Sym šćěpjena
Z pomocy spokojenje začuwała
W kruhu swójby, susodow a wjele přećelow swjeći dźensa w Pančicach-Kukowje znata serbska zubna lěkarka Leńka Andersowa swoje 70. narodniny. W swojim powołanju je druhim runje tak pomhała, kaž činješe a čini to zwonka zubnolěkarskeje praksy.
Narodźiła je so jubilarka jako druhe wot šěsć dźěći Lebzec swójby w Koslowje. Šulski čas wjedźeše ju prěnje štyri lěta do Dobrošic, dalše štyri lěta do Róžanta. W Małym Wjelkowje wopyta Serbsku rozšěrjenu wyšu šulu. Na tónle čas dopomina so wosebje rady, na žiwjenje w internaće. Spočatnje chcyše Leńka ratarstwo studować. Wot toho pak jej jeje nan raznje wotradźowaše, wšako měješe sam hrózbne nazhonjenja z kolektiwizaciju w NDR. Tuž jej jeje wuj Jurij Kubica, tehdy zubny lěkar w Budyšinje, šćežku za zubnu medicinu runaše, za čož je jemu Pančičanka hišće dźensa dźakowna. Studowała je wona potom w Berlinje a Drježdźanach, hdźež je so rady na čiłym studentskim žiwjenju wobdźěliła.
Hdyž žony kolesować nawuknu
Ukrainjenjo swoju kulturu zbližili
Chorowni bórze dwě jednotce
Kamjenc/Zhorjelc (SN/at). Změna nošerja za dotalnej chorowni maltezow w Kamjencu a Zhorjelcu je wotzamknjena, wobě wčera zdźělištej. Towaršnosć za strowotu a zastaranje Sakska (GGS) je nošerstwo stejnišćow loni w nowembrje přewzała. Zo byštej domaj hospodarsce naslědnje derje nastajiłoj, ma kóžda z njeju jednotu tworić, dźěłatej pak dale hromadźe. Kamjenske stejnišćo změje mjeno Chorownja swj. Jana tzwr, Zhorjelske Chorownja swj. Carolusa tzwr.
Tale samostatnosć zwyši atraktiwitu za inwesticije, rěka w nowinskej zdźělence. Chorowni „budźetej jako kliniskej stołpaj nošer za mnohe medicinske poskitki a tak zastaranje ludźi w našim regionje kaž tež nadregionalnje zawěsćić“, wuzběhny Lutz Möller. Wón skutkuje jako jednaćel wobeju domow a nawoda Kamjenskeho stejnišća. Daniela Kleeberg wostanje nawodnica Zhorjelskeho stejnišća. Wukonowy poskitk wobeju chorownjow w połnym wobjimje wobchowaja.
Ručež přisłušne zarjada přihłosuja, rozdźělenje chorownjow do dweju samostatneju stejnišćow zwoprawdźa. Z tym w Kamjencu a Zhorjelcu prawje bórze liča.
Žónski centrum je městnosć žiweho runostajenja
Budyšin (CS/SN). „Hodźinski plan“ Budyskeho Žónskeho centruma na Budyskej Kamjentnej je derje pjelnjeny. Społnomócnjena za runostajenje města Fränzi Straßberger a nawodnica centruma Sabrina Baumann so wjeselitej, zo je po přestawce korony dla zaso móžno zarjadowanja poskićeć. „Ći, kiž poskitki wužiwaja, su so wo to starali, zo je telefon po zahajenju dźěławosće wobstajnje klinkał“, tak Sabrina Baumann, „runje starši a samostejace žony su kontaktnych zakazow a lockdowna dla ćerpjeli. Nětko móža zaso poskitki kaž žónsku snědań wužiwać.“
Hižo pjaty króć „Zadarmo a wonka“ w Budyšinje
Budyšin (SN/bn). Pod hesłom „Zadarmo a wonka“ wuhotuje Dźěćacy a młodźinski centrum Budyskeje ewangelskeje wosady swj. Pětra TiK – „Zetkanišćo w pincy“ stajnje kónc junija festiwal pod hołym njebjom. Lětsa swjećachu na dworje wosadnicy prěni mały jubilej „MiKtival“ mjenowaneho zarjadowanja, kotrež so pjaty króć wotmě. Hižo wot zažneho popołdnja wužichu předewšěm młode swójby wobšěrny poskitk zabawy. Tak dachu so dźěći a někotryžkuli dorosćeny pisanje našminkować, druzy wuspytachu so w eksperimentalnym laborje w lejtowanju. Za dorostowych wuměłcow bě grafiti-sćěna spřihotowana. Formacija Francircus zahori hosći z artistiku a figurowymi powětrowymi balonkami. Modowy label LABA prezentowaše fairnje a naslědnje w Hornjej Łužicy produkowane drasty tež ze serbskimi motiwami a popisami.
Funguje „lěpje hač wočakowane“
Platforma Digiserb bě z hosćićelom wirtuelnje wuhotowaneje podijoweje diskusije, w kotrejež wobłuku direktor Załožby za serbski lud Jan Budar a społnomócnjeny samsneje institucije za digitalizaciju Daniel Zoba wo najnowšich wuwićach a wuhladach nastupajo serbšćinu w cyber-swěće informowaštaj. Ćežišćo wčerawšeho zarjadowanja bě slědźenski projekt za mašinelne spóznawanje rěčow.
Wotmołwa njespokoja
Na schodach před Budyskim krajnoradnym zarjadom sedźeše wčera Wojerowski farar Jörg Michel a je z hłodowym stawkom na njedostatki krajnoradneho zarjada skedźbnił. Stajił je pódla so plakat z napisom „Knježe krajny rada, čakam na wotmołwu!“
Budyšin/Wojerecy (SN/MiR). Ze swojej akciju, kotruž je mjeztym hižo zakónčił, kritizowaše Wojerowski farar a rěčnik wobydlerskeho zwjazka „Wojerecy pomhaja z wutrobu“, zo je Budyski zarjad za wukrajnikow wosobinske daty třećim spřistupnił a zo njeje narunał financnej požčonce ewangelskeje cyrkwje prošacymaj wo azyl. Farar Michel bě wjackróć pisomnje na to skedźbnił, wotmołwy pak njedóstał.
