Policija (22.02.23)
Wulka škoda po wohenju
Wojerecy. W předawanišću za domjacu nadobu we Wojerecach je předwčerawšim woheń wudyrił. Swědkojo zdźělichu, zo płomjenja z twarjenja stupaja. Woheń drje wohnjowi wobornicy spěšnje zhašachu, wón pak je tójšto škody načinił. Wobškodźili su so twory w hódnoće 170 000 eurow, na twarjenju nasta něhdźe 50 000 eurow škody.
Dźěło žonow často zakryte
Přichodny měsac žonjace akciske tydźenje w Budyskim wokrjesu
Budyšin (SN/MWj). Pod hesłom „So słowa jimać, sobu rěčeć, jednać“ wotměja so w Budyskim wokrjesu wot 1. měrca hač do 1. apryla mjeztym třeće žonjace akciske tydźenje. W mjenowanym času poskićeja dohromady 35 zarjadowanjow a akcijow w Budyšinje, Kamjencu, Wojerecach a Kulowje. Na programje steja zabawne zarjadowanja runje tak kaž filmowe předstajenja, wustajeńcy, kursy sebje zakitowanja a dźěłarnički wo komunalnej politice, zdźěli zamołwita za runostajenje města Wojerecy Korina Jenßen.
„Zarjadowanja wotbłyšćuja mnohotnosć žiwjenja a angažement žonow, kotrež wučinjeja połojcu wobydlerstwa. Žony zawostajeja swoje slědy w gmejnach, městach a po cyłej Hornjej Łužicy. Jich skutkowanje na dźěłowym městnje, při kubłanju dźěći a w najwšelakorišich čestnohamtskich polach so často přemało wobkedźbuje. Akciske tydźenje maja pomhać, tole změnić“, praji Korina Jenßen.
Dožiwjenja z Bookiijemi a hlinu
Na rjanym prózdninskim dnju smój sej přeprosyłoj publikum, zo bychmoj rěčnu zaběru zwjazałoj ze wšelakimi instrumentami. Tak wužiwachu wobdźělnicy na přikład znate Bookii-pisaki, zo bychu sej derje wudźěłany material za serbšćinarjow wotkryli. Ale tež přewažnje pasiwnym serbšćinarjam w regionje wokoło Malešec skićeše poskitk inspiraciju, so z wjeselom a na hrajkace wašnje hłubšo ze serbšćinu zaběrać. Nimo Bookii pisakow a knižkow, kotrež słužachu wobdźělnikam wosebje jako srědk k lěpšemu zrozumjenju a wožiwjenju serbšćiny, smój tež tworjenje z hlinu poskićiłoj. Tak mějachu wšitcy móžnosć, to runje nawuknjene ze swojimaj rukomaj sami zwobraznić.
Za dźěći, młodostnych a dorosćenych přewjeduja tele dny w ...
Njedowola wottřělenje
Drježdźany (SN). Z interneje rewizije pada wot wjelkow wospjetnje nadpadnjeneho hajnišća za dźiwinu w Chrapowje pola Lubija wuńdźe, zo wuměnjenja za wottřělenje po Sakskim postajenju k managementej wjelkow njepředleža. To fachowa instanca „Wjelk“ Sakskeho krajneho zarjada za wobswět, ratarstwo a geologiju (LfULG) wčera w Drježdźanach zdźěli. Po jeje argumentaciji słuša spjelnjenje kriterija „přicpějomny škit“ k bytostnemu wuměnjenju za wottřělenje wjelkow. To rěka: płót ma po cyłej swojej dołhosći 180 centimetrow wysoki a škit přećiwo podrywanju 50 centimetrow šěroki być. Nimo toho ma podrywanski škit ze zemskim zakótwjenjom skrućeny abo 50 centimetrow hłuboko do zemje zapušćeny być.
Chrapowski, wjacore hektary wulki, areal je z 2 kilometraj dołhim krutym płotom wobdaty, kotryž Sakskemu postajenju k managementej wjelkow wotpowěduje. Twarski staw płota kaž tež podrywanski škit bu po kóždym nadpadźe wjelkow přez LfULG přepruwowany. W nětčišej rewiziji pak identifikowachu pruwowarjo jedyn niši dypk płotu, kotryž so tu trochu nachila.
Krótkopowěsće (22.02.23)
Štomy dospołnje porubane
Ottendorf-Okrilla. Porubanje štomow we Łužničanskej holi je wotzamknjene. Wčera su lěsni dźěłaćerjo jenož hišće poslednje zdónki z přestrjenje wotwjezli, hdźež běše połdra lěta protestny camp aktiwistow klimy zaměstnjeny. Na terenje chce předewzaće KBO šćerk wudobywać a ma za to tež dowolnosć. Minjeny tydźeń je policija tam camp protestowacych z wulkozasadźenjom rumowała.
Někotři z wysokej mzdu
Magdeburg. Po rešeršach nowiny Mitteldeutsche Zeitung (MZ) płaći Srjedźoněmski rozhłós (MDR) 36 přistajenym mzdy zwonka tarifa a za to lětnje miliony wudawa. K tak mjenowanym sobudźěłaćerjam zwonka tarifa słušeja mjez druhim intendantka MDR Karola Wille a wosom direktorow sćelaka. „Zbytnych 27 sobudźěłaćerjow su zwjetša wotrjadnicy“ wopodstatni rěčnik MDR nowinje MZ.
Prezident wopyta wuběžk
Kružk swójbow póstnicy wuhotował
W duchu po swěće po puću byli
Nic jenož minjenu sobotu na dźěćacych póstnicach a samsny dźeń na kapičkowym wječoru knježeše w Njebjelčanskej „Bjesadźe“ dobra nalada, ale tež wječor do toho. Tam su so nory na žonjace póstnicy zetkali. Kaž je hižo někotre lěta z wašnjom, mějachu žony Serbskopazličanskeho karnewaloweho towarstwa program spřihotowany.
Lětsa běchu po puću z lětadłom „WCV airline“ a hesło rěkaše „We wosom mjeńšinach wokoło swěta“. Po zaćahu žonow z jich kóframi kapitan-pilot na lóštne wašnje wěstotne naprawy rozjasni. Jako prěnje poda so lětadło na čorny kontinent. K afriskim rytmam hibachu so žony na cebry předrasćene. Dale wjedźeše jězba do Ruskeje, hdźež zarejwachu matrjoški. Na južnym čopje wuhladachu přihladowarjo lodoweho bara a pinguina. W Mexiku wustupi hudźbna skupina z wulkimi sombrerami a pončowami. Skónčnje zarejwachu tež hišće indiske rjanolinki w swojich frinkolacych šatach a kanadiscy cowboyjojo. Přizemjenje doma we Łužicy bě potom finale, w kotrymž sej „šewca“ zarejwachu.
Wjele wjesela město politiki
Ćah róžowu póndźelu w Kulowje zaso tysacy ludźi přiwabił
Kulow. 317. sezona Kulowskeho karnewala je na wčerawšej róžowej póndźeli swój wjeršk docpěła. Runje tak kaž minjenu sobotu bě wulki swjedźenski ćah po měsće ćahnył. Přirunujo k soboće pak su so někotre dypki změnili. Wjedro, přihladowarjo, awta, wozy, princesna a princ, su hłowne hesła změnow. Jako swjaty Pětr dwaj dnjej do toho z póstnicarjemi a ze skupinami žonow hišće přederje njeměnješe, bě wjedro wčera ćim lěpše. Žadyn dešć njemyleše a zdźěla so samo słónco předrě. To bě sobu přičina za to, zo hišće raz něšto stow ludźi wjac do Kulowa přichwata.
Nimo wjedra pak běchu hłownje wulke póstniske wozy, na kotryž wšelakore skupiny a wsy wjacore tydźenje dźěłachu, přičina za wulki nawal. Tež princesna Jenny a princ Wintus běštaj na swójskim, wot konjow ćehnjenym wozu w ćahu pódla. Přewodźenaj buštaj wot wjacorych koni a gardy čerwjenych škričkow. Nimale wšitke žónske skupiny wot soboty běchu we wčerawšim ćahu hišće raz pódla.
Krótkopowěsće (21.02.23)
Přehladka z dalšej staciju
Přibysłaẃ. Pućowanska wustajeńca „Što rěka tu mjeńšina? Danojo, Frizojo, němscy Sintojo a Romojo, Serbja a rěčnicy delnjoněmčiny – Twoji njeznaći susodźa?“ je wotnětka w Kulturnohistoriskim muzeju w Přibysławje (Prenzlau) přistupna. Mjez přehladku dźensa wotewěracymi hosćimi běchu kulturny statny sekretar Braniborskeje Tobias Dünow (SPD), Ute Eisenack ze Zwjazkoweje rady za delnjoněmčinu a kurator dr. Robert Lorenc.
Z dwěmaj kandidatomaj
Łaz. Za wólby wjesnjanosty 23. apryla w gmejnje Łazu staj dwaj požadarjej wobkrućenaj, kaž Mandy Liepert, předsydka gmejnskeho wólbneho wuběrka, dźensa wozjewi. Mějićel zastojnstwa Thomas Leberecht kandiduje za CDU. Jeho wužada Frank Förster z Hermanec nad Sprjewju, kotrehož je AfD nominowała.
„Biikebrennen“ Frizow na Sylće
