přebytk wot 31. julija do 9. awgusta we wočerstwje­nišću KieZ Querxenland we Wodowych Hendrichecach znowa koncipowało. 30 zajimcow wjacorych serbskich šulow je so za lěhwo přizjewiło. Studenća wučerstwa njeskutkuja lětsa jenož jako pře­wodźerjo, dohladowarjo a partnerojo, ale budu zdobom rěčni amaterojo. Su to třo studenća wučerstwa z Lipska a Drježdźan. Nawod lěhwa změje Šunowčan Matthias Möller.

Zamołwitosć rěka sobu dźěłać

srjeda, 15. julija 2015 spisane wot:

Sobu postajeć a so nutř měšeć je jeho nalež­nosć. „Jako šulerski rěčnik móžeš sobu rozsudźeć. Móžeš na njedostatki a problemy skedźbnjeć“, měni 25lětny Patrick Tanzer z Tornowa pola Łutow. Wón je lětsa na Wojerowskim Powo­łan­skošulskim centrumje Konrad Zusy wukubłanje na kubłarja zakónčił. Do toho bě so hižo na socialneho asistenta wukubłał. „Po pisomnych a praktiskich pruwowanjach su mi mnohe durje wotewrje­ne. Rady bych ze zbrašenymi dźěłał“, sej wón přeje. Prěnje nazhonjenja na tym polu je wón hižo w spěchowanskej šuli „Dr. Friedrich Wolf“ za ćělnje zbrašenych we Wojerecach zběrał.

Plincy wšěm słodźeli

pjatk, 10. julija 2015 spisane wot:

Šulerjo wosebite popołdnjo dožiwili

Wojerecy (HH/SN). Rjad serbskich po­poł­dnjow na Wojerowskej dźěćacej a mło­dźinskej farmje, hdźež so zwjetša dźěći w hortowej starobje ze serbskej rěču a kulturu zeznajomjeja, je so wčera za tele šulske lěto skónčił. Zežiwjenska poradźowarka Křesćansko-socialneho kubłanskeho skutka Rafaela Wićazowa tajke popołdnja něhdźe wot spočatka tohole lěta dwutydźensce poskića a je nawjeduje. Předewšěm na praktiske wašnje spyta wona šulerjam, kotřiž wobstajnje na farmu přichadźeja, zakłady serbskeje rěče a kulturne wosebitostki zbližić. Za wčerawše popołdnjo bě sej něšto wosebite wumysliła. Hromadźe z njej su dźěći butřankowe plincy pjekli. K tomu měješe poradźowarka hišće wose­bity tip swojeje wowki. Ta bě mjenujcy tyhel do toho­ z połćom wumazała, zo so plincy přilěpili njebychu.

Na dobro Witaj

pjatk, 10. julija 2015 spisane wot:

Rowno (FW/SN). Kóždu srjedu po­poł­dnju zetkawaja so kubłarki Rownjanskeje pěstowarnje „Milenka“ a jedna kubłarka pěstowarnje „Lutki“ k zakładnemu kursej serbšćiny w Rownom. We woběmaj dźěćacymaj přebywanišćomaj nałožuja Witaj-koncept. Personalne změny, wo­sebje w Rownjanskej pěstowarni, žadaja sej nětko wukubłanje nowych kubłarkow w serbšćinje, zo móhł so koncept w přichodźe dale zwoprawdźić a zaručić. Nimo srjedownišeho kursa wopytuje dźěl kubłarkow hišće kóždy štwórtk wječor­ kurs na ludowej uniwersiće pola Julia­ny Kaulfürstoweje. Tón je so minjeny tydźeń zakónčił a w nowym semestrje dale póńdźe. Srjedowny kurs wotměwa so tež za čas lětnich prózdnin.

Nimo rěčnych kursow poskićeja Row­njan­skej pěstowarni tydźensce tež maćernorěčny přewod, kotryž je jara derje přiwzaty. Tu wobdźěleja so maćerno­rěčni Serbja něhdźe dwě hodźinje w skupinach, hdźež přewodźeja dźěći a pěstowarki při rěčenju, spěwanju abo wuho­towanju projektow a programow.

Njehladajo wšěch prócowanjow maja kubłarki hišće dołhi puć před sobu.

Jězba do stolicy Čěskeje republiki, złoteje­ Prahi, so wudani. Wosebje, hdyž tam jědźeš, zo by rěč susodneho kraja lěpje nawuknył. Šulerjo-čěšćinarjo 7. lětnika Serbskeho gymnazija Budyšin su w juniju tam pobyli a nam wo swojich dožiwjenjach pisali.

My, skupina čěšćinarjow 7. lětnika Serbskeho gymnazija, smy jězbu do čěskeje stolicy planowali, zo bychmy swoje rěčne znajomosće polěpšili a sej krasnu metropolu nad Wołtawu raz cyle zbliska wobhladali. Tohodla bě kóždy z nas krótki přednošk wo zajimawostce města spřihotował. Zhromadnje ze šulerjemi rušćiny nastajichmy so na puć.

W srjedźišću njedawneho fachoweho schadźowanja we Wostrowcu steješe susodorěčne kubłanje w Sakskej. Ale tež připóznaće powołanskeho zakónčenja maćernorěčnikow je rólu hrało.

Wostrowc. Pólšćina a čěšćina w pomjeznym rumje Sakskeje trjebatej systematiske spěchowanje a wuwiće kwality wot zažneje dźěćaceje staroby. „Pobrachuje dale wědomostnje fundowany koncept, na kotrymž móhli dźěło w dźěćacych dnjowych přebywanišćach wusměrić“, podšmórny dr. Regina Gellrich, nawodnica Sakskeho krajneho centruma za zažne susodorěčne kubłanje na njedawnym schadźowanju we Wostrowcu. „Z projektom Witaj mamy w serbskim wobłuku derje praktikowany přikład. Chcemy wjele z toho wuknyć a přenjesć.“ W Mjezy­narodnym zetkawanišću klóšter Marijiny doł wobjednachu temu „Po puću k rěči susoda wot wšeho spočatka w pomjeznych regionach Sakskeje“. Kubłarki, wučerki, wědomostnicy, studenća z Němskeje, Pólskeje, Čěskeje a Awstriskeje kaž tež zastupjerjo z kubłanja, kultury, poli­tiki a zarjadnistwa so wobdźělichu.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND