Njebjelčicy/Lomé (SN/MiR). Wot dźensnišeho do štwórtka wotměje so druhe zetkanje wo trajnych wuwićowych cilach (SGD) němsko-zapadoafriskich komunalnych partnerstwow, tónkróć w republice Togo. Na fachowej wuměnje w měsće ­Lomé wobdźěla so mjez druhim čłonojo Njebjelčanskeho towarstwa Sowutu, předsydka Marlies Richter, čłon předsydstwa Tomaš Čornak a zastupjerka Biskopičanskeho gymnazija, kotrež wudźeržuje partnerske zwiski ze šulu w Beninje. Mjez ­druhim zaběraja so wobdźělnicy po impulsowym přednošku z temu „Komunalne partnerske dźěło w konteksće z Agendu 2030“. Zdobom předstaja přitomne ­komuny z Němskeje swoje partnerstwa z afriskimi krajemi, tak Nürnberg z Aného a Sokodé kaž tež Friedberg ze Zafi w Togo, Njebjelčicy/Biskopicy z Quidah w Beninje, Ludwigsburg z Kongoussi w Burkina Faso, Nalbach z Assié Koumassi w Cŏte d‘Ivoire, Dortmund z Dabola w Guinea, Schwabach z Gossas w Senegalu a Solingen z Thiés w Senegalu. Zaběra z trajnymi wuwićowymi cilemi korjeni w lěće 2015 wot UNO wobzamknjenych 17 zaměrach SGD w Agendźe 2030.

Wulke Rědorjecy (Großröhrsdorf) (SN/mb). Měšćanosta Stefan Schneider je wotućił, hdyž je wótře prasnyło, a dyrbješe „potom cyrkwi při wumrěću přihladować“. Wón běše tak na čuwy hotowy, zo interview z lokalnej telewiziju dokónčić njemóžeše. Hač do 108 wohnjowych wobornikow z dźesać woborow bě zasadźenych. Po zahubnym wohenju w nocy na zašły pjatk chcedźa wot dźensnišeho eksperća přičiny katastrofy wuslědźić. Někotři su drje na techniski defekt tukali, ale dotal ničo jasne njeje. Nic jenož wosada je šokowana, wšako bu krasna barokna cyrkej hakle njedawno (2012–2018) saněrowana. Tež Julian Nyča je „dospołnje poraženy“. Wón steješe pjatk rano před zničenej cyrkwju, „w kotrejž su dźesać generacijow mojich prjedownikow křćili a k rowu njesli.“ Wón wozjewi w socialnych syćach link na widejo, kotrež pokazuje, kajka běše cyrkej wotnutřka, prajo: „Ničo wot toho hižo njeeksistuje.“ Farar Stefan Schwarzenberg drje hišće njewě, kak dale póńdźe, ale wšě zarjadowanja wosady su zaručene – we wosadnicy. Krajny biskop Tobias Bilz do Wulkich Rědorjecow přichwatawši praješe: „Straty su hoberske.

Porto za list najprjedy njezměnja

Bonn. Němski póst porto za list dočasnje na 85 centow zwyšić njesmě. Wotpowědnu próstwu je Zwjazkowa agentura za syće wotpokazała, kaž tuta dźensa w Bonnje informowaše. Koncern bě spis w meji zapodał, zo směł hižo klětu wudawkow za personal a energiju dla porto zwyšić a to lěto prjedy hač předwidźane. Po pruwowanju regulowanski zarjad zdźěli, zo njeje póst zwyšenje kóštow w dosahacej měrje dopokazał. Přećiwo rozsudej móže koncern DHL skoržić.

Druhi raz w Aziji

Lissabon. Na wšěch 1,5 milionow wěriwych wobdźěli so njedźelu na zakónčacej Božej mši Swětoweho zetkanja młodźiny w portugalskej stolicy Lissabon. Na kóncu mšě wozjewi bamž Franciskus, zo stolica Južneje Koreje Seoul přichodne swětowe zetkanje wuhotuje. Je to po 1995 hakle druhi raz, zo budźe swjatk w Aziji.

Křešćan Krawc z jubilarom

Slepo (JoS/SN). UNESCO geopark Mužakowski zahork je předwčerawšim na tradicionalne lětnje pućowanje dźěći přeprosył. Zetkanišćo bě při Slepjanskim Serbskim kulturnym centrumje, cil jěžikowa wučbna šćežka. Wona je projekt Slepjanskeje zakładneje šule w zhromadnym dźěle ze Sakskej přirodnej šulu, spěchowany přez załožbu „Doma w Slepom, Rownom, Mułkecach“.

Prašenja za hódančko su holcy a hólcy spisali, kotřiž chodźachu w šulskim lěće 2011/2012 do 4. lětnika. Na kóždej z cyłkownje jědnaće stacijow mějachu wobdźělnicy předwčerawšim słowo wuhódać, w kotrymž chowaše so pismik za cyłkowne wuhódanje. To bě němsce runje tak kaž serbsce móžno. Ewa Brunner, w geoparku za wobswětowe kubłanje zamołwita, a přewodnica po geoparku ­Verina Dullin wjeseleštej so nad njewočakowanym wulkim zajimom. Wšako je šćežka do přirody raz cyle hinaše dožiwjenje. 20 dźěći kaž tež runje telko staršich, dźědow a wowki slědowaše na tři hodźiny trajacym pućowanju wuwjedźenjam fachowčow. Na kóncu běchu wšitke dźěći prawe wuhódanje wuslědźili.