Serbske Nowiny

Sulšečan dr. Pětr Brězan pojěcha lětsa 70. raz jako křižer

Lěto po surowej wójnje 1946 sy w Kulowskim procesionje mjez Sulšečanskimi křižerjemi wuhladał młodeho pachoła. W porje z dr. Błažijom Nawku, ze swojim pozdźišim swakom a nanom dźensnišeho fararja Gabriša Nawki, poda so tehdy hakle 13lětny Pětr Brězan sobu na puć do Ralbic, zo by wozjewjał poselstwo wo zrowastanjenju Jězusa Chrystusa. Křižer Jurij Mróz bě schorjeł, a Pětr Brězan, tehdy runje­ poł lěta mjez serbskimi šulerjemi w 1. rjadowni serbskeho realneho gymnazija w Českej Lípje, radlubje zaskoči.

štwórtk, 02 apryla 2015 14:00

Misionar tež w rěčnym nastupanju

Farar Christoph Rummel w Hodźiju zaso serbske kemše zawjedł

Farar ma z přikładom być – to je hladajo na křesćanske žiwjenje samozrozumliwe a hladajo na hajenje serbskeje kultury dobra tradicija. Zo móžeš pak tež jako rodźeny Němc a farar ze serbskorěčnym přikładom być, je w dźensnišim času skerje wusahowace. Farar Hodźijskeje ewangelsko-lutherskeje wosady swjateju Pětra a Pawoła Christoph Rummel je tajki wusahowacy přikład. W oktobrje 2008 je wón tamnišu wosadu přewzał.

štwórtk, 02 apryla 2015 14:00

Wotbłyšćuja stawizny a stawiznički

Trudla Kuringowa katalogizuje swjate křiže w serbskich katolskich wosadach

W zwisku ze serbskimi katolskimi wosadami mjenuja so swjate křiže často jako jedna z jich wosebitosćow. Na mnohich městnach je wuhladamy, starše ze zornowca a z metalowym korpusom, nowše zwjetša z drjewa. Z wjele lubosću a česćownosću před swojimi prjedownikami je wobsedźerjo hladaja. Zo bychu so tež přichodnym generacijam zachowali, njeje jenož wažne, křiže materielnje hladać. Tež na jich stawizny njesměmy zabyć. Tomule nadawkej wěnuje so Kanečanka Trudla Kuringowa.

štwórtk, 02 apryla 2015 14:00

Wobsedźerja wuslědźiła

Zo Trudla Kuringowa woprawdźe slědźerske dźěło wukonja, wo tym swědči na přikład tak mjenowany gmejnski křiž w Kanecach, postajeny lěta 1851. Ani Mikławš Kokla njemóžeše swój čas wobsedźerja wuslědźić. Na boku zadypanej inicialej J.M. a lětoličba 1962 swědča wo tym, zo je Jan Meškank křiž tehdy ponowić a jako hrónčko citat Ćišinskeho připrawić dał. Z pomocu mokreje krydy pak wučita Trudla Kuringowa na tamnym boku křiža mjeno Brankačkec Wórša a lětoličbu 1851. Dokelž w Kanecach Brankačkecy njebydlachu, móžeše so jenož wo swójbu jednać, kotrejž takle do domu rěkachu. Dokelž pak swójba při puću do Kanec swójsku ležownosć njeměješe, je křiž na gmejnskej ležownosći postajić dała.

Foto: SN/Maćij Bulank, z podpěru Budyskeho Serbskeho muzeja

štwórtk, 02 apryla 2015 14:00

jutry doma

zwonja k rańšim

křižerjow na jedyn dźeń

po štyrceći nocach

wotućeja a stawaja

kóžde lěto znowa

posoljo z namrěwstwom wěry

wobnowja škropawe hłosy

a šrofane konje

wjedźe mać z krjepjeńčku

ze wšitkich domow

čornu suknju ze zelenym wěnčkom

k prěnjemu razej

syn pojěcha z nanom

nimo MORTWEJE HOLČKI

z wosady do susodneje

bě běhał

za křižerjemi

dycha přiroda znowa dowěru

zwonja připołdnju

Kulowskich do Ralbic

z dwěmaj rěčomaj

wobjěchaja tři króć

swěčkběły kěrchow

kćěje po martrownym tydźenju

tež po nyšporje

sunu křižerjo

škórń do třemjenja

a cylinder zejmuja před

z ROWA STANJENYM

při chowacym so słóncu

domoj zwonja jutrowničku

a křižerjow

Z: knižki Marje Krawcec

„sudźeńca wosrjedź dwora“, LND 1992

Jara woblubowane su jězby z wuskokolijowej železnicu w Zhorjelcu, Drježdźanach a Mužakowje. Młodźi železnicarjo so wosebje přez jutry na wjele pasažěrow wjesela. Wšako su so z wulkej prócu na sezonu přihotowali. Foto: Jost Schmidtchen

Pjaty raz budu Janšojske jutrowne spěwarki jutrowničku, 5. apryla, po schadźenju słónca we wsy po puću – prěni raz lětsa tež we wjesnym dźělu Pipanojcach (Jänschwalde-Kolonie). Spěwarki wozjewjeja w serbskich a němskich kěrlušach zrowastanjenje Chrystusa. Wone woblěkaja so za tónle nałožk čorno-běło-zelenu swjedźensku serbsku drastu. Foto: Dirk Markus

Hamorski měšćanosta Roland Trunsch (Swobodni wolerjo) je wčera kluče za nowe campingownišćo Hwězdny camp při Bjerwałdskim jězoru přepodał. Wot dźensnišeho wotnajataj objekt Ludwig a Carola Müller z bayerskeho Thumsenreutha. Přitomna bě tež maskotka Bjerwałdskeho jězora Bärta. Campingownišćo skići městno sto caravanam. Foto: Andreas Kirschke

srjeda, 01 apryla 2015 14:00

Mobilny serwis

Drježdźany (SN). Nimale lěto poskićeny online-serwis datoweje banki wěcywustojnych je Drježdźanska rjemjeslniska komora wudospołniła. App „nawi wěcywustojnych“ je zhromadny poskitk rjemjeslniskich komorow za iPhone a androidne smartphony, kotraž zmóžni spěšny mobilny přistup k datam. Kaž Drježdźanska rjemjeslniska komora zdźěli, informuje app nětko tež wo wěcywustojnych w Drježdźanskim komornym wobwodźe. Tak móžeš w padźe rozestajenja abo škody chětře ze smart­phonom abo tabletom wot wšudźe praweho ekspertu nańć. Za komorny wob­­wod je 116 wěcywustojnych w 37 rjemjesl­niskich powołanjach podatych.

nawěšk

nowostki LND