Přisahu tež w maćeršćinje złožił

wutora, 14. junija 2016 spisane wot:

Změna mandata Serbskeho wolerskeho zjednoćenstwa (SWZ) w Budyskim wo­krjesnym sejmiku: Wjelelětneho radźićela SWZ Stefana Rjedu je wokrjesny sejmik wčera z tohole čestnohamtskeho zastojnstwa wuwjazał. Jako jeho naslědnik bu Dawid Statnik spřisahany. Kaž Rjeda přisłuša tež wón frakciji Swobodnych wolerjow.

Budyšin (SN/at). Posledni raz je Stefan Rjeda z Pančic-Kukowa wčera jako wo­krjesny radźićel SWZ do wulkeje žurle Budyskeho krajnoradneho zarjada zastupił. Ze starobnych přičin bě 70lětny wo wuswobodźenje ze zastojnstwa prosył. Na jeho dotalnym městnje steješe hišće taflička z jeho mjenom, pódla njeje hižo ta z mjenom naslědnika Dawida Statnika. Předsyda Domowiny bě při wólbach wokrjesneho sejmika 2014 za Serbske wolerske zjednoćenstwo druhi najlěpši rezultat hłosow dóstał.

Normalita hišće njeje

wutora, 14. junija 2016 spisane wot:
To je lěpšina, hdyž noweho zapósłanca jako jednotliwca spřisahaja. Tuž móže Serb pasus w swojej maćeršćinje přidać. Dawid Statnik je wčera w Budyskim wokrjesnym sejmiku němskorěčny tekst ze serbskim wotpowědnikom wudospołnił a tak na to skedźbnił, zo budźe jako serbski wokrjesny radźićel skutkować. Je prawje, serbskosć na tymle zjawnym městnje wědomje pokazać, dokelž wupřestrěwa so najwjetši dźěl serbskeho sydlenskeho ruma w Sakskej po Budyskim wokrjesu. Wězo njebě Statnik prěni woleny zapósłanc najwšelakorišich runin, kotryž je so na tele wašnje demonstratiwnje k swojej narodnosći wuznał. Za to je we wokrjesnym sejmiku připóznaće žnjał. Zo pak běchu mjez wopytowarjemi posedźenja někotři, kotrymž sy zadźiwanosć nad postupowanjom Statnika z wobliča wučitać móhł, pokazuje, zo tale poprawna normalita tajka hišće njeje. Axel Arlt

Krótkopowěsće (14.06.16)

wutora, 14. junija 2016 spisane wot:

Přichodnje wučer w Bórkowach

Borkowy. Uwe Gutšmidt budźe wot noweho šulskeho lěta na Bórkowskej zakładnej a wyšej šuli „Mina Witkojc“ skutkować. Jako wučer za Witaj-wučbu zawěsći wón sobu serbskorěčne kubłanje na šuli, w kotrejž mjeztym dźesać lět bilingualnu wučbu po koncepće WITAJ poskićuja. Dotal bě Gutšmidt na Tšupčanskej zakładnej šuli wučił.

„Słowjanska epopeja“ do Azije

Praha. Znatu přehladku wulkoformatnych wobrazow Alfonsa Muchi, zwobraznjacu wuznamne wokomiki słowjanskich stawiznow, wupožča dlěšodobnje do wukraja. Klětu budźe w Japanskej a Chinje wustajena; pozdźišo snano tež w Južnej Koreji a USA. China zapłaći za wupožčenje 100 000 eurow a zaruna kóšty transporta a zawěsćenja.

Za zhromadne spěchowanje

Podstupim. Braniborski ministerski prezident Dietmar Woidke (SPD) zasadźuje so za zhromadne dźěło ze Sakskej při hospodarskim spěchowanju Łužicy. Tole je wažne wuměnjenje zesylnjenja regiona, rjekny Woidke wčera po zetkanju z nowym jednaćelom Inowaciskeho regiona Łužica tzwr, Hansom Rüdigerom Langu w statnej kencliji.

Policija (14.06.16)

wutora, 14. junija 2016 spisane wot:

Dowolnosć sfalšował a drogi brał

Porchow. Dobry čuch mějachu policisća dźensa w nocy, jako kontrolowachu na awtodróze A 4 pola Porchowa 34lětneho pólskeho staćana, kiž bě z Audijom A 3 po puću. Zastojnikam napadnychu na nim njeho čerwjenej woči a nerwozne zadźerženje. Z pomocu awtodróhoweho policajskeho rewěra přewjedźechu drogowy test, kiž wunjese, zo bě muž kokain a amfetaminy brał. Jako sej jeho jězbnu dowolnosć wobhladachu, zwěsćichu, zo bě ta sfalšowana. Nětko změje so 34lětny potajkim hnydom štyrjoch deliktow dla zamołwić: jězdźenje pod wliwowom drogow a bjez jězbneje dowolnosće, přeń­dźenje přećiwo drogowemu zakonjej a falšowanje dokumentow.

Po 19 lětach je so Chór Budyšin pod nawodom swojeho dirigenta Michała Jancy zaso zmužił a so za wurisanje wuchodosakskich chórow zapisał. Wuzwolił bě sej najćešu z wupisanych kategorijow. Sobotu, 11. junija, w 13 hodź. běše tak daloko, zo stupichmy po tydźenjach intensiwnych přihotow na žurli farskeho domu Drježdźanskeje Lukašoweje wosady před jury wubranych fachowcow. Jako prěnje zaklinča „Ubi caritas et amor“, kiž běše ­wuchodosakski chórowy zwjazk jako wupisowar wubědźowanja we wuzwolenej kategoriji za winowatostny přinošk postajił. Slědowachu fakultatiwne titule „Wowčer, tón wowcki“ wot Bjarnata Krawca a Jana Bulankowej spěwaj „Z wuhladkom“ a „Starosć juž pśi małych“. Z lóštom přednjesene serbske title so publikumej wočiwidnje spodobachu. Tež jury nam dobry wukon we wuhódnoćenskej rozmołwje z dirigentom a předsydku chóra atestowaše, slěbornu medalju z 0,2 pobrachowacymaj dypkomaj pak bohužel zapowě.

Wuznaće a pozbudźenje

póndźela, 13. junija 2016 spisane wot:

Dźewjaty serbski domizniski dźeń na historiskim městnje

Wojerecy (AK/SN). Domizna trjeba krute a hłuboke korjenje. Křesćanska wěra móže je stajnje znowa wobnowić. „Domizna je přeprošenje k wěrje, k lubosći a k nadźiji“, prědowaše superintendent Jan Malink wčera w Janskej cyrkwi k wotewrjenju dźewjateho serbskeho ewangelskeho domizniskeho dnja. Tón wotmě so na historiskim městnje w měsće załoženja Domowiny. Božu słužbu je Židźinski chór pod nawodom Kerstin Lieder wob- rubił a mjez druhim „Běži woda, běži“ a „Knjezowy jandźel“ zaspěwał.

Wohnjowoborny dorost zaručeny

póndźela, 13. junija 2016 spisane wot:

Z mnohimi hosćimi z delanskich wsow swjećachu kameradojo Ralbičanskeje dobrowólneje wohnjoweje wobory wčera dźesaćlětny jubilejny swjedźeń natwara noweje gratownje.

Ralbicy (aha/SN). Nahladny objekt, kotryž płaćeše před lětdźesatkom z přetwarom stareje šule něhdźe 380 000 eurow, skedźbnja na swislach z wulkim serbskim napisom na serbskosć Ralbičanskeje wobory. Nimo woponow gmejny Ralbicy-Róžant a Sakskeho wohnjowoborneho zwjazka wupřestrěwa tam wšěm widźomnje swj. Florian, patron wobornikow, swoju škitacu ruku. Hižo po dopołdnišej wulkej Božej mši, na kotrejž so wjacori kameradojo we wohnjowobornej drasće wobdźělichu, podachu so z wosadnym fararjom Šćěpanom Delanom a ministrantomaj do gratownje wobory. Farar gratownju požohnowa a wupraji wobornikam připóznaće za jich njese­bične skutkowanje.

Ponowjeja wohnjoškit a elektriku

póndźela, 13. junija 2016 spisane wot:

Kulow (AK/SN). Wobšěrnje saněrować započeli su njedawno Kulowsku Krabatowu zakładnu šulu. „Lětsa chcemy něhdźe 250 000 eurow inwestować, a to za elektriku, nuzowe wobswětlenje a přede- wšěm za wohnjoškit z připrawu za kurowy alarm a za druhi wuchowanski puć“, rozłožuje nawoda měšćanskeho twarskeho zarjada Stephen Rachel.

Dźakowano měšćanskotwarskemu spěchowanskemu programej za mjeńše města a gmejny so w Kulowje nadźijeja, zo dóstanu za cyłkowne wobnowjenje zakładneje šule we wobjimje 850 000 eurow dwě třećinje spěchowanskich srědkow. Jednu třećinu zapłaći město jako swójski podźěl.

Prěni twarski wotrězk chcedźa po słowach Stephena Rachele lětsa dokónčić. Klětu ma druhi wotrězk slědować. Potom budu předewšěm wjerchi a špundowanja wobnowjene. Nimo toho zatwarja woclowe durje, štož je žadanje wohnjoškita. Třeći twarski wotrězk je w lěće 2018 na rjedźe. Po wšěm zdaću saněruja potom třěchu, pod kotrejž ma rumnosć za skład nastać. Nimo toho ma kubłanišćo porjadnu garderobu dóstać.

Złoty kwas w Jaseńcy

póndźela, 13. junija 2016 spisane wot:

Złoty kwas dožiwić směć je kóždemu mandźelstwu wulka hnada. Tónle jubilej swjećeštaj minjeny tydźeń Ludwig Zahrodnik a jeho mandźelska Rejza w Jaseńcy.

Ludwig Zahrodnik narodźi so 10. ok­tobra 1939 we Wotrowje a wotrosće w Chrósćicach pod skromnymi wuměnjenjemi. Nan bě we wójnje zhubjeny a mać so wo třoch synow z lubosću staraše. Po zakónčenju šulskeho časa 1953 w Chrósćicach chodźeše nadarjeny pachoł dwě lěće na Serbsku wyšu šulu w Pančicach. Po dwulětnym studiju na Serbskim wučerskim wustawje złoži w Małym Wjelkowje wuspěšnje statny eksamen. Na to nastupi w septembru 1957 swoje dźěło w redakciji serbskich wučbnicow. Njehladajo dźěłowych wužadanjow jako redakciski asistent za předmjetaj stawizny a geografiju zmištrowa runočasnje štyrilětny listostudij za předmjet serbšćina a na to 1966 dalši štyri­lětny dalokostudij w předmjeće stawizny. Njeličomne serbske wučbnicy za stawi­zny, geografiju, ručne dźěło, do­mizno­wědu a matematiku za delni schodźenk je spisał, přełožił a lektorizował. Za swoje njesprócniwe dźěło bu z titulom Wyši wučer počesćeny.

Fota za wubědźowanje

póndźela, 13. junija 2016 spisane wot:

Zhorjelc. Fotografojo z euroregiona Nysa a južneho euroregiona Sprjewja-Nysa-Bobr su přeprošeni, so ze swójskimi fotami na lětušim festiwalu „Hrajnišća žiwjenja“ wobdźělić. Hač su to realne abo wumyslene, historiske abo aktualne hrajnišća – za Zhorjelski fotowy festiwal su wone wšitke zajimawe. Za wobdźělenje na wubědźowanju njech zajimcy pod adresu www.fotofestival.projektonline.­info maksimalnje wosom fotow składuja, kotrež so w najšěršim zmysle słowa z „hrajnišćemi žiwjenja“ zaběraja. Wosobinska interpretacija k tomu je wuraznje witana. Přinoški, kotrež jury potom wupyta, so na 2. Zhorjelskim fotowym wubědźowanju wot 26. awgusta do 11. septembra 2016 wustaja. Posledni termin zapodaća fotow je 23. junij 2016.

Dalši trening

Worklecy. Sportowa jednotka Viktorija Worklecy přeprošuje holcy a hólcow w starobje 7 do 14 lět na dalši blidotenisowy trening. Tutón přewjedu Worklečenjo jutře, wutoru, wot 17 hodź. we Worklečanskej ćěłozwučowarni. Štóž ma swójsku blidotenisowu palku, njech sej ju prošu sobu přinjese. Njezabudźće tež na sportowu drastu a črije.

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND