Wothłosować so je nuznje trjeba
Nastupajo koordinaciju najwšelakorišeje pomocy iniciatiwow w Budyskim wokrjesu w zwisku z wójnu na Ukrainje skedźbnja krajnoradny zarjad přede-wšěm na wažnosć registracije.
Budyšin (SN/BŠe). Po wójnskim nadpadźe Ruskeje na Ukrainu je wulka žołma pomocy tež w Hornjej Łužicy zaběžała. Mnozy zastupjerjo iniciatow a priwatnicy podachu so z nakładnymi awtami k Ukrainskej mjezy, zo bychu potrěbnym pomocne srědki přewostajili abo wottam ćěkancow sobu wróćo přiwjezli. Mjeztym Sakska krajna direkcija na to skedźbnja, zo měli tajke pomocne akcije ze zarjadami wothłosowane być. Ukrainscy ćěkancy, kotřiž Budyski wokrjes docpěja a hišće žanu přebywansku móžnosć nimaja, móža to nuzowej słužbje přizjewić, za čož je telefonowe čisło 03591 / 5251 34900 zarjadowane. Čisło pak měli jenož w nuzowym padźe wolić, wone njeje žana hotline.
Zdokonjamy to!
Profijojo a lajkojo za Ukrainu
Budyšin (SN). Surowa wójna na Ukrainje a z njej zwjazane ćerpjenje ukrainskeje ciwilneje ludnosće wuskutkuje najwšelakoriše pomocne iniciatiwy. Zo by ukrainski lud podpěrała, přewjedźe Towaršnosć za spěchowanje Serbskeho ludoweho ansambla beneficnej koncertaj. Nimo wuměłcow SLA tež serbske lajske skupiny sobu skutkuja. Dochody koncertow, moderěrowaneju wot Diany Fryčec-Grimmigoweje, přepokazaja na socialnu załožbu „St Wolodymyr Fonds“ ukrainsko-katolskeje cyrkwje. Wona pomha ćěkancam a ludźom, kotrymž je wójna škodu načiniła.
Ćěkancy do Choćebuza dojěli
Tež młodostni sobu pomhali
Prěni ukrainscy ćěkancy do wokrjesa dóšli
Budyšin (SN). Prěni ćěkancy wójny na Ukrainje dla maja wot wčerawšeho swój přebytk we wokrjesu Budyšin. Połsta hłownje žonow, dźěći a młodostnych witachu w Budyskej wosadźe Jozuwy, hdźež su jich z jědźu zastarali a jim dalše pomocne poskitki rozłožili.
Wo přichadźe prěnich pomoc pytacych z nadpadnjeneho kraja rozprawja tež Christian Hoffmann, nowinski rěčnik Wojerowskeho měšćanskeho zarjadnistwa. Wosoby su mjez druhim přez priwatne styki do města přišli. Hromadźe ze swojim bydlenskim drustwom LebensRäume Wojerecy najprjedy 30 bydlenjow za ludźi z Ukrainy přewostaja.
Dźěło za demokratiju sylnić
Biblioteka Brigitty Reimann we Wojerecach je wobstajnje, tež w běhu koronapandemije, wažne zetkanišćo čitarjam, lubowarjam hrow kaž tež fanam hudźby a filmow.
Wojerecy (KD/SN). Maja Kos Jozak, nowa sobudźěłaćerka mjenowaneje biblioteki, kóždeho rady wita. „Wosobinske zajimy su wažne. Staroba, domizna, nabožina abo seksualna orientacija při tym žanu rólu njehraja“, wona podšmórnje.
Za Ukrainu darować
Budyšin (SN/CoR). Bywši wjelelětny nawoda Smochčanskeho Domu swj. Bena a předsyda towarstwa Ekumeniski tachantski wobchod Budyšin dr. Peter-Paul Straube hladajo na rusku wójnu w Ukrainje namołwja, za Ukrainu darować. Mnohe lěta pomhaja hižo w kooperaciji ze socialnej załožbu „St. Wolodymyr Fonds“ ukrainsko-katolskeje cyrkwje we Lwowje socialnje słabym, dźěćom, jatym a dźeń a bóle wot wójny potrjechenym a ćěkancam z wuchodneje Ukrainy. Štóž chce załožbu podpěrać, móže to z pjenježnym darom na towarstwowe konto Ekumeniskeho tachantskeho wobchoda DE33 8509 0000 5626 2110 05 při Ludowej bance Drježdźany-Budyšin, zaměr St. Wolodymyr Fonds Lviv/Lemberg. Darjenske wopisma budu wupisane. Pjenjezy na konto załožby w Pólskej dale posrědkuja.
„Rano sym z Drježdźanskim ukrainsko-katolskim fararjom telefonował, kiž je so dźens z Ukrainy nawróćił. Połoženje na mjezy je katastrofalne. Sym zrudny a nadźijam so, zo mnozy Ukrainjanam pomhaja“, rjekny Straube SN. Dźens wječor přeprošeja w Budyskej tachantskej cyrkwi na ekumeniske modlenje za měr.
Link dalši tydźeń přistupny
Budyšin (SN/at). Nimale 270 Serbowkow a Serbow je so na naprašowanju paralelnje k interviewam za Łužiski monitor 2022 wobdźěliło. Kaž Viktoria Klemm z Lipšćanskeje Towaršnosće za analyzu wikow a strategiju MAS zwr našemu wječornikej zdźěli, bě pak jeničce 70 naprašnikow dospołnje wupjelnjenych. 197 wobdźělnicow a wobdźělnikow njeje z přičin, kotrež njejsu slědźerjam znate, hač do poslednjeho łopjena přetrało.
Prěnjotnje měješe katalog prašenjow hač do předwčerawšeje njedźele w syći přistupny być. Termin pak bu wo tydźeń hač do 27. februara podlěšeny, knjeni Klemm informuje. Zamołwići Łužiskeho monitora chcedźa tak wšěch tych nastorčić, so snadź hišće raz z podatymi prašenjemi zaběrać, kotřiž to w prěnim pospyće dokónčili njejsu. Nadźijeja so tuž znajmjeńša sto dospołnje wupjelnjenych naprašnikow wuhódnoćić móc.
Sćěhowacy link płaći dale hač do njedźele, 27. februara:
Link bu runje tak po nutřkotowarstwowych kanalach Domowiny župam a sobustawskim towarstwam posrědkowany.
Sće so hižo wobdźělili?
Iniciatorojo Łužiskeho monitora spřistupnjeja Serbowkam a Serbam katalog prašenjow, zo bychu jako mjeńšina wobydlerstwa swój wid na aktualne łužiske wobstejnosće zapodali a naprašnik wupjelnili. Sćěhowacy link płaći jenož wobmjezowanje hač do njedźele, 20. februara:
