Za Boži narodk wosrjedź Pančic-Kukowa je kružk swójbow wikarije ...
Krótkopowěsće (03.01.23)
Financna lobby pře sylna
Berlin. Banki, zawěsćernje a dalši akterojo financneje branše spytaja ze stami lobbyistow zakonje w zwjazkowym sejmje wobwliwować. Po posudku wobydlerskeho hibanja „Finanzwende“ njeje žana branša mjez 100 lobbyakterami z najsylnišimi financami tak mócnje zastupjena kaž financna branša z jědnaćomi. To z lobbyjoweho registra parlamenta wuchadźa, do kotrehož ma zjawnosć dohlad.
Podhlad politiskeje motiwacije
Budyšin. W silwesterskej nocy bu wukładne wokno běrowa zapósłanče zwjazkoweho sejma Caren Lay a wokrjesneje jednaćelnje Lěwicy na Budyskej Šulerskej ćežko wobškodźene. Lay kaž tež tudyša Lěwica politisku motiwaciju při tym njewuzamknjetej. Runje tak móže so wo njekedźbliwe wobškodźenje wěcy jednać njepřiměrjeneho wobchadźenja z praskotakami dla, wobě zdźělitej.
Róčnicu dźělenja spominali
Planuja znowa barowy festiwal
Tež najlěpši škotowar trjeba raz zbožo
18, 20, preč – takle rěkaše minjene dny w Nowej Wjesce w tamnišim towarstwowym domje. Po rjanej tradiciji wuhotuja Nowowješćenjo stajnje mjez hodami a Nowym lětom škotowy turněr. Dohromady přichwata 15 škotowarjow zbliska a zdaloka, zo bychu ze swojich rjadow najlěpšeho zwěsćili. Kaž stajnje na tajkim turněrje so najprjedy blida wulosowachu. Po prěnim kole sydaše ćopła kołbaska a něhdźe w 22 hodź. běchu tež za poslednim blidom nahrate dypki zličene.
Hižo w prěnim kole docpěchu šesćo wjace hač tysac dypkow. Pozdatnje bě Danko Handrik ze šwarnymi 1 585 dypkami faworit. W běhu druheho koła napjatosć z kóždej hru přiběraše, dokelž wobdźělnicy přeco zaso wulke hry dobychu. Ale tež najlěpši škotowar trjeba prosće raz zbožo a wotpowědne karty. Te nazhonity hrajer Alfons Handrik po wšěm zdaću njeměješe. „Tajke hubjene karty w Nowej Wjesce hišće ženje dóstał njejsym“, wón rjekny.
Do noweho lěta pućowali
Dobry wothłós na wosebity poskitk Bóščanskeje gmejny
Bóšicy (MiR/SN). W serbskich kónčinach Hornjeje Łužicy dotal drje jónkrótne je nowolětne pućowanje Bóščanskeje gmejny. W Bóšicach samych čakachu wobydlerjo wčera dopołdnja na přichadźacych z Nowych Bóšic a Wětrowa. Po dobrych přećach za lěto 2023 nóžkowachu wšitcy zhromadnje na Horu a dale do Łusča. Stajnje jenož jenički wobydler po cyłej wsy wědźeše, kotry cil pućowanje ma. „Hewak“, tak wjesnjanosta Stanij Ryćer, „snano ludźo z awtom na zetkanišćo přijědu. To pak njeje wotpohlad. Ale, zo so wobydlerjo zetkaja, bjesaduja, zhromadnje jědźa a sej na nowe lěto připija.“
Policija (02.01.23)
Kólnja so paliła
Mučow. K hašenju wołachu wobornikow silwester wječor do Mučowa. Tam bě so najskerje praskotaka dla žiwy płót zapalił. Sylneho wětřika dla wupřestrěchu so płomjenja na kólnju. W njej běchu moped, traktor k syčenju trawnika, koleso, awtowe wobruče a dalši grat. Po informacijach policije nasta 15 000 eurow škody. Zranił so na zbožo nichtó njeje. Wobornicy zadźěłachu, zo płomjenja na dalše twarjenja přeskočichu.
Kobjeler stare rjemjesło zachowuje
Minakał (CS/SN). Je wjele starych rjemjeslniskich powołanjow, kotrež hroža wotemrěć. Jedne z nich je kobjeler. Thomas Scheffel z Minakała so za to angažuje, zo by so tele powołanje zachowało. A to čini wón hižo jara dołho. Njedawnu třeću adwentnu njedźelu je swój 30lětny zawodowy jubilej swjećił. Wosebje wjeselił je so nad tym, zo je jemu Radworska wjesnjanostka Madeleine Rentsch, kotraž w Minakale bydli, tón dźeń jako prěnja gratulowała. Hromadźe z kupcami a přećelemi Thomas Scheffel při šalce horceho wina na zašłych 30 lět zhladowaše.
Po tym zo bě Minakałčan 1991 mištersku šulu wotzamknył, zwaži so lěto pozdźišo do samostatnosće. Zdźěla dyrbješe jara ćežke časy přetrać. Zmištrował to je, dokelž móžeše so stajnje na podpěru přećelow spušćeć. Tónle přećelski kruh hač do dźensnišeho wobsteji. Ideju, kobjelerstwo nawuknyć, je Thomas Scheffel tohodla zrodźił, dokelž jeho nan jako hajnik wot 1960tych lět witki za wšelakich kobjelerjow plahowaše. Syn to hač do dźensnišeho čini, ale za swójsku potrjebu. Přiwšěm wón w nalěću witkowe sadźenki předawa. Te rozpósćele wón hač do Šotiskeje.
Krótkopowěsće (02.01.23)
Sakska: CDU dale před AfD
Drježdźany. Bychu-li nětko wólby krajhneho sejma w Sakskej byli, by CDU z 32 procentami najsylniša strona wostała. Na druhim městnje je AfD (28 procentow). Z wulkim wotstawkom sćěhuja Zeleni (12), SPD (8) a Lěwica (7). Tute wuslědki aktualneho woprašowanja su Sakske Nowiny wozjewili. Demoskopojo instituta „Civey“ su woprašowanje w času 18.12.2022 do 01.01.2023 přewjedli.
Kulow: Peticija po prědowanju
Kulow. Prědowanje patera Joachima w Kulowskej cyrkwi w Božej nocy je wulku diskusiju zbudźiło. Tak wěnowaše so wón křesćanskemu wobrazej swójby a druhe konstelacije hač muž/žona/dźěćo jako njepřirodne kritizowaše. Po tym bu peticija na stronje change.org zahajena, kotruž je 534 ludźi podpisało. Iniciatorkomaj dźe wo to, zjawnosći pokazać, zo ludźo wuprajenjam znapřećiwjeja.
Rekord we Wojerecach
Policija (30.12.22)
Zakazane praskotaki namakali
Załom. W zwisku z kónclětnym praskotanjom a z nim zwisowacymi strachami při wužiwanju njedowoleneje pyrotechniki je policija předwčerawšim kontrole w namjeznej kónčinje z Čěskej přewjedła. Tak zastojnicy na štyrjoch městnach w Załomju a na dalšim w Šěrachowje pola sydom wosobow njedowolenu pyrotechniku, tak mjenowane pólske praskotaki kategorije F3 a F4, namakachu. Žony a mužojo w starobje 18 do 27 lět změja so přeńdźenja přećiwo zakonjej wo rozbuchadłach dla zamołwić.
Lisćiki za hudźbny swjedźeń
Smochćicy. Za Smochčanski hudźbny swjedźeń 2023 móža sej zajimcy hižo nětko zastupne lisćiki w předpředani wobstarać. Znaty koncert pod hołym njebjom zaklinči 30. junija a 1. julija a je jedyn z hudźbnych wjerškow we Łužicy. Po tym zo wěnowaše so hudźbny swjedźeń 2022 našim čěskim susodam, powjedźe wón 2023 do susodneho pólskeho kraja. Zastupne lisćiki poskićuja při kasy Serbskeho ludoweho ansambla a internetnje pod .
Wustajeńca Božich narodkow
Hirschfelde. W putniskej hospodźe w Hirschfeldźe su hišće hač do štwórtka, 2. februara, Bože narodki wustajene. Mjez nimi je tež tajki, kotrehož postawy hodźa so zdźěla pohibować. Snadneje wulkosće domu dla su přizjewjenja trěbne. Połhodźinske wodźenja započinaja so stajnje sobotu w 14.30 hodź. a njedźelu w 14 kaž tež w 15 hodź. Tež wosebite wodźenja za skupiny ze sydom do dwanaće wosobow su móžne a měli so z fararjom Michaelom Dittrichom dojednać, a to z mejlku na dittrich.mi@ t-online.de abo pod tel. čo. 0162 9179949. Zastup je darmotny.
