Budyšin (SN/MWj). Po dwulětnej nanuzowanej přestawce chce so město Budyšin jutry zaso jako woprawdźite jutrowne město prezentować. To zwuraznichu zastupjerjo měšćanskeho zarjadnistwa, Turistiskeho towarstwa a Nutřkoměšćanskeho towarstwa předwčerawšim na nowinarskej rozmołwje. Hižo přichodnu sobotu, 9. apryla, organizuja tak mjenowany jutrowny warm-up, hdyž zaklinči w nutřkownym měsće a w Centeru na žitnych wikach zabawna hudźba.
Ćichu sobotu wotměja so na Hłownym torhošću jutrowne wiki. Zapřijatej budźetej turistiska informacija kaž tež Serbski muzej, hdźež budu zajimcy debjerjam jutrownych jejkow při jich dźěle přihladować móc. W Serbskej kulturnej informaciji chcedźa wopytowarjam wot 10 do 12 hodź. składnosć dać, so sami we wóskowanju pospytać. Pobrachować njesmě sobotu tradicionalne jutrowne trubjenje. Wone wotměje so kaž zwučene na Hrodźišku.
Chrósćicy (mtw/SN). Cyrkwinska wěža abo tež nowy grilowy areal při něhdyšej pěstowarnje w Chrósćicach stej jenož dwaj přikładaj, za čo su pjenjezy Leaderoweho projekta w zašłych lětach na dobro serbskich gmejnow wužiwali. Tež mnozy priwatnicy su spěchowanje Europskeje unije na přikład za wutwar něhdyšich bróžnjow na bydlenske rumnosće wužiwali. Tuta pjenježna podpěra ma tež w přichodźe móžna być. Za to pak je nowa wuwićowa strategija trěbna. Tohodla je Towarstwo za wuwiće Hornjołužiskeje hole a hatow (OHTL) minjeny pjatk na diskusijne koło do Chróšćanskeje Jednoty přeprosyło. Kaž hižo srjedź měrca w Radworju chcyše towarstwo zhromadnje z planowanskim běrowom ideje a móžnosće předstajić, dokal maja spěchowanske přiražki w dobje wot 2023 do 2027 běžeć.
Wulka Dubrawa (CS/SN). Jeli wobydlerjo Wulkeje Dubrawy Hardyja Glauscha 15. meje za noweho wjesnjanostu wuzwola, so na jeho puću na dźěłowe městno wjele změniło njeby. Kandidat je mjenujcy nawoda wotnožki wokrjesneje lutowarnje, kotraž je bjezposrědnje pódla Wulkodubrawskeho gmejnskeho zarjadnistwa zaměstnjena. 47lětneho njestronjana podpěrujetej CDU a Wulkodubrawske njewotwisne wolerske zjednoćenstwo. Zastupjerjo z wobeju stron běchu jeho narěčeli, hač móhł sej kandidaturu předstajić. Hardy Glausch, kiž je na mnohe wašnje w swojej gmejnje zakorjenjeny, móžeše sej to předstajić. „Gmejna je najmjeńši dźěl towaršnosće, kiž móža ludźo najlěpje dožiwić a wobwliwować“, wón praji. Po jeho měnjenju bu towaršnosć w zašłych lětach přejara pačena. Přećiwo tomu chce wón zakročić. Wobydlerjo njepřeja sej jenož fungowace zarjadnistwo, ale chcedźa tež wědźeć, hdźe gmejna za něšto lět steji, tak Glausch.
W Serbach znata praksa „Kolebka“ w Swinjarni bu před třomi lětami załožena. Hanka Pěčcyna je jedna z třoch tam dźěłacych młodych babow. Za wulke zbožo ma wona šěroki poskitk.
Swinarnja (xš/SN). Kursy do poroda, akupunktura, tapowanje a homeopatija su požadane. Wšitko je direktne přiměrjene na jednotliwu žonu. Dalši plus je, zo samodruhe žony hižo do poroda z babu w kontakće su a sej tak dowěru natwarja. Tak móža fachowče žony po porodźe doma přewodźeć a w „Kolebce“ zastarać. Korony dla dyrbjachu baby kursy płaćacym prawidłam přiměrić. Najwjetše wužadanje bě rumnosće namakać, kotrež wotpowědnje wulke su. Wosebite ćělne wužadanje bě nošenje nahubnika. Tuž su w lěću kursy kaž gymnastiku po porodźe pod hołym njebjom přewjedli a dalše, kaž tež poradźowanja, online podawali.
Noweho předsydu wolili
Drježdźany. Albrecht Koch, kantor a organist Freibergskeje ewangelskeje wosady kaž tež prezident Towaršnosće Gottfrieda Silbermanna, nastupi spočatk oktobra zastojnstwo předsydy Sakskeho kulturneho senata. Dotalna nawodnica gremija Friederike Koch-Heinrichs, direktorka Kamjenskeho muzeja zapadneje Łužicy, zastojnstwo turnusej wotpowědnje kónc septembra złoži.
Z nowej kartu do Berlina
Zły Komorow. Do zahajenja noweje kolesowanskeje sezony prezentuje so turistiski zwjazk Łužiska jězorina na kolesowarskim festiwalu VELO Berlin, kotryž so přichodny kónc tydźenja wotměje. Tam změja tež nowu kartu z kolesowanskimi šćežkami kónčiny sobu. Mjeztym je dosć a nadosć zajimawych pućow, kotrež móža sej kolesowarjo wotkryć.
Incidenca dale woteběra
Kamjenc. Zapósłanc Sakskeho krajneho sejma Alojs Mikławšk přeprošuje zajutřišim, 7. apryla, w 19 hodź. na zjawny diskusijny forum ze sakskim financnym ministrom Hartmutom Vorjohannom (wobaj CDU) do hosćenca na Kamjenskej Pastwinej horje. Pod hesłom „Zazběh po pandemiji“ poda minister wuhlad na wuwiće w Swobodnym staće Sakskej a w regionje w přichodnych tydźenjach a měsacach. Nimo ministra porěči k tutej temje tohorunja zastupjer statistiskeho zarjada Sakskeje. Zajimcy su wutrobnje witani a móža so e-mailnje pod za zarjadowanje přizjewić.
Počesća basnika a komponista
Napadne awto pokradnyli
Mučow. Stare awta poprawom cil paduchow njejsu. Hdyž pak so wo jězdźidło za rallye jedna, je to po wšěm zdaću hinak. W Mučowje su njeznaći minjenu sobotu 36 lět stary Suzuki pokradnyli. Módre awto je něhdźe 5 000 eurow hódne. Jeho wobsedźer bě je tak přetwarił, zo móžeš z nim rallye jězdźić. Awto ma čornu škitnu konstrukciju a powjazowy nawijak (Seilwinde) přitwarjeny. Nimo toho je na nim wjele nalěpkow. Tež dwaj nastrojej za nabiwanje baterijow w cyłkownej hódnoće 160 eurow so z garaže zhubištej. Dale nasta něhdźe 100 eurow wěcneje škody. Policija pyta nětko swědkow, kotřiž su napadne jězdźidło snano wuhladali. Pokiwy přijimuja pod telefonowym čisłom 03581 468100.
Z nimale 40 druhimi małymi a wulkimi pomocnikami zetkachmy so prěnju sobotu apryla w Pančicach-Kukowje, zo bychmy zhromadnje we wsy wokoło ležace wotpadki hromadźili. Wotpadkowa akcija, kotraž wotměwaše so runočasnje we wjacorych gmejnach wokrjesa, so přez centralu za přirodu w Njeswačidle podpěraše. Wona přewostaji rukajcy, wotpadkowe měchi kaž tež mały dar za wobdźělnikow a staraše so tohorunja wo wotstronjenje nahromadźenych smjećow.
Po krótkim witanju rozdźělichmy so do wjacorych skupin a wuprudźichmy do wšěch směrow. Wosebje wokoło Pančan nakupowanišća, sportoweje hale, sportnišća a skłoninach při holi so wjele njerjada nahromadźi. Tež na turistiskim parkowanišću při klóštrje a w přirowach zwonka wsy so měchi z wotpadkami spěšnje pjelnjachu.
Wojerecy (AK/SN). Łužiska jězorinowa załožba spěchuje zaměrnje a wobstajnje projekty towarstwow, kubłanja, kultury a socialnych zarjadnišćow. Tole wuzběhny předsyda załožby Thomas Delling we Wojerecach. „Wot časa załoženja załožby 2015 smy nimale 1,3 miliony eurow wudali. Wot dohromady 240 próstwow smy pjenjezy za 154 projektow přizwolili“, Delling rjekny.