Zahaja lěto H. B. Šěracha
Budyšink. Ze swjedźenskim zarjadowanjom zahaji so sobotu, 11. měrca, w 16 hodź. lěto Hadama Bohuchwała Šěracha w cyrkwi w Budyšinku. Mjez druhim budźe Jan Malink na H. B. Šěracha jako serbskeho fararja spominać. Günter Sodan přednošuje wo Šěrachowym skutkowanju jako sławny pčołar. Zarjadowanje wobrubi sopranistka Romy Petrick ze spěwom. Günter Sodan ma w zwisku z jubilejnym lětom Šeracha wjacore zarjadowanja lětsa a klětu planowane. Přichodne budźe hižo 2. apryla, hdyž wotkryja wopomnjensku taflu při cyrkwi w Budyšinku. H. B. Šěrach bě so 1724 w Nosaćicach narodźił a 1773 w Budyšinku zemrěł.
Do dźiwadła a k wječeri
Haslow. Lajska dźiwadłowa skupina Šunow-Konjecy předstaji swoju komediju „Mužojo nimaja so lochko“ sobotu, 18. měrca, w 17 hodź. a njedźelu, 19. měrca w 16 hodź. w Bizoldec hosćencu w Haslowje. Tuž změja wšitcy móžnosć sej komediju wobhladać, kiž ju hišće widźeli njejsu abo chcedźa sej ju hišće raz wobhladać. Sobotu, 18. měrca, poskića Bizoldecy po předstajenju słódnu wječer. Skazanki přijimuja pod telefonowym čisłom 035937 83204.
Jutrowne poskitki w SKI
Policija (09.03.23)
Serija jebarskich telefonatow
Zhorjelc. Něhdźe 40 króć spytachu wobšudnicy – mjez druhim we Wopakej, Žitawje a Ochranowje –, ludźi w tak mjenowanych šokowych telefonatach k přepokazanju abo přepodaću wjetšich sumow pjenjez přerěčeć. Ani jenički pospyt pak njeběše wuspěšny. Policija ludnosć dale ke kedźbliwosći napomina.
Zwjazkowu dróhu znowa zawru
Nadróžne twarnišća su za šoferow stajnje mjerzace, dokelž su z poćežowanjemi zwjazane. Wosebje zlě je, hdyž je dróha dospołnje zawrjena, kaž wot přichodneho tydźenja zaso we Wulkich Ždźarach.
Wulke Ždźary (AK/SN). Zwjazkowa dróha B 96 we Wulkich Ždźarach budźe wot přichodneje póndźele, 13. měrca, za wobchad dospołnje zawrjena. Tole zdźěli twarski nawoda Łazowskeje gmejny Jens Kieschnick předwčerawšim na posedźenju gmejnskeje rady. Tam započnje so štwórty a posledni wotrězk twara wopłóčkoweje syće a noweho wodowoda. Wotrězk saha wot wotbóčki Rachlowskeje dróhi hač ke kromje wsy do směra na Budyšin a ma hač do kónca meje hotowy być. Potom budu jenož hišće někotre pódlanske dźěła trěbne.
Tutón zasonjenu zymsku idylku sy wčera rano we wosmich jako pućowar ...
Tutón zasonjenu zymsku idylku sy wčera rano we wosmich jako pućowar kołowokoło Zarěča nadešoł. Dźensa ju prawdźepodobnje hižo njewuhladaš. Stawizny wjeski sahaja daloko do zańdźenosće. Prěni raz naspomnjena bu w lěće 1412. Hač do lěta 1993 běše Zarěč samostatna gmejna. Dźensa je wona wobstatk gmejny Njeswačidło. Foto: Feliks Haza
Serbskosć direktnje zadomić
Serbskosć dźěćom w zakładnych šulach a dźěćacych dnjowych přebywanišćach zbližić, to Dźěłowy kruh za serbske naležnosće při Budyskej měšćanskej radźe hižo dlěši čas zaběra, wčera wospjet.
Budyšin (CS/SN). Dołho planowane sfałdowane łopjeno „Smy dwurěčni!“ w Budyšinje předleži. Wone ma wikowarjam a přemysłownikam přiručka za wobchadźenje ze serbskej rěču być a je w porjadowym kaž tež přemysłowym zarjedźe wupołožene. Čłonojo měšćanskeho dźěłoweho kruha za serbske naležnosće běchu je wuwili. Na posedźenju wčera mějachu hotowy wupłód w ruce.
Krótkopowěsće (09.03.23)
„Radu přichoda“ wuzwolili
Berlin. Rozhłosowa komisija zwjazkowych krajow Němskeje je so na poradźowanski gremij za přichod zjawnoprawniskeho rozhłosa dojednała. „Radźe přichoda“ přisłušeja mjez druhim šwicarski publicist Roger de Weck, zwjazkowy sudnik na wuměnku Peter M. Huber a žurnalistka Maria Exner. „Temporarnje skutkowacy gremij“ ma „dołhodobne perspektiwy za zjawnoprawniske medije wuwić“ a „zdźěłać poručenja za stopnjowanje jich akceptancy“.
Nowy 5. lětnik bjez problemow
Budyšin. Z ličbow přizjewjenjow šulerjow za 5. lětnik serbskich šulow w Hornjej Łužicy njejsu žane problemy wuwidźeć, ani přewulka ani njepřizwolena rjadownja, praji na naprašowanje SN kubłanska referentka Domowiny Katrin Suchec-Dźisławkowa. Po powěsći serbskeho rozhłosa maja na wyšej šuli w Slepom a w Budyskim Serbskim gymnaziju najwjace přizjewjenjow (56).
Krajansku skupinu njezabyć
Sobotu a njedźelu budu tež w Hornjej Łužicy zaso najwšelakoriše ...
Kaž kóžde lěto w dojutrownym času wotměje so tež lětsa po wšej Němskej dźeń wotewrjenych hornčernjow. Sobotu a njedźelu, 11. a 12. nalětnika, wot 10 do 18 hodź. hornčerjo zajimcow do swojich dźěłarnjow přeprošeja. Lětsa chce po cyłym Zwjazku něhdźe 600 hornčerskich zawodow a ateljejow wopytowarjam durje wotewrěć, w Sakskej samej hižo 60. Tež w hornjołužiskich hornčernjach móžeće mnohostronskosć žiweho rjemjesła z najwšelakorišim rukopisom wobdźiwać. Po nazhonjenjach wopytuja zajimcy na tutymaj dnjomaj wjacore zawody.
Hornčerstwo je jedne z najstaršich rjemjesłow. Hižo před 8 000 lětami běchu ludźo na hornčerskej tačeli dźěłali. Tež dźensniše zhotowjenje drje hišće na staru tradiciju dopomina, ale wunošk je so dospołnje přeměnił. Dźensa je keramika jara indiwidualny wudźěłk. Z dnjomaj wotewrjenych duri chcedźa rjemjeslnicy wopytowarjam pokazać, kelko prócy woni za sudobjo w ručnym dźěle nałožuja.
Na dojutrowny wječor
Róžant. Za čas přihotow na jutry přeproša kantor Róžeńčanskeho křižerskeho procesiona Janek Wowčer wobydlerki a wobydlerjow Róžanta, kaž tež wšitkich zajimcow z wokoliny, sobotu, 11. měrca, w 19 hodź. na přednoškowy wječor do towarstwoweje rumnosće w Róžeńće. Tam porěči sedłar Marek Buk wo hladanju křižerskich gratow, konjacy sportowc Křesćan Zahrodnik wěnuje so wobchadźenju z konjemi a Janek Wowčer přednošuje wo „Krejnym jěchanju“ (Blutritt) we Weingartenje. Organizatorojo wjesela so na bohaty wopyt. Wo napoje je postarane.
Premjera přiručki wo mjenach
Budyšin. Smolerjec kniharnja přeproša štwórtk, 9. měrca, na premjeru w Ludowym nakładnistwje Domowina wušłeje přiručki „Wörterbuch der slawischen Personennamen in Ortsnamen zwischen Saale und Bober/Queis“. W njej zjima Inge Bily staw slědźenja wo słowjanskich pomjenowanjach, z čimž twori žórło za dalše přepytowanja. Čitanje z awtorku započnje so w 19 hodź.
Jejka debić wuknyć
Štomy při pućach dyrbja so hladać
Dalši krok přesydlenja
Zjawny zaměr sportnišća, kupjele a towarstwoweho domu cofnu
Trjebin (AK/SN). Dźěl wobsydstwa Trjebinskeje gmejny w Miłorazu zhubi přichodnje swój zjawny zaměr – to je dźěl přesydlenja wsy, kotrež ma hač do kónca 2024 wotzamknjene być. Tole rozłoži nawodnica hłowneho zarjada Slepjanskeho zarjadniskeho zjednoćenstwa Marion Mudrina předwčerawšim na posedźenju gmejnskeje rady. Zakład je zrěčenje z energijowym koncernom LEAG. Dokładnje dźe wo tak mjenowane rozwěnowanje sportnišća, kupjele a wjesneho towarstwoweho domu. „Kupjel a sportnišćo so hižo njewužiwatej. Na terenje kupjele je jeničce hišće kontejnerowe twarjenje wohnjoweje wobory“, praji Miłoraski wjesny předstejićer Detlef Rölke.
