Serbske sroki w němskej receptowej knize
Budyšin (SN/BŠe). W Budyskej pěstowarni „Kraj pjerachow“ Dźěłaćerskeho dobroćelstwa maja wot awgusta 2001 Witaj-skupinu. A koncept sej starši, kotřiž bydla w měšćanskej štwórći Strowotna studnja, jara waža. „Tuchwilu mam 17 dźěći w skupinje, a dalše přizjewjenja předleža“, praji kubłarka Stefanie Šramina. Lětsa rozžohnuje wona štyri dźěći do šule, kotrež stanu so přichodnu póndźelu z chowancami Serbskeho šulskeho a zetkawanskeho centruma Budyšin. „Při přizjewjenju dźěsća za Witaj-skupinu dźiwamy na to, zo starši serbšćinu tež po pěstowarskim času dale spěchuja“, kubłarka wuzběhnje.
Rozsudźa-li so starši za model Witaj, zeznawaja so jich dźěći nimo rěče tež z kulturu a tradicijemi Serbow. Kóžde lěto wuhotuje skupina na přikład mejemjetanje a spěwa samozrozumliwje serbske pěsnički. „Štyri dźěći skupiny su ruskeho pochada, tamne su němske bjez serbskich korjenjow“, Radworčanka rozłožuje. Zajim někotrych staršich za serbstwo ju stajnje zaso překwapja.
Černobylske dźěći přijědu
Kamjenc (SN/bl). Kónc tohole tydźenja wita Kamjenske towarstwo Iniciatiwa dźěći z Černobyla znowa běłoruskich hosći, kotřiž budu měsac we Łužicy přebywać. Hižo wot lěta 1990, jako towarstwo załožichu, witaja iniciatiwnicy a dalši pomocnicy z wokolnych wsow předewšěm dźěći na wočerstwjenje.
Financnych přičin dla pak přijědźe jich lětsa jenož dwaceći na diabetes schorjenych dźěći do Lessingoweho města. Přebywać budu wone w towarstwowym domje na Fichtowej. Na cokor schorjeni trjebaja kruty dnjowy porjad, wosebitu jědź a medicinske zastaranje. Lětuši wopyt steji pod hesłom „šula – žiwy być z cokorom“. Tak chcedźa Černobylskich hosći nawučić, kak maja z chorosću wobchadźeć, kak měł jich wšědny dźeń wupadać, kotre zežiwidła su lěk, kotre jěd a tójšto wjac.
Ludźi spěchować a wužadać
Z pilotowym projektom dnjowu strukturu w Domje swj. Jana skrućeja
Smječkecy (AK/SN). Wuspěšnje skónčił je so kónc junija pilotowy projekt w Smječkečanskim Domje swj. Jana. Tam wutworichu wot lońšeho septembra wjacore mjeńše skupiny zbrašenych, z kotrymiž su na přikład přeprošenja za lětnju diskoteku paslili abo marmeladu warili. „Skupiny su dźěl našeje noweje nutřkowneje dnjoweje struktury. Wona ma so nětko dołhodobnje w praksy wopokazać. W Budyskim wokrjesu smy prěni, kotřiž su tajku strukturu zawjedli“, powěda nawoda domu Tadej Šiman.
Kóžny rak w srjedźišću
Dermatologiski wotrjad jězorinoweho klinikuma dale wuwiwaja
Wojerecy (AK/SN). Pacientam z kóžnym rakom chce Wojerowski jězorinowy klinikum přichodnje hišće wobšěrniši poskitk hojenja a hladanja poskićeć. „Chcemy swój dermatologiski a alergologiski wotrjad dale wuwić a so na tymle polu z ćežišćowym zastaraćelom stać“, potwjerdźi jednaćel klinikuma Jörg Scharfenberg na njedawnej nowinarskej rozmołwje. Dobre sto dnjow nowy šeflěkar dr. Kim Christian Heronimus wobłuk dermatologije a alergologije nawjeduje. 39lětny rodźeny Berlinjan bě hač do lěta 2006 fachowy lěkar w stolicy a hač do 2014 zastupowacy šeflěkar w Zwickauwje. „We Wojerecach mam dobry team, dobre dźěłowe wuměnjenja a prawu wokolinu“, wón rozłoži. Jeho mandźelska móže jako neurologowka tohorunja w klinikumje dźěłać.
W chorowni nětko tež krótkodobne hladanje móžne
Kamjenc (BG/SN). Wot spočatka julija poskići Kamjenska chorownja maltezow swj. Jana stacionarne hladanske městna na krótki čas. We wobłuku dnja wotewrjenych duri su zajimcam wutoru tónle nowy poskitk, wopřijacy dwaceći městnow, předstajili. „Zastaranje w chorowni maltezow so tak wo wažnu komponentu rozšěri“, rjekny jednaćel za medicinu a hladanje němskich maltezow dr. Franz hrabja von Harnoncourt.
Přitomny bě tohorunja překupski direktor maltezow za Saksku a Braniborsku Florian Rupp, jako sej něhdźe 80 ludźi nowe móžnosće wobhlada. Nad nimi wjeseleše so tohorunja zastupowacy Kamjenski wyši měšćanosta Jörg Bäuerle. To woznamjenja lěpšu žiwjensku kwalitu za tych, kotřiž su hladanja potrěbni, ale tež za tych, kotřiž jich hladaja.
Wot sobudźěłaćerjow krótkodobneho hladanja chcychu wopytowarjo mjez druhim wědźeć, kajke su dnjowe wotběhi a kotre móžnosće terapije Kamjenska chorownja skići. Za to maja na přikład fyzioterapeutiske a ergoterapeutiske móžnosće runje tak kaž socialnu słužbu.
Starać so wo tych, kotřiž trjebaja pomoc
Dom za starobje wotpowědne bydlenje w Njeswačidle dźěło zahajił
Do něhdyšeje zakładneje šule w Njeswačidle je zaso žiwjenje zaćahnyło. Na chódbach pak žana hara wjace słyšeć njeje. Měr je zaćahnył do twarjenja, kotrež nima ničo šulske wjace na sebi. Staroba nětčišich wobydlerjow je chětro wysoka.
W domje, kotryž za naročny zaměr wobhospodarjerja jara přijomnje bjezposrědnje při hrodowym parku leži, wěnuje so hladanska słužba advita hladanju starych ludźi. Nimo starobje wotpowědneho a přewodźaneho bydlenja poskićeja w domje dnjowe zastaranje a wěnuja so wosebje skupinje na demencu schorjenych, kotraž z fachowym přewodom w domje hromadźe bydli.
Wjac hač jenož
starych hladać
Koncept trěbny
Starosće dnjowych maćerjow politisce wobjednać
Jaseńca (SN/MiR). Přiwzaty być – wšojedne hač sy runje lěto abo hižo dlěje na swěće –, to sej kóždy přeje. Kubłanskopolitiski rěčnik frakcije CDU w Sakskim krajnym sejmje Lothar Bienst a Simone Kühnert, projektowa nawodnica ze zarjada za informaciju a koordinaciju wšědneho dnjoweho hladanja dźěći w Sakskej (IKS), kotryž je přirjadowany sakskemu Paritetiskemu dobroćelskemu zwjazkej, staj tole wčera w Jaseńcy začuwałoj. Pjeć dźěći, wo kotrež so dnjowa mać Gabriela Měrćinkowa stara, zapřija jeju do swojeje hry. „To je dobre znamjo, zo dźěći z hrajkanjom pokročuja, kaž zo bychu mjez sobu byli. Wone so tule derje čuja“, rjekny sakski politikar. Přičina wopyta je angažement zarjada IKS, šěrić wědu wo skutkowanju dnjowych maćerjow a nanow. Wšako je w systemje hišće dosć njerozrisanych prašenjow. Tajke na přikład je, kak sy w padźe chorosće zawěsćeny. „To je woprawdźe wulki problem“, zwurazni Gabriela Měrćinkowa, „sym-li chora, dóstawam jeno za dźěl tychle dnjow chorobny pjenjez ze stron komuny, mam pak płaćić wupomoc.“ Za Lothara Biensta je to přičina jednać.
