Krótkopowěsće (07.07.21)
Wotchadnicy zaso swjeća
Budyšin. Absolwenća serbskich wyšich šulow a Budyskeho Serbskeho gymnazija smědźa pod wolóženymi wuměnjenjemi pandemije lětsa zaso wotchadnički swjećić. 17. julija chce nawoda gymnazija René Wjacławk lětušim wotchadnikam, zhromadnje z wučerjemi w Němsko-Serbskim ludowym dźiwadle abiturne wuswědčenja přepodać. Na to slěduje abibal w Chróšćanskej „Jednoće“, kotryž maturanća nětko po hygienowym koncepće přihotuja.
Wjetšina komunow bjez korony
Budyšin. W 43 mjez 57 komunami Budyskeho wokrjesa žadyn koronapad wjace njeje, krajnoradny zarjad wčera zdźěli. Dotal je wjace hač 110 000 wobydlerjow jónu pře koronu šćěpjenych, 85 000 dospołnje. Incidenca po Roberta Kochowym instituće we wokrjesu wučinja dźensa 1,3. Zhorjelski wokrjes ma po RKI druhi dźeń incidencnu hódnotu nul.
Srědki za cyłodnjowske poskitki
Čitanski dyrdomdej
Budyšin. Rěčny centrum WITAJ přeproša na čitanski dyrdomdej, kotryž wotměje so lětsa na Budyskich wěžach. Pjatk, 9. julija, přewjedźe RCW znowa w kooperaciji z Němsko-Serbskim ludowym dźiwadłom z 20 šulerjemi 3. a 4. lětnika serbskich šulow wosebite čitanje. W starym měsće wopytaja wobdźělnicy tři wšelake wěže, zhonja wo jich stawiznach a čitaja sej na wěžach mjez sobu ze swojich najlubšich serbskich knihow. Piknik, zabawne hry a kónčny kwis zhromadne dožiwjenja skulojća. Na prašenja wotmołwja Michaela Hrjehorjowa w RCW pod telefonowym čisłom 03591 /550414.
Wuznamjenja najlěpše ideje
Kulow. Dobyćerjo idejoweho wubědźowanja Leaderoweje kónčiny Hornjołužiska hola a haty 2021 přijmu swoje myto tónle pjatk, 9. julija, w 10 hodź. při Krabatowej steli na Kulowskim torhošću. Tam prezentuja potom tež dobyćersku ideju „Bachtać ze Šajatovićom“. Wšitcy zajimcy, kotřiž chcedźa z časom być informowani, su přeprošeni. Wothłós na wubědźowanje k sylnjenju małeje turistiskeje infrastruktury běše chětro wulki. Dóšło je 22 přinoškow z cyłeho regiona.
Policija (06.07.21)
Třo ćežko zranjeni při njezbožu
Horni Wujězd. Při najězdźe Horni Wujězd na awtodróhu A 4 do směra na Drježdźany je wčera wokoło 11 hodź. k ćežkemu njezbožu dóšło. Šoferka wosoboweho awta VW Touran přewidźa při wotbočenju na A 4 napřećo jěducy Škoda, kotryž měješe předjězbu, a zrazy do njeho. Tři wosoby so při tym ćežko zranichu, tři dalše lochko. Wohnjowi wobornicy z Hornjeho Wujězda a z Jědlicy kaž tež policija běchu spěšnje na městnje. Za čas wobdźěłanja njezboža dóńdźe do wšěch směrow ke kopjenju wobchada, dokelž je tež Porchowski najězd na A 4 twarskich dźěłow dla zawrjeny.
Zesylnjak přećow jězdźi po łužiskich pućach
Traktor tukoce po dróze a z pryskawy ćeče čista woda. To wšak njeje žadyn wosebity napohlad – tež dźensa nic, byrnjež skerje hightech-mašiny wočakowali. Ručež pak ze staršeho modela traktora woda na asfalt wopřijeća a jednotliwe słowa pisa, so za nim jěducy dźiwa. Akcija „Njech so wšitke Twoje přeća spjelnja“ je njewšědna.
Budyšin/Mały Wjelkow (SN/MiR). Projekt Mobil přećow (WunschMobil) słuži jako test za nowy němsko-serbski přełožowanski portal sotra, kotryž tuchwilu nastawa. Wón kóždeho přeproša pósłać iniciatorej Mikej Salomonej swoje přeća w digitalnej formje. „Te potom posłownje w němskej a serbskej rěči direktnje na puć pisamy“, wón powěda. „Naše čornidło je jasna woda. Wobkedźbować pak zajimc dyrbi, zo smě kóžde přeće maksimalnje 160 znamješkow měć. Wězo móže mi kóždy tež wjacore přeća pósłać. Pryska so jenož tekst přeća. Mjeno wotpósłarja so na dróze njejewi.“
Njespokojnosć dale wulka
Gmejnska rada Slepo wobtwarjenske plany za wysokonasyp schwaliła
Slepo (CK/SN). Wysokonasyp w Mułkecach ma so wobtwarić. Za to je Slepjanska gmejnska rada wčera na wosebitym posedźenju z wjetšinu hłosow wobtwarjenske plany wobzamknyła. Na wuchodnym nasypje chce Mnichowska firma Kronos Solar Projects GmbH solarny park natwarić. Podobny wotpohlad ma Solizer GmbH & Co. KG Hamburg na zapadnym nasypje, podłu železniskeje čary Sprjewiny Doł–Slepo kaž tež při Slepjanskej přepinarni.
Radnicowa wěža w nowym błyšću
Wěža Grodkowskeje radnicy ma nětko zaso rjany napohlad. Wona je hač na hišće małe trěbne dźěła dosaněrowana. Róšty su dźěłaćerjo mjeztym wotstronili.
Grodk (JoS/SN). Štyri tydźenje je trało, prjedy hač běchu róšty při wěži wottwarjene. Kusk po kusku jewješe so na te wašnje jeje nowy napohlad. Saněrowanje je mjeztym dokónčene, a Grodk ma dalši atraktiwny objekt, swědčacy wo stawiznach města za wobydlerjow a jich hosći, kotrychž je nětko w lěćnej sezonje zaso dźeń a wjace.
Towarstwo United Clubs for Kulow zahajichu swoju lětušu sezonu ...
Móžna skóržba naležnosć sejmika
Budyski wokrjesny sejmik móhł na swojim posedźenju 19. julija wo tym rozsudźić, hač wokrjes Budyšin přećiwo rozsudej sakskeho kultusoweho ministerstwa skorži, we wobłuku noworjadowanja powołanskeho wukubłanja pjekarjow a frizerow jenož hišće w Zhorjelcu wukubłać.
Budyšin (SN/at). Wo móžnej skóržbje zhonichu Serbske Nowiny z kruha wobdźělnikow njedawneho njezjawneho posedźenja kulturneho a kubłanskeho wuběrka. Tam běchu zastupjerjo kultusoweho ministerstwa wokrjesnym radźićelam swój rozsud wujasnili. Při tym złožowachu so po słowach wobdźělnikow hłownje na ze swojeho wida komplikowany nadawk, docpěć wotwažowany rozsud za potrjechenej wokrjesaj. Krajnoradny zarjad rěčeše wo konstruktiwnej rozmołwje w kulturnym a kubłanskim wuběrku. Wotmołwjene pak njeje na tam načate prašenje, w kotrej měrje buchu z rozsudom zwjazane serbske zajimy na zakładźe serbskeho zakonja a sakskeje wustawy wobkedźbowane. Tomu su so zastupjerjo ministerstwa wuwinyli, rěkaše z kruha wobdźělnikow.
Krótkopowěsće (06.07.21)
Incidenca w Zhorjelcu nul
Budyšin. W Budyskim wokrjesu informowachu wčera wo dwěmaj koronanatyknjenjomaj a třoch smjertnych padach – wšitke jako dodawanja. Incidenca po Roberta Kochowym instituće je tu dźensa 2,0. Zhorjelski wokrjes njeje wot minjeneje soboty wo žanej nowoinfekciji a žanym zemrětym rozprawjał. Incidenca je tam dale woteběrała, po RKI je to jenički wokrjes w Sakskej z nulowej incidencu.
Nowa šulska nawodnica
Radwor/Chrósćicy. Radworsku wyšu šulu „Dr. Marja Grólmusec“ budźe wot přichodneho šulskeho lěta Diana Wowčerjowa nawjedować. Na Chróšćanskej zakładnej šuli „Jurij Chěžka“ pytaja dale za nowym nawodu respektiwnje nowej nawodnicu. Přechodnje ma ju nawodnica Ralbičanskeje zakładneje šule Andrea Liehnowa nawjedować.
Prěni raz z kmótom
Kołowokoło wjesnjanosty
W zwisku z komunalnym dźěłom w městach a gmejnach nastawaja zas a zaso prašenja, čehodla wobsteja wěste rjadowanja, kak je to a tamne zakonsce předpisane a štó ma poprawom kotre prawa. Na tajke a podobne prašenja wotmołwjamy w małej seriji. Naš awtor je bywši wjelelětny předsyda zarjadniskeho zwjazka Při Klóšterskej wodźe Alfons Ryćer. (5)
