Krótkopowěsće (18.06.19)
Druhi plan naprawow schwalili
Drježdźany. Sakske statne knježerstwo je dźensa druhi plan naprawow wobzamknyło, z kotrymž chce nałožowanje serbšćiny posylnić a wožiwić. Plan wopřijima dwanaće zaměrow z 21 předewzaćemi. Po słowach přisłušneje ministerki dr. Evy-Marije Stange (SPD) „dyrbi wšudźe znate a samozrozumliwe być, zo w Sakskej tež serbsce rěča“.
Bombu namakali
Baršć/Rogow. Znješkódnjenja bomby z Druheje swětoweje wójny dla dyrbješe dźensa něhdźe 1 500 ludźi w Baršću zawrjeny kruh nimale kilometra wokoło namakanišća wopušćić. 250 kilogramow ćežku bombu běchu wčera při twarskich dźěłach w měšćanskim dźělu Rogowje namakali. Ewakuacija měješe hač do připołdnja wotzamknjena być, a město chcyše naprawu hišće dźensa zaso zběhnyć.
Bydlenje wurumowane
Policija (17.06.19)
Granatu rozbuchnyli
Klukš. Na polu blisko Klukša su sobotu wječor granatu namakali. Specialisća rozbuchadła wotstronjowaceje słužby zwěsćichu, zo njehodźi so wona transportować. Tohodla dyrbjachu ju na městnje rozbuchnyć. Dokelž ležeše granata zwonka wobydleneje kónčiny, njetrjebachu nikoho ewakuować. Wčera krótko po 5 hodź. namakanku rozbuchnychu.
W bydlenju złoto dźěłać chcył
RCW poskići nowej kursaj
Budyšin/Pančicy-Kukow. W nowym šulskim lěće poskići Rěčny centrum WITAJ wosebitej kursaj za staršich serbšćinu wuknjacych dźěći a dalšich zajimowanych dorosćenych. W Budyšinje wotměje so kurs wot 2. septembra 2019 hač do 13. januara 2020 stajnje póndźelu wot 17.30 do 19 hodź. w Serbskim a šulskim zetkawanskim centrumje na Friedricha Listowej 8. Kurs w Pančicach-Kukowje traje wot 2. septembra hač do 6. januara 2020 a budźe stajnje póndźelu wot 19 do 20.30 hodź. w Šuli Ćišinskeho. Přizjewjenja přijimuje RCW e-mailnje pod abo pod tel. čo. 03591/ 550 400.
Přesadźuja namakane wěcy
Budyšin. Přichodne zjawne přesadźowanje namakanych wěcow wotměje so jutře, wutoru, w 16.30 hodź. w delnim foyeru Budyskeje radnicy. Hižo wot 15.30 hodź. móža sej zajimcy poskićene wěcy wobhladać. Přesadźować chcedźa mjez druhim žonjace a mužace kolesa, mountainbiki, handyje a časniki. Nimo toho přińdu wšelka drasta a dalše mjeńše namakanki pod hamor. Štóž chce něšto kupić, ma to na městnje zapłaćić a wupokaz předpołožić.
Wjesne zetkanišćo přepodate
Komorow (JK/SN). Podłu Krabatoweje kolesowanskeje šćežki maja nětko dalšu móžnosć, w suchim wotpočnyć. Minjeny pjatk zhromadźichu so wjesnjenjo a někotři regionalni politikarjo w Komorowje pola Rakec, zo bychu něhdyši dom wohnjoweje wobory nowemu zaměrej přepodali. Bywše twarjenje za sykawu wobornikow běchu z pomocu spěchowanskich srědkow programa Leader na spodobny domčk přetwarili. W nim wupowěsnychu dwurěčnej tafli, kotrejž podawatej informacije wo wsy a wokolinje. Tež wulki napis nad zachodom je dwurěčny. Na to je wjesnjanosta Swen Nowotny (CDU) runje tak hordy kaž Marja Michałkowa, kotraž w nadawku předsydy Domowiny Dawida Statnika postrowne słowa k wotewrjenju domu sposrědkowa. Wona kaž tež Nowotny wuzběhnyštaj wažnosć, z taflomaj kaž tež wonkownym napisom pokazać, zo knježi tu žiwa dwurěčnosć.
Pódla wohnjowoborneho domu je nastało spodobne a z někotrymi naročnymi nastrojemi wuhotowane nowe hrajkanišćo. Te budźe pućowacym z dźěćimi runje tak kaž wjesnemu dorostej rjana městnosć zabawy a hrajkanja.
Wosebita šansa za serbšćinu
Wojerecy (SN). Diskusijny wječork wo móžnym wažnym rozšěrjenju serbskorěčneho poskitka je srjedu, 19. junija, we 18 hodź. w bróžni na zahrodźe domu Domowiny we Wojerecach na Drježdźanskej dróze 18. Na njón přeprošatej Wojerowska župa „Handrij Zejler“ a kubłanski wuběrk Serbskeho sejma.
„Při rozsudźe za druhu cuzu rěč w 6. lětniku móhli šulerjo hišće wosebitu šansu dóstać serbšćinu nawuknyć. To by aktraktiwne było, njeby-li přidatnu prócu porno tym šulerjam woznamjenjało, kotřiž sej hinašu rěč wupytaja. Tale wosebita šansa, powjetšić ličbu serbšćinu rěčacych a wutworić nowe rěčne rumy, njebu dotal wužiwana. Wona móhła wažny stołp rewitalizacije rěče być“, wuswětla dr. Měrćin Krawc, iniciator a čłon kubłanskeho wuběrka Serbskeho sejma. „Zdobom njesmědźa tajke poskitki na kóšty posrědkowanja rěče we wysokej kwaliće na serbskich šulach hić“, wón dodawa.
„Wjeršk dnja, měsaca, lěta ...“
W Budyskej Michałskej cyrkwi je so wčera lětuši Serbski ewangelski cyrkwinski dźeń z wulkim hudźbnym podawkom zakónčił, kiž je mnohich zajimcow přiwabił.
Budyšin (CRM/SN). „Tele předstajenje oratorija je wjeršk dnja, měsaca a cyłeho lěta“. Tak dźakowaše so superintendent Jan Malink wšón rozbudźeny wčera popołdnju wšěm na předstajenju oratorija „Podlěćo“ wobdźělenym. Běchu to štyrjo solisća-spěwarjo, chór 1. serbskeje kulturneje brigady a orchester Serbskeho ludoweho ansambla, kotřiž su tak pod dirigatom cyrkwinskohudźbneho direktora Friedemanna Böhme w połnje wobsadźenej Budyskej Michałskej cyrkwi 73. cyrkwinski dźeń ewangelskich Serbow zakónčili.
Křižerjej w swjedźenskim ćahu
K jubilejej Słoneje Boršće na serbske wjesne stawizny skedźbnili
Słona Boršć (CS/SN). W lěta 1999 do města Budyšina zagmejnowanej Słonej Boršći swjećachu sobotu 660. róčnicu prěnjeho naspomnjenja wsy. Słona Boršć bě w zašłosći přewažnje serbska. Kónc 19. lětstotka bě tam něhdźe 85 procentow wobydlerstwa serbske. Dźensnišich něhdźe 300 wobydlerjow ma tež sławnych serbskich prjedownikow. Nimo rězbarja Jakuba Delenki je to předewšěm Handrij Zejler, załožer serbskeje narodneje literatury a basnik hymny „Rjana Łužica“. Hižo wjele lět maja tam tuž pomnik za Zejlerja, a dróha je tohorunja po nim pomjenowana.
Krótkopowěsće (17.06.19)
Nowy měšćanosta wuzwoleny
Zhorjelc. Octavian Ursu (CDU) budźe přichodny wyši měšćanosta Zhorjelca. Wón je so na wčerawšich rozsudnych wólbach přećiwo kandidatej AfD Sebastianej Wippelej přesadźił, zdobywši 55,2 procentaj wotedatych hłosow. 56 procentow wólbokmanych bě so na wothłosowanju wobdźěliło.
Michauk nowy wjesnjanosta
Budestecy. Nowy wjesnjanosta gmejny Budestecy je 46lětny Markus Michauk. W rozsudnych wólbach doby wón wčerawše přidatne wólby z 66,5 procentami wotedatych płaćiwych hłosow přećiwo kandidatej CDU Norbertej Gloßej (33,5 procentow). Wólbne wobdźělenje bě 57,3 procenty. To je jasnje mjenje hač 26. meje z nimale 75 procentami.
Muzejopedagogiska dźěłarnička
Kamjenc Na prěnjej němsko-pólskej dźěłarničce „Praksy bliske kubłanske programy za šulske rjadownje – Móžnosće a hranicy“ pjatk w Kamjenskim Muzeju zapadneje Łužicy su so zajimcy z rjemjesłami zašłych lětstotkow zeznajomili. Wotmysł bě, „kulturnišćam a kubłanišćam přiležnosć skićić so zwjazać a jim zakłady komunikacije a modulow muzejopedagogiskich konceptow spřistupnić“.
Policija (14.06.19)
W njewjedrje za psom pytał
Běła Woda. Njewšědne zasadźenje mějachu zastojnicy Běłowodźanskeho policajskeho rewěra předwčerawšim wosrjedź njewjedra. Pola nich bě so wobydler přizjewił a zdźělił, zo w bydlenskim bloku napřećo něchtó z kapsnej lampu wokoło běha, štož měješe swědk za podhladne. Wobsadka policajskeho awta sej tónle pad bliže wobhlada a bě najskerje runje tak zadźiwana, kaž wony muž z kapsnej lampu. Zastojnikam wón mjenujcy wuswětli, zo swojeho psa pyta. Tón ma najskerje paniski strach před njewjedrom a je swojemu knjezej při błyskanju a hrimanju prosće ćeknył. Hač su štyrinohača skónčnje zaso namakali, policajska rozprawa bohužel njepřeradźa.
