Pančicy-Kukow. W pjećoch gmejnach zarjadniskeho zwjazka Při Klóšterskej wodźe je spočatk tohole lěta ze 7 223 wobydlerjemi 81 ludźi wjace bydliło hač před lětom. Tole wuchadźa ze statistiki, kotruž je předsyda zarjadniskeho zwjazka Stefan Anders wozjewił. Sobu wulki podźěl na tym ma Njebjelčanska gmejna, hdźež je so loni 26 dźěći narodźiło, lěto do toho wosom. Do gmejny Pančicy-Kukow je 105 ludźi přićahnyło, mjeztym zo bě to w lěće 2021 jenož 42. Po wšěm zdaću zwisuje to z ukrainskimi ćěkancami, kotřiž su sem přišli. Do Chróšćanskeje gmejny je 64 ludźi přićahnyło město 39 lěto do toho. Na tamnym boku je 44 wobydlerjow Worklečansku gmejnu wopušćiło, mjeztym zo bě to lěto do toho jenož 29. Nawopačny zjaw bě w gmejnje Ralbicy-Róžant, zwotkelž je jenož 41 wosobow přećahnyło, lěto do toho bě jich hišće 64. Na Pančičanskim stawnistwje mějachu loni dźewjeć wěrowanjow, w lěće 2021 bě jich dźesać.

Seniorojo zaso škotuja

Slepo (AK/SN). Swoje 50lětne wobstaće swjeći lětsa Serbski folklorny ansambl Slepo. Na to skedźbni předsydka Stefanie Bierholdtec. Tónle jubilej chcedźa hódnje woswjećić a jón hižo nětko dołhodobnje přihotuja. Nazymu su wšelake akcije planowane. Po słowach předsydki chcedźa mjez druhim chroniku wo stawiznach ansambla wudać.

„Za tute předewzaće prosymy wšitkich bywšich a aktiwnych čłonow wo sobudźěło“, předsydka rozłoži. „Wjeselimy so na dopomnjenki ze zwučowanjow abo wustupow, na žortne anekdoty a wobrazy, zo móhła chronika čłonow za čłonow nastać. Wšitcy, kotřiž so z našim towarstwom zwjazani čuja, móža swoje dopomnjenki a stawiznički tohorunja zapodać.“ Móžno je to přez e-mail na abo z póštu na Serbski folklorny ansambl Slepo, Měrowa 65, 02959 Slepo.

Swjedźenske zarjadowanje k jubilejej ma so 8. septembra 2023 na žurli Serbskeho kulturneho centruma Slepo wotměć. Na samsnym městnje budźe dźeń na to tradicionalne zetkanje aktiwnych z něhdyšimi čłonami. Přichodne tydźenje chcedźa dalše informacije wo jubileju wozjewić.

Budyšin (CS/SN). Něhdźe 70 do 80 socialnych dźěłaćerjow skutkuje w Budyskim wokrjesu we wobłuku prewenciskeho młodźinskeho dźěła. Kóždy z nich stara so potajkim wo něhdźe tysac ludźi z ciloweje skupiny. Někotři z nich su tele dny swoje dźěło zjawnosći předstajili. Na te wašnje wabjachu woni za swoju kampanju „Młodźinske a swójbne dźěło skutkuje“. Jedyn ze zaměrow je, w času snadnišich kasow budźić zrozumjenje, zo je socialne dźěło trěbne.

Chróšćanska gmejnska rada je swoju lětušu dźěławosć zahajiła

Chrósćicy (JK/SN). W rekordnej spěšnosći wotběža zjawny dźěl wčerawšeho prěnjeho lětušeho posedźenja Chróšćanskeje gmejnskeje rady. Přiwšěm pak při tym wažne naležnosće zrjadowachu, respektiwnje wot wjesnjanosty Marka Klimana (CDU) wažne nowosće zhonichu. Wón poda wobšěrnu rozprawu k stawej a k dalšemu postupowanju nastupajo prestižny objekt gmejny – nawjes a Cyrkwinsku horu w Chrósćicach. Miłe temperatury spočatk lěta su tomu dopomhali, zo hodźachu so dźěła zaso dale wjesć, prjedy hač je zymski intermeco zaso přetorhny. Tuchwilu su wšitke roły za wotwjedźenje spadkoweje wody do zemje składli a přihotuja so gulije. Kaž wjesnjanosta zdźěli, su tež statoki, kotrež su swoju spadkowu wodu do hłowneho systema zawjazali, zaso k nowym rołam přizamknyli. Při tym zwěsćichu, zo woda ze statokow zwjetša na wjace městnach do hłowneje roły běži hač su wobsedźerjo podali.