W starowni karty placali
Měli dom bóle na wědomje brać
Smochčanski Dom biskopa Bena Serbam bóle wuwědomjeć chce Pětr Brězan. 32lětny Smječkečan je něhdźe poł lěta za zarjadnistwo domu zamołwity. K jeho nadawkam słušatej hotelerija a gastronomija (Hoga).
Mjeztym poł lěta nawjeduje Smječkečan zarjadnistwo Domu biskopa Bena w Smochćicach. Mjeztym je so wón do swojeho dźěła zanurił a sej přehlad stworił.
Z wječornikom w cirkusu byli
Malešecy (SK/SN). Skupina dźěći azylowych požadarjow z přebywanišća w Delnjej Hórce dožiwichu minjenu sobotu popołdnju w Malešecach předstajenje cirkusa William. Nastork k tomu běchu Serbske Nowiny dali, kotrež přewostajichu swojim čitarjam darmotne zastupne lisćiki.
Mjez dobyćerjemi akcije serbskeho wječornika bě tež Kozelec swójba ze Stróže w Malešanskej gmejnje. Zapósłanc Sakskeho krajneho sejma Hajko Kozel (Lěwica) a jeho staršej, kotřiž maja hižo dlěši čas zwiski k domej za požadarjow azyla, so rozsudźichu swoje zastupne kartki dale dać a nimo toho na swoje kóšty dalše dźěći mjenowaneho domu na cirkusowe předstajenje přeprosyć a jim rjane popołdnjo zmóžnić. Pjatnaće dźěći ze Syriskeje a Afghanistana a hosćićeljo so tuž w Malešecach zetkachu. Cirkusowe předstajenje so dźěćom jara spodobaše. Na kóncu smědźachu samo w maneži na kamelach a konjach jěchać. Někotre dźěći ćěkancow, kotřiž su w Malešanskej gmejnje nowu domiznu namakali, chodźa w Barće do zakładneje šule.
Rotary-club dari
Kamjenska tafla zaso na městnje
Kamjenska tafla je zaso do swojeho stareho domicila zaćahnyła. Po tym zo bě woheń halu na Garnizonowym naměsće loni w januaru jara wobškodźił, dyrbjachu ju wobšěrnje saněrować.
Kamjenc (UM/SN). Nětko je hala znowa wužiwajomna a tafla zaso w njej zaměstnjena. Gabriele Tenne je dźakowna. „Zwólniwosć, nam po wohenju pomhać, bě jara wulka. Wšitcy su za jedyn postronk ćahnyli, sobu zapřimnyli a tež darili“, nawodnica wudawanišća a zastupowaca předsydka towarstwa Kamjenska tafla wujasnja. Při tym njebě po grawoćiwym wohenju scyła jasne, hač a kak dyrbi z wudawanjom zežiwidłow potrěbnym w Kamjencu dale hić. Tola hižo w februaru 2015 je mustwo wokoło Gabriele Tenne alternatiwu namakało a taflu přechodnje w njeposrědnjej bliskosći wobškodźeneje hale zaměstniło. A ludźo běchu za to jara dźakowni.
Dźěći z drastu zawjeselić
Princojo a princesny w radnicy
Młodostni projekty wuzwolili
Drježdźany (SN/mwe). 80 šulerjow z cyłeje Sakskeje je tele dny rozsudźiło, kotre projekty budu lětsa z programa „genialsocial – twoje dźěło přećiwo chudobje“ spěchowane. Woni su so z wjacorych požadanjow za štyri globalne projekty wuprajili. Kóždy z nich podpěruje so ze spěchowanskej sumu hač do 80 000 eurow.
W lětušej akciji budu šulerjo pjenjezy na dobro tychle projektow nadźěłać. Holcy a hólcy wuzwolichu strowotniski projekt na juhu Madagaskara, z pomocu kotrehož tam samodruhe a žony po porodźe medicinsce zastaruja. Dale podpěruje program „genialsocial“ lětsa twarski projekt w Indiskej, hdźež dóstanje dźěćacy dom nowu kuchnju za warjenje, kubłanski projekt w Ugandźe z nowym centrumom a twar noweje šule z ratarskim profilom za 1. do 7. lětnik w Tansaniji.
Na akciskim dnju „genialsocial – twoje dźěło přećiwo chudobje“ je so loni wjace hač 30 000 sakskich šulerjow wobdźěliło. Woni nadźěłachu 590 000 eurow. Mjez nimi běchu dorosćacy z hornjołužiskich kubłanišćow, kaž z Wojerowskeho gymnazija Johanneum, z Kulowskeje wyšeje šule „Korla Awgust Kocor“ a z wjacorych gymnazijow w Budyšinje a Kamjencu.
Měnjeja bjez zapłaćenja
Nowy poskitk socialnje słabym pod jednej třěchu z Budyskej taflu
Budyšin (CS/SN). Tak mjenowany měnjenski wobchod su wčera na Budyskej Fabrikskej čo. 50 wotewrěli. Tam poskićeja košle, bluzy, kabaty a pulowry runje tak kaž T-shirty. W 70 kwadratnych metrow wulkej rumnosći nadeńdźeš tohorunja domjacu nadobu, črije, hrajki a wjele dalšeho.
Wosebitosć měnjenskeho wobchoda je, zo tam ludźom twory bjez pjenjez přewostajeja. Štóž chce „nakupować“, měł wěcy, kotrež hižo njetrjeba, sobu přinjesć a smě sej za to něšto noweho wupytać. A hišće dalše wuměnjenje ma so spjelnić: Kupc dyrbi socialny pas města Budyšina wobsedźeć. Přetož poskitk noweho měnjenskeho wobchoda ma předewšěm socialnje słabym zmóžnić, na přijomne wašnje drastu abo domjacu nadobu dóstać. Na dźěło w měnjenskim wobchodźe su so žony, kotrež so wo njón staraja, dołhodobnje w projekće Powołanskeho dalekubłanskeho skutka (BFW) přihotowali. Wone pochadźeja wšitke ze statow něhdyšeho Sowjetskeho zwjazka, hłownje z Kazachstana. Na wčerawšim oficialnym wotewrjenju wobchoda so štyri z tychle žonow wobdźělichu.
