Poskićeja tež běrny z twarohom
Bluń (FAG/SN). Dohromady 36 lět nawjedowaše Klaus Jurk w Blunju swój hosćenc „K załoženju“ direktnje při zwjazkowej dróze B 156. Mjeztym je tam z 33lětnej naslědnicu Mandy Meister z Čorneje Pumpy nowa generacija zaćahnyła. Lětsa w januaru wona hosćenc přewza a wjedźe jón runja předchadnikej jako swójbne předewzaće. Byrnjež sama swójbu z třomi małymi dźěćimi měła, je wona přeswědčena, zo tónle nadawk z pomocu podpěry ze swójskich rjadow zmištruje. „Ja rady ludźom napřećo du a spytam k nim wutrobny poměr měć. Nochcu jich jenož posłužować, ale z nimi tež raz pobjesadować“, powěda sympatiska žona.
Wuběr jědźow je hosćencarka wot swojeho předchadnika mjenje abo bóle přewzała. Na jědźnej karće steji wjace hač 20 wšelakich jědźow z wobłuka swójbneje kuchnje. Nowosć su běrny z twarohom a wjetši wuběr solotwjow. Sobu najwoblubowaniša pak je Bärbelowa burska snědań, přetož hižo 26 lět je kuchnja w režiji 63lětneje Bärbel Hensel.
Nowy móst zhromadnje twarili
Pomnik Jakuba Barta-Ćišinskeho dyrbješe sej nimoducy w Lipju w Pančicach-Kukowje minjene štyri lěta z trochu zdalenosće wobhladać, dokelž nad Młynskej hrjebju žadyn móst njebě. Wot wčerawšeho tam zaso jedyn je.
Pančicy-Kukow (SN/MWj). Mosty su zdawna rjane přirunanje za zwiski mjez ludźimi, krajemi a ludami a su wuraz zwjazanosće a zhromadnosće. Tule symboliku začuwachu wčera tež w Lipju w Pančicach-Kukowje, jako tam nowy drjewany móst nad Młynskej hrjebju přepodachu. Nastał je wón w zhromadnym projekće dźěłarnje swjateho Michała w Pančicach-Kukowje a Wustawa powołanskeho aktiwizowanja w Świerzawje blisko Jelenjeje Góry, kotryž Europska unija spěchuje. Hudźbnje wobrubił je wčerawšu swjatočnosć chór Šule Ćišinskeho. A dźěći njejsu jeno serbsce a němsce, ale tež jendźelsce spěwali.
17 staršiskich domow z jich dohromady 18 dźěćimi, kotrež běchu ...
Krótkopowěsće (11.04.19)
Liča hižo bórze z wuslědkom
Drježdźany. Druhu tarifowu rozmołwu nastupajo přiměrjenje dźěłoweho časa na wuchodźe Němskeje přewjedźechu dźěłarnistwo IG metal a zastupjerjo dźěłodawarjow metaloweje a elektroindustrije wčera w Drježdźanach. Hišće w prěnim połlěće móža dźěłopřijimarjo branše z wuslědkom jednanjow ličić, kaž wobě stronje měnitej.
Podruž tež tema w Sakskej
Drježdźany. Sakski krajny sejm je dźensa z plenarnym posedźenjom w Drježdźanach pokročował. Wobswětowy minister Thomas Schmidt (CDU) přednjese deklaraciju k přichodnej wobswětowej politice Sakskeje. W aktualnej debaće rozestajachu so zapósłancy ze zapłaćomnymi podružemi a ze spěchowanjom socialnych bydlenjow.
Wurisanje z 22 wobdźělnikami
Policija (10.04.19)
Šulerjo wopiteho lepili
Wulke Ždźary. Zhromadnje ze šulerjemi je policija zawčerawšim před Wulkoždźarowskej Zakładnej šulu spěšnosć awtow měriła. Z 21 kontrolowanych šoferow běchu štyrjo přespěšni. Mjez nimi bě 60lětny wodźer Citroëna, kiž wosom km/h přespěšnje nimo šule jědźeše. Bóle grawěrowace hač tele přeńdźenje pak bě, zo měješe muž napadnu alkoholowu chorhojčku. Pola njeho naměrichu 1,64 promilow alkohola w kreji, a to hižo w 7.30 hodź. Jeho jězbna dowolnosć je wězo fuk.
Horce boje za kickerowymi blidami
Jutře na knižnu premjeru
Budyšin. Štwórtk, 11. apryla, w 19.30 hodź. předstaji so w Budyskej Smolerjec kniharni literarny dorost. Awtorki a awtorojo Paternostra čo. 8 su Annamaria Hadankec, Judith Handrikec, Božena Hojerec, Kira Hrjehorjec, Cecilija Neterec, Halina Pohončec, Julia Šnajderec, Luiza Šubertec, Clemens Bobka, Fabian Brycka, Michał Donat, Damian Dyrlich a Pětr Dźisławk.
Zaběraja so z biowudźěłkami
Njebjelčicy. Marketingowe strategije, sebjepomocne koncepty a móžnosće direktneho zwičnjenja ratarskich biowudźěłkow steja w srjedźišću informaciskeho zarjadowanja jutře, štwórtk, w 19 hodź. w Njebjelčanskim gmejnskim centrumje. Mjez iniciatorami wječora staj ratarski poradźowar Jens Gülde a předewzaćelski poradźowar Hubert F. Lange. Zajimcy su wutrobnje witani.
Za podpěru trjebaja wěstotu
Rada Njeswačanskeje gmejny pomha dom kata zachować
Njeswačidło (JK/SN). Wulka ličba čłonow Njeswačanskeho Towarstwa přećelow domizny a kultury pokaza na wčerawšim posedźenju gmejnskeje rady na to, zo maja něšto na wutrobje. Předsyda Dieter Petschel předstaji koncepciju iniciatiwneje skupiny, zdźeržeć dom kata na Lišej horje. „Je najwjetši čas, dom zachować a rozmyslować, jón na nowe městno přestajić“, Petschel rjekny, złožujo so tež na wuprajenje a posudk fachowcow. Čłon załožby za tykowane domy ze stołom Arnd Matthes prócowanja towarstwa, zdźeržeć jónkrótnu chěžu wobkrući. Wona je najstarša swojeho razu w Sakskej a hódna, zo ju zachowaja.
Šulerjo wustupja w cirkusu
Worklecy (aha/SN). Zo móža dźěći w starobje sydom do jědnaće lět hłowni akterojo w cirkusu być, dopokazaja jutře a pjatk wuknjacy Serbskeje zakładneje šule „Michał Hórnik“ Worklecy. K nim přijěł je cirkus Rolandos z Herzberga, kotryž bu 1986 załoženy a mjeztym hižo nimale dwaceći lět šulerjow za dźěło w maneži pod cirkusowej kuplu zahorja.
Minjenu sobotu je cyłk swójbneho cirkusoweho předewzaća pod nawodom Rolanda Krämera a z podpěru staršich na Worklečanskim šulskim sportnišću wulki stan natwarił. Póndźelu přirjadowachu dźěći jednotliwym skupinam, kaž kuzłarjam, klawnam, artistam a dalšim.
Za lift hinaše rozrisanje trěbne
Za přetwar běrowoweho twarjenja zarjadniskeho zwjazka Při Klóšterskej wodźe su nětko takrjec w horcej fazy přihotow. Tam ma samo krajny kriminalny zarjad wažne słowčko sobu rěčeć.
Pančicy-Kukow (SN/MWj). Hač do 15. apryla ma tak mjenowany naćiskowy twarski plan za přetwar běrowoweho twarjenja zarjadniskeho zwjazka Při Klóšterskej wodźe w Pančicach-Kukowje hotowy być. Potom slěduje hač do spočatka meje wukonjenski plan. 10. meje ma prěni zapis jednotliwych dźěłow předležeć, štož chcedźa něšto dnjow pozdźišo wozjewić. 22. julija móhli z poprawnymi twarskimi dźěłami započeć. Tónle časowy wotběh předstaji planowar Stanisław Statnik na wčerawšim posedźenju zastupjerjow pjeć zwjazkej přisłušacych gmejnow.
