Šofer policiji najprjedy ćeknył

Budyšin. Zastojnikam Budyskeho policajskeho rewěra napadny zawčerawšim wječor w Strowotnej studni čerwjeny Suzuki Alto. Šofer trochu spodźiwnje awto wodźeše. Zastojnicy spytachu jeho zadźeržeć, tola wón ćekny. Policisća awto hač do Krakec přesćěhowachu, hdźež zajědźe šofer na ležownosć. Zastojnicy awto tak wotstajichu zo njemóžeše wodźer Suzukija hižo ćeknyć. To bě jemu wšojedne a prasny do praweje strony policajskeho awta. Test pozdatnu přičinu strašneje jězby wujasni. Tak zwěsćichu pola šofera 2,82 promile w dychu.

Jedna wosoba zemrěła

Wojerecy. Z dotal njeznateje přičiny je wčera rano woheń při Wojerowskej Budyskej aleji wudyriło. Wobydler wjaceswójbneho domu bě to pytnył a wohnjowu woboru wołał. Zasadźenske mocy wobydlerjow wuchowachu a woheń hašachu. Jedna wosoba pak hišće na městnje zemrě. Kriminalna policija pad přepytuje

Njebjelčicy. Njebjelčanska młodźinska wohnjowa wobora hromadźi přichodnu sobotu dopołdnja staru papjeru w Serbskich Pazlicach a Njebjelčicach. Rady móžeće swoju staru papjeru (nowiny, časopisy, ale žadyn papjerc) w kartonkach abo korbikach před durjemi wotstajić.

Kultura w bróžni

Wochozy. Wochožanske towarstwo Šwjelic bróžnja přeprošuje sobotu, 26. awgusta, na zarjadowanje, na kotrymž předstaji klankodźiwadźelnik Lutz Männel w 16 hodź. hru „Čert z třomi złotymi włosami“. We 18 hodź. sćěhuje kabaret „Der Kaktus“ skupiny „Kaktusblüte“ z Wjazońcy.

Na bywšim arealu BHG w Njeswačidle zahaja druhi twarski wotrězk

Njeswačidło (UM/SN). Hižo loni připowědźeny přetwar Njeswačanskeje kupnicy nětko bórze zahaja. Kaž wuwiwar projekta a sobuwobsedźer Lars Gottschling wobkrući, kupnicu 31. awgusta zawru. To pak jenož za krótki čas. „Twarjenje wobšěrnje ponowimy a 13. nowembra zaso wotewrimy.“

Z tymle wuprajenjom reaguje Lars Gottschling na blady we wokolinje. Ludźo sej powědaja, zo chcedźa areal naprawo kupnicy bórze wottorhać. „Tomu scyła tak njeje. Tam chcemy započeć twarić. Tak nastanje wobłuk za bistro kaž tež předawanske přestrjenje za pjekarnju Dörfer a našeho noweho partnera Schiebocker.“ Mjeztym pak njebudźe to hižo kupnica Nah und Gut, kotraž skupinje Edeka přisłuša, ale předewzaću Rewe přisłušaca skupina Nahkauf. „Nimo zežiwidłow změja w kupnicy tež dalše wudźěłki, na přikład za domjacnosć, kaž tež drogerijowe produkty“, Lars Gottschling připowědźi. Dale wón Njeswačanow namołwja: „Trjebamy swojich swěrnych a spokojnych kupcow, zo móhli naslědnje a dołhodobnje zastaranje w našim regionje zawěsćić.“

Krabatowy wjesny klub a domizniske towarstwo we Wulkich Zdźarach matej nowe předsydstwo. Nadine Lischen je předsydka. Dale přisłušeja předsydstwu Marita Schattel, Steffen Mühl, Annett Lodig, Hans-Rüdiger Klein, Jörg Mücke, Karin Korsch, Jens Kieschnick a Leon Wrase.

Wulke Zdźary (AK/SN). Nowe předsydstwo Krabatoweho wjesneho kluba a domizniskeho towarstwa we Wulkich Zdźarach chce zamołwitosć přewzać. Tuž wusměrja so na kajkosće kaž wotewrjenosć, wutrobitosć a dobre zhromadne dźěło. „Mój zaměr je, zo wobydlerjow bóle hromadźe wjedźemy. W towarstwje chcemy zhromadnosć wjesnjanjow wožiwić a młó­dšu generaciju zapřijeć“, Nadine Lischen­ z Wulkich Zdźarow wuzběhny. Wot junija je 33lětna předsydka towarstwa. Młoda žona dźěła we Wojerowskim klinikumje Łužiska jězorina jako chorobna sotra. Z wjesku čuje so wona wusko zwjazana. Wot lěta 2020 dyrbješe přechodnje w zwisku z powołanjom zwonka Łužicy bydlić. Tola w lěće 2017 je so zaso nawróćiła.