Nowe rumnosće zbrašenym
Pančicy-Kukow (SN/MWj). W bywšim bydlenskim domje na tak mjenowanym Kukowskim dworje so připowědźeja klětu a 2021 wobšěrne twarske dźěła. Klóšter Marijina hwězda móže tam přidatne wučbne rumnosće za swoju spěchowansku šulu wutworić. Dohromady chce klóšter za nje w přichodnymaj lětomaj nimale 700 000 eurow nałožić.
Za projekt je přirjadnica Budyskeho krajneho rady Birgit Weber abatisy Gabrieli Hesse minjeny pjatk spěchowanske přizwolenje přepodała. Srědki pochadźeja z programa „Witalne wjesne srjedźišća“ sakskeho ministerstwa za wobswět a ratarstwo. Tak spěchuje wone 75 procentow twarskich kóštow, potajkim něšto wjace hač 510 000 eurow. Kaž zarjadniski nawoda klóštra Chrystof Mikławšk rozłoži, nastanu w dotal njewužiwanym domje mjez druhim rumnosće za ručne dźěło. Tak so wuměnjenja za šulu jara polěpša.
Hižo nětko so wjesela
To je dobra powěsć wšitkim, kotřiž so hdys a hdys po Lipju w Pančicach-Kukowje wuchodźuja, zo chce tamniša dźěłarnja swj. Michała z pomocu mjezu přesahowaceho projekta tam zaso móst přez Młynsku hrjebju k pomnikej Jakuba Barta-Ćišinskeho natwarić. Něhdy mějachu tam samo wjacore mosty, naposledk jenož hišće jedyn. Ale tež tón bě po lětach dodźeržany, tak zo dyrbjachu jón wotstronić. Mjez tymi, kotřiž so nětko na nowy móst wjesela, su tohorunja čłonojo Domowinskeje skupiny Pančicy-Kukow. Woni mjenujcy dwójce wob lěto – krótko do jutrow a krótko do klóšterskeho swjedźenja – kołowokoło pomnika Ćišinskeho rjedźa. Minjene lěta dyrbjachu sej stajnje prowizoriski mosćik stajić, zo móhli zhrabane lisćo při pomniku na tamny bok hrjebje dowjezć, hdźež wšitko na připowěšak składźechu. To póńdźe po nowym mosće zawěsće jednorišo.
Marian Wjeńka
Z jednym mostom twarja hnydom dwaj
Pančicy-Kukow (RL/SN). Tři dny dźěłachu zbrašeni dźěłarnje swjateho Michała w Pančicach-Kukowje a Wustawa powołanskeho aktiwizowanja w Świerzawje blisko Jelenjeje Góry zhromadnje na drjewjanym mosće. Tón chcedźa w Lipju nad Młynskej hrjebju připrawić a tak přistup k pomnikej Jakuba Barta-Ćišinskeho zaso wolóžić. Hižo wjacore lěta tam žadyn móst njeje. Wjace hač dźesać zbrašenych z Pólskeje a Němskeje je minjeny tydźeń pod nawodom Steffena Wjacławka drjewo šmirglowało a barbiło. Tak zmištrowachu woni praktikum we wobłuku projekta „Educatio, Repetitio, Labora“ (wukubłanje, nazhonjenje, dźěło), kotryž Europska unija spěchuje. Wotpowědny kooperaciski program Interreg mjez Pólskej a Sakskej, při kotrymž dźe wo kubłanje zbrašenych w euroregionje Nysa, traje hišće hač do klětušeho.
Jazz so z Bachom zetkał
We wobłuku tuchwilneho wuměłstwoweho projekta „Swětło pozbudźa“, kotryž běchu popjelnu srjedu w Budyskej tachantskej cyrkwi zahajili, wotmě so minjenu sobotu w tudyšej Serbskej cyrkwi wosebita duchowna hudźba. A wona je njewšědnje wjele wopytowarjow do Božeho domu přiwabiła.
Budyšin (CRM/SN). Zajim na hudźbnym nyšporje w cyrkwi Našeje lubeje knjenje do prěnjeje póstneje njedźele běše dosć wulki. „Dajmy so zaso k rozmyslowanju pozbudźić“, praji tachantski farar, dekan Wito Sćapan, při serbskim a němskim witanju. A wězo běchu interpreća kaž magnet skutkowali. Nimo Anny Batz (spěw), Philippa Adama (gitara) a Terenca Lohra (bijadła) běchu to předewšěm Jan Brězan za e-pianom, Józef Brězan jako dalši gitarist a cyrkwinski hudźbny direktor Friedemann Böhme na pišćelach, kotřiž njeběchu jenož Budyšanow, ale tež mnohich fanow ze serbskich wsow přiwabili. Nimo toho bě to zdobom jedyn z mnohich přinoškow k wobšěrnemu ekumeniskemu projektej „Swětło pozbudźa“.
Prěnje dźěła za nowy hospic
Wokrjes Zhorjelc je pućrubar
Wjace hač 60 wustajerjow na prěnich integraciskich wikach w Lubiju
Lubij (AK/SN). Rěčne znajomosće, krute trajne dźěło a kulturne zetkanja su připućowarjam kluč za poradźene zarjadowanje. To su prěnje integraciske wiki Zhorjelskeho wokrjesa wčera w Lubiju wuwědomili. W tamnišej wikowej hali bě 60 wustajerjow z hospodarstwa, kubłanja, zarjadnistwa, towarstwow a zwjazkow. Hesło rěkaše „Přińć a we wokrjesu Zhorjelc žiwi być“. Patronat přewzała bě Petra Köpping (SPD), sakska ministerka za runostajenje a integraciju.
Pytaja tež serbske hóstne swójby
Wjele lět su swójby w Pančicach-Kukowje a wokolinje dźěći z Černobylskeho regiona hospodowali. Nětko Kamjenske Černobylske towarstwo znowa hóstne swójby pyta.
Kamjenc (SN). Dwaceći dźěći ze zaprudźenych wsow běłoruskeho wokrjesa Buda-Košeljowo přežiwi lětsa w lěću na přeprošenje Kamjenskeho Černobylskeho towarstwa tři tydźenje w Kamjencu jako dožiwjenjowpołny prózdninski čas. Runja zašłym lětam budu so wone při sportowych a druhich zaběrach wočerstwjeć, podadźa so na wulětaj do Drježdźan a do Sakskeje Šwicy, pućuja do wokoliny Lessingoweho města a dožiwja zajimawe zetkanja z němskimi kaž serbskimi dźěćimi.
Za klóšterski dom so mnozy zajimowali
Budyšin (CS/SN). Claudia Zaremba, pochadźaca z Pančic-Kukowa a dźensa w Budyšinje bydlaca, wjeseli so na swój nowy nadawk jako nawodnica dnjoweho hladanja w nowym zarjadnišću Advita při Budyskej tachantskej cyrkwi. Na dnju wotewrjenych duri w tak mjenowanym něhdźe 300 lět starym klóšterskim domje, měješe Serbowka minjenu sobotu na wjele prašenjow wotmołwjeć. Dnjowe hladanje je zaměstnjene na delnim poschodźe twarjenja, kotrež bě nimale 20 lět prózdne stało. Nětko su je wobšěrnje restawrowali. W naposledk jako běrow wužiwanym domje nasta dohromady 16 bydlenjow z wobstajnym hladanjom. Dnjowe hladanje je wobydlerjam runje tak kaž wopytowarjam wotwonka přistupne. Jeho srjedźišćo je přijomna kaminowa stwa. Pódla njeje je kuchnja, hdźež móža starši ludźo zhromadnje warić a jěsć. Dalše rumnosće pod wjelbowanymi wjerchami skića móžnosć, woměrje čitać a so wočerstwić.
Maltezojo z dobrej bilancu
Kamjenska chorownja pomocny transport do Bołharskeje podpěrała
Kamjenc (SN/mwe). Chorownja maltezow swj. Jana w Kamjencu móže na dobru bilancu lěta 2018 zhladować. Tak su tam něhdźe 300 pacientow wjace hač lěto do toho zastarali – přepytowali, lěkowali a hladali. Mjez lěkarjemi, chorobnymi sotrami, babami a dalšimi kaž tež pacientami su mnozy Serbja. Wjednistwu domu je tuž wažne w chorowni tež serbsku rěč pěstować a nałožować, zo móža so schorjeni, młode maćerje runje kaž wopytowarjo z personalom w swojej maćeršćinje rozmołwjeć. „Naši pacienća sej chorownju waža a so derje čuja, hdyž móža serbsce rěčeć, zo jich rozumja“, informuje Ines Eifler z nowinskeho a zjawnostneho dźěła Kamjenskeje chorownje.
Zmužitosć za wjac žiwjenskeje kwality wuprudźeć
Hedwig a Peter Fritsch wopisujetaj turistiske puće za slepych a špatnje widźacych a pohnuwataj dalšich k sobudźěłu
Metalowy płót z kerčiznu wobhrodźa Jězorowy hotel. Hedwig Fritsch w Ranju (Großräschen) móže jón słyšeć. „Nalěwo při započatku metaloweho płotu je našik (Schräge) dele. Tón wužiwamoj mój. Orientujemoj so po zepěranskej muri při nachilacej so šćežce, doniž so nachilenje a zepěranska murja njekónčitej“, wopisujetaj wona a jeje mandźelski Peter puć wot Jězoroweho hotela k přistawnemu mostej. Hedwig a Peter Fritsch staj wobaj hižo mnohe lěta slepaj – stenotypistka a programěrarka za předźěłanje elektroniskich datow Hedwig Fritsch hižo wot 2. žiwjenskeho lěta, jeje muž, chemikar dr. Peter Fritsch, mjeztym dlěje hač třiceći lět.
