Z městow a wsow (21.10.19)
Prěnički dorosta
Budyšin. Štóž rady čita, je sobotu, 26. oktobra, w Budyskej Dźěćacej a młodźinskej bibliotece na prawym městnje. Tam přeproša wšitkich zajimcow na dźeń wotewrjenych duri. Wopyt wudani so tež za přećelow paslenja a praktiskeho tworjenja. Nimo pokazki, kak móža dźěći dźeń bjez interneta a nowych medijow přežiwić, poskića tam dorostowi awtorojo swoje prěnje literarne wupłody. Biblioteka je wot 13 do 18 hodź. wotewrjena.
Na jubilejnej koncertaj
Choćebuz/Lipsk. Składnostnje swojeho 20lětneho wobstaća wuhotuje zhromadny dźěćacy chór Drježdźansko-Mišnjanskeho a Zhorjelskeho biskopstwa pjatk, 25. oktobra, w 17 hodź w Choćebuskej propstowskej cyrkwi a sobotu, 26. oktobra, w 19.15 hodź. na žurli Lipšćanskeje propstowskeje wosady jubilejnej koncertaj. W spěwnym cyłku je w běhu dweju lět tež tójšto serbskich dźěći sobu spěwało. Tak wjesela so akterojo wězo na dobre serbske wobdźělenje. Hižo hodźinu do sobotneho koncerta w Lipsku su wšitcy bywši čłonojo na přijeće prošeni.
We Wojerowskim zwěrjencu nadźijeja so dorosta
Porik chinskich leopardow we Wojerowskim zwěrjencu bydli wot minjeneho tydźenja hromadźe.
Wojerecy (SN). Chinskej leopardaj San a BaoBao bydlitej wot minjeneho štwórtka hromadźe. Wo tym informuje Wojerowski zwěrjenc w nowinskej zdźělence. Z tym je nětko, po dołhim čakanju, před wjacorymi tydźenjemi zahajene hromaduwjedźenje rubježneju kóčkow zakónčene, a to wuspěšnje. Prěni raz po přichadźe do coowa bě žónka BaoBao nětko prěnje znamjenja so porować pokazowała. „Na to smy dołho čakali. Za móžne hromaduwjedźenje wobeju leopardow je to rozsudny aspekt. Bjez tajkich znamjenjow by to jara riskantne było. Wšako móhłoj so zwěrjeći mjez sobu zranić abo samo morić“, rozłožuje coologiski nawoda zwěrjenca Eugène Bruins.
Policija (21.10.19)
Dróha dospołnje zawrjena była
Miłoćicy. Na statnej dróze S 94 z Kamjenca do Porchowa je dźensa rano krótko do napoł sedmich k njezbožu dóšło. Na wotbóčce pola Miłoćic njebě šofer transportera při wotbočenju na statnu dróhu předjězbu z Porchowa přijěduceho Chevroleta wobkedźbował, na čož dóńdźe k zražce. Wobeju šoferow dyrbjachu zranjeneju do chorownje dowjezć. Cyłkownje pjatnaće wohnjowych wobornikow ze Smječkec a Njebjelčic je městno njezboža zawěsćiło a zrumowało. Wšako běchu z jězdźidłow wšelake maćizny wuběželi. Dróha bě za to cyłu hodźinu zawrjena, štož so zdobom na powołanski wobchad wuskutkowa.
Swjedźeń po bayerskim wašnju
Česćownosć před dźěłom hatarjow
Wułójenje rybow z Balakec hata je wopytowarjow zbliska a zdaloka do Złyčina přiwabiło.
Złyčin (AK/SN). Tradicionalne wułójenje rybow z wulkeho Balakec hata w Złyčinje (Litschen) je wažny přinošk k regionalnemu zwičnjenju. To podšmórny jednaćel Ringpfeilec hatarstwa Karsten Ringpfeil na sobotnym wułójenju. Mjeztym 18. króć su tam kóždolětny spektakl wotměli. Runje tak dołho wobsteja tež łužiske rybowe tydźenje. „Na nich so wobstajnje wobdźělamy“, rjekny Karsten Ringpfeil. „Dźe wo to, regionalne hódnoty tworić. Plahować łužiskeho karpa je jedna z najmjenje wobswět poćežowacych a najbóle znjesliwych formow plahowanja rybow po wšěm swěće.“ Předewšěm wułójenje pokazuje na ćežke dźěło hatarjow a rybarjow, zdobom pak tež na mnohotnosć domjacych wudźěłkow. Partnerojo kaž Tobias Kockert ze swojim ratarskim zawodom Krabatowy mlokowy swět w Koćinje, pjekar při Hórnikečanskim jězorje Willi Bleschke a pčołarjej Dennis Wutzke a Maik Hanske ze Šćeńcy (Steinitz) su hatarjow sobotu ze swojimi předawanišćemi podpěrali. Žony ze Złyčina a wokoliny běchu tykancy napjekli.
Krótkopowěsće (21.10.19)
Mjeńšiny tema byli
Frankfurt n. M. Situacija słowjanskich a němskich mjeńšin bě tema podijoweje diskusije na lětušich knižnych wikach w Frankfurće nad Mohanom. Sobotu dopołdnja rěčeštaj tam mjez druhim dr. Günther Rautz, nawoda Instituta za mjeńšinowe prawo w Bozenje, a nawodnica Budyskeho rozhłosoweho studija MDR Bogna Korjeńkowa.
Njepřiwozmje myto
Mnichow. Spožčenje Myta Rolanda Bergera za čłowjesku dostojnosć dyrbja přestorčić. Dźensa planowane přepodaće wupadnje, dokelž je Adam Bodnar, nawoda pólskeho běrowa za wobydlerske prawa, kotremuž su wuznamjenjenje lětsa připóznali, připowědźił myto njepřiwzać. Přičina wotprajenja je po jeho słowach „njejasna róla nana Rolanda Bergera za čas nacionalsocializma“.
Hotuja so na festiwal DOK
Wo kraju z wójnu a rozmachom zhonili
Skupina Serbow poda so w žnjencu z busom Radworskeho Šmitec wozydłownistwa na putnisku jězbu do Ukrainy. „Po A 4 jědźechmy do směra na Zhorjelc a dale do směra Kraków a Przemyśl přez statnu hranicu do ukrainskeho Lwiwa. Město mjenuja Rusojo Lwow, Polacy Lwów a Němcy Lemberg“, wuwjedźe Baćoński farar Gerat Wornar minjenu wutoru w swojim zajimawym přednošku před Budyskimi katolskimi seniorami. A běše znowa něhdźe 40 wobdźělnikow přewšo rjaneje wuprawy do stareho, na kulturje a stawiznach jimaceho, něhdyšeho kralestwa Galiciska.
Policija (18.10.19)
Katastrofa na kolesach
Słona Boršć. We woprawdźitym zmysle włosy na hłowje stali su zastojnikam awtodróhoweje policije předwčerawšim, jako kontrolowachu nakładne awto, kotrež bě na A 4 do směra na Zhorjelc po puću. Lisćina njedostatkow bě tak dołha, zo móhło katastrofje dóńć, policija wčera zdźěli. Nimo někotrych wottorhnjenych a njefungowacych borzdźidłow zwěsćichu zdobom, zo z motora, kolesynow (Getriebe) a diferenciala chětro wolij kapa. Nimo toho běchu wjacore wobruče hač na tkaniny wotjězdźene a hrožachu kóždy wokomik prasnyć. Samo fachowc DEKRA dyrbješe přiznać, zo tajki „jězdźacy wrak“ dotal hišće ženje widźał njebě. Policisća zakazachu šoferej dale jěć. Zdobom změje so tón tohorunja před sudnistwom wusprawnić.
Cyłotny koncept trěbny
We Łazu pawšalu k sylnjenju wjesnych rumow zaměrnje zasadźeja
Łaz (AK/SN). Gmejna Łaz chce wot Sakskeje připokazanu pawšalu k sylnjenju wjesnych rumow za lěta 2018 do 2020 zmysłapołnje a zaměrnje wužiwać. To podšmórnychu čłonojo tamnišeje gmejnskeje rady na swojim zašłym posedźenju wutoru we Łazu. 50 000 eurow za lětsa nałoža za zdźěłanje cyłotneho koncepta wo potrjebje saněrowanja a inwesticijow w pěstowarnjach gmejny. 20 000 eurow chcedźa za naprawy w jednotliwych wjesnych dźělach komuny wužiwać. Konkretnje přewostaja Koblicam (Koblenz) a Wulkim Ždźaram (Groß Särchen) 5 640 eurow, štož je rada na swojim wutornym posedźenju tež wobzamknyła.
Spottka a drjewo
Budyšin. Měšćanska biblioteka Budyšin prezentuje swojim wužiwarjam nowu wustajeńcu. Wot dźensnišeho pjatka, 18. oktobra, 17 hodź., hač do kónca februara steja tam w srjedźišću přehladki wuměłc Jürgen Spottka a jeho wuměłstwowe wudźěłki z drjewa.
Kreatiwnej dnjej
Chrósćicy. Holcy a młode žony su přichodnu srjedu a štwórtk, 23. a 24. oktobra, na kreatiwnej dnjej na Chróšćanski gmejnski zarjad přeprošeni. Srjedu chcedźa nazymsku pychu paslić. Pokiwy k tomu dawa floristka Diana Mejnowa. Štwórtk steji paslenje filigranych nawušnicow z parličkow, pjelsće, zbytkow płatu a fimo-hliny na programje. Započatk je na woběmaj dnjomaj w 9 hodź. Popłatk wob dźeń a wobdźělnika wučinja dwaj euraj. Přizjewjenja přijimuje socialna dźěłaćerka RCW Marija Koklina telefonisce pod 01520/727 3806 kaž tež e-mailnje pod
Na nazymski koncert
