Přirodnu kupjel bórze wotewru
Hač budźe lětsa w lěću scyła móžno so w zjawnej kupjeli wočerstwjeć, je wulke prašenje. Přiwšěm město Běła Woda za swoju kupjel pjenjezy přewostaji a hižo nětko sezonu planuje.
Běła Woda (AK/SN). Jahnowa přirodna kupjel w Běłej Wodźe ma hižo bórze wopytowarjow witać. Wobhospodarjeć chce ju w lěće 2021 město Běła Woda same. Za to přewostaji wone 30 000 eurow ze swojeho komunalneho etata, kaž měšćanscy radźićeljo na swojim zašłym posedźenju wobzamknychu.
Kupjel běchu w lětomaj 2019 a 2020 ze spěchowanskimi srědkami z Europskeho fondsa za regionalne wuwiće přetwarili. Zo bychu po přetwarje wobhospodarjenje zaručili, měšćanscy radźićeljo hižo lěta 2018 wobzamknychu, zo měło město 30 000 eurow za kupjel přewostajić. Tule sumu su do lětušeho hospodarskeho plana zapřijeli. Na přichodnym posedźenju w meji dyrbja so radźićeljo wospjet z Jahnowej kupjelu zaběrać a potom wustawki wo popłatkach wobzamknyć.
Z wosebitym nyšporom zakónčichu minjeny pjatk swětłozwukowu ...
Wjetšej škodźe zadźěwali
Žadanja w zajimje ludnosće
Biskopicy (SN/at). Přesunjenja koronapandemije dla w Budyskim wokrjesnym zwjazku Budyšin Swobodnych wolerjow dale z wulkej starosću sćěhuja. Wokrjesne předsydstwo je tohodla tři minimalne žadanja formulowało, wo kotrychž informowachu wčera w nowinskej zdźělence. Tudyši Swobodni wolerjo su přećiwo kóždemužkuli wobmjezowanju, bydlenje wopušćić. Gastronomiske zarjadnišća maja hnydom zaso wočinić. Při tym wobsteji winowatosć nahubnik wužiwać, wotstawki dodźeržeć a koncentraciji aerozolow zadźěwać. Wotewrěć dyrbja dale sportowe a wólnočasne připrawy pod hołym njebjom.
„Wot nazymy postajene zawrjenja w gastronomiji, sportowych připrawow kaž tež wuchodowe a kontaktne wobmjezowanja we wonkownych wobłukach su ludnosć dźeń a bóle do priwatneho wobłuka nuzowali. Z tajkimi njepřihódnymi naprawami je so pandemija prawdźepodobnje hišće přiwótřiła, z čimž dyrbi nětko kónc być. Nadźijamy so dosć konstruktiwneje debaty w zwjazkowym sejmje a w naslědnym jednanju w Zwjazkowej radźe“, w informaciji dale rěka.
Krótkopowěsće (19.04.21)
Ličba natyknjenjow dale přiběra
Budyšin. W Budyskim wokrjesu informowachu wot pjatka hač do wčerawšeho wo 323 dalšich natyknjenjach z koronawirusom. Ličba smjertnych padow powjetši so wo tři na 823. Kaž sobotu rěkaše, su dotal we 80 testowanskich centrumach 40 000 spěšnotestow přewjedli. Incidenca wučinja po RKI dźensa 256,5. We wokrjesu Zhorjelc rozprawjachu wčera wo 28 dalšich koronainfekcijach. Tamniša incidenca je po RKI dźensa 248,1.
Testowanski centrum w NSLDź
Budyšin. 23. apryla wočinja w Budyskim NSLDź testowanski centruma. Słužić ma wón jako zakład za modelowy projekt w měsće. W socieće na Burskej hasy móža so wšitcy darmotnje na koronawirus testować dać, trěbna za to je chipowa kartka chorobneje kasy. Terminy su móžne na internetnej stronje . App „Schnelltest.click“ wo wuslědku testa informuje.
„Łužiskohórski spěšnik“ po puću
Zadołženje na wobydlerja dale woteběra
Radwor (SN/MkWj). Financne połoženje gmejny steješe w srjedźišću srjedowneho posedźenja Radworskeje gmejnskeje rady. Komornica Melanie Mihan měješe dosć wobšěrnu prezentaciju přihotowanu, zo by radźićelow a hosći informowała. Gmejna chcyła nimale runje telko wudać, kaž ma dochodow. Te ma gmejna předewšěm z klučowych připokazankow swobodneho stata, z podźěla na wjacehódnotowym dawku, z přemysłoweho dawka a z ležownostneho dawka. Koronapandemije dla su straty pola přemysłoweho dawka tónraz wosebje bolostne: Dochody woteběrachu loni wot 1,1 miliona na runje hišće 110 000 eurow, komornica rozłoži.
Dobyćerjo jutrowneje křižowki
Na awtodróze twarja
Horni Wujězd. Saněrowanskich dźěłow dla budźe wotjězd z awtodróhi A 4 w Hornim Wujězdźe přichodny tydźeń dwójce zawrjeny. Wutoru, 20. apryla, dźěłaja na wotbóčce do směra na Zhorjelc, nazajtra do směra na Drježdźany. Wobjězdka budźe wupisana, wona powjedźe do Zhorjelca přez Słonu Boršć a do Drježdźan přez Porchow.
Poskića kubłanski tydźeń
Smochćicy. Pod hesłom „Mjenje stresa – wjace wjesela“ přeproša Smochčanske kubłanišćo swj. Bena za tydźeń wot 28. awgusta do 4. septembra na swójbny kubłanski tydźeń. Nimo zetkanjow a hrow dóstanu starši pokiwy k wšědnemu dnjej w swójbje z dźěćimi wot třoch lět. Při tym póńdźe hłownje wo kubłanski stil a wo potrjeby dźěći. Tydźeń wobrubja z pisanym programom wšelakich akcijow, kotrež su temje wobsahowje přiměrjene. Za čas seminarow za staršich poskića dźěćom wosebity program. Přizjewjenja přijimuja internetnje pod www.bildungsgut-schmochtitz.de abo pod telefonowym čisłom 03 59 35 / 2 23 17.
Policija (16.04.21)
Poskićena pomoc wobšudnistwo była
Chrjebja. 5 000 eurow škody poćerpjeł je muž w Chrjebi, kiž sta so z woporom wobšudnika po telefonje. Cuzy bě so jako serwisowy sobudźěłaćer za program Windows wudawał a zdźělił, zo bu konto 62lětneho manipulowane. Zo móhł to sporjadkować, měješe Chrjebjan swoje daty za onlinebanking sposrědkować, zo hodźała so wěstota konta přepruwować. Při telefonje 62lětnemu ničo njenapadny. Hakle wječor wón zwěsći, zo na jeho konće pjenjezy pobrachuja. Na to je wón konto nablaku zawrěć dał a policiju informował. Ta znowa před tym warnuje, wosobinske daty cuzym přeradźić.
Kmane jězdźidło namakali
Wjesna wohnjowa wobora dóstanje mustwowy transporter
Chrósćicy (JK/SN). K zawěsćenju wohnjoškita a zo bychu planej wohnjoškitneje potrjeby w gmejnje wotpowědowali, ma wjesna wohnjowa wobora Chrósćicy nowy mustwowy transporter dóstać. To su tamniši gmejnscy radźićeljo wčera wobzamknyli. Dokelž pak Budyski krajnoradny zarjad tuchwilu tajki transporter njespěchuje a nětčiše jězdźidło žane wuhlady na technisku dowolnosć TÜVa nima, so w Chrósćicach rozsudźichu, za kmanym trjebanym awtom so rozhladować. A mějachu wuspěch. W Parchimje w specielnym zawodźe, kotryž tajke jězdźidła poskića, su po wulkosći a płaćiznje kmane awto namakali. Radźićel Beno Hojer, kiž je sej z dalšimi wobornikami jězdźidło na městnje wobhladał, je swojim kolegam dobry techniski a wuhotowanski staw jězdźidła wobkrućił. Tuž gmejnska rada jednohłósnje wobzamkny, awto za nimale 26 000 eurow kupić. W hospodarskim planje dźě bě hižo 27 000 eurow za to zaplanowane.
