Porjedźenka
Zo njeby k njeskutkam dóšło
Dźěłowy kruh chce znjewužiwanju dźěći w interneće zadźěwać
Wojerecy (AK/SN). Pod hesłom „Hladać a nic ignorować“ chcedźa poradźowarjo woporow, policija, justica a komuny lěpje wo splažnym njewužiwanju dźěći a młodostnych w interneće informować. Tole su čłonojo dźěłoweho kruha „splažna namóc“ Budyskeho a Wojerowskeho wokrjesa wobkrućili. „Wot januara 2024 přetworimy wurjadnu přepytowansku skupinu „dźěćaca pornografija“ na nowy komisariat 13. Tam zaběra so potom 13 sobudźěłaćerjow zaměrnje jenož z tutej temu“, rozłoži kriminalny wyši komisar Steffen Mehnert, nawoda přepytowanskeje skupiny za dźěćacu pornografiju Zhorjelskeje policajskeje direkcije.
Krótkopowěsće (07.11.23)
Chcedźa kampanju dale wjesć
Budyšin. Přirada za imageowu kampanju „Sorbisch? Na klar.“ je so wčera w Budyšinje zešła, zo by so wo jeje skutkownosći kaž tež jeje přichodźe rozmołwjała. Přitomna běše mjez druhim sakska statna ministerka za kulturu a turizm Barbara Klepsch (CDU). Wona zdźěli, zo podpěruje sakske knježerstwo kampanju tež klětu financielnje dale. Nimo toho ma so přichodnje ewaluacija nastupajo skutkownosć kampanje přewjesć.
Wo wobsahu rozmyslowali
Choćebuz. W internaće Delnjoserbskeho gymnazija Choćebuz wobdźělichu so partnerojo UNESCO 5 wčera na třoch dźěłarničkach wo wutwarje kolesowarskeje šćežki „Serbske impresije“. Přewažnje koncentrowachu so wobdźělnicy na wobsah šćežki. Klětu chcedźa so akterojo wo strukturne srědki požadać, za čož je koncept – čerwjena nitka – trěbny.
Štwórty, rozšěrjeny nakład
Přičina smjerće čisło dwaj
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (31).
Budyska Romantica
W Serbskim domje su serbske rjemjesło a serbske drasty předstajili
Budyšin (CS/SN). Serbski dom běše pyšnje wobswětleny, zašłu sobotu, na dnju Budyskeje nakupowanskeje nocy z mjenom „Romantica“. Barbojtu pychu wšak wuhlada wopytowar tež znutřka domu, w rumnosćach Serbskeje kulturneje informacije (SKI). Tu móžeše wón serbskim rjemjeslnikam při dźěle přihladować. Sobudźěłaćer Załožby za serbski lud Syman Woko předstaji swoje filigranowe rjemjesło, kotrež je wot swojeho dźěda zdźědźił: wón pleće z nitkow połnych móličkich škleńčanych parličkow družće sački. Tute parlički běše dźěd Symana Woka hižo za swój čas w čěskim Jablonec nad Nisou wobstarał a to w tajkim mnóstwje, zo hišće na někotre lěta dosaha. Ralbičan Jurij Wjesela, wuwučeny zamkar a nětko na wuměnku, prezentowaše swoje wuměłske wudźěłki ze železa a kopora: wšelake debjenki na křižerskich gratach abo křiže při pućach. Wobšěrnu přehladku jeho tworjenja předstaji SKI tuchwilu tež we wosebitej wustajeńcy w tamnišich rumnosćach. Zajim publikuma na wudźěłkach Jurja Wjesele běše wulki.
Policija (06.11.23)
Ćežko zranjenaj při zražce
Mučow. Něhdźe 200 metrow před wjesnej taflu Mučowa na B96 do směra na Wojerec je 33lětny šofer wosoboweho awta w křiwicy na napřećiwny bok jězdneje zjěł. Tam prasny wón do małotransportera. Šofer awta a w nim sedźace štyrilětne dźěćo buštaj ćežko zranjenaj, 68lětny šofer transportera snadnje.
Zaso na předčitanski dźeń
Budyšin. Po cyłej Němskej přewjedźe so pjatk, 17. nowembra, předčitanski dźeń. Rěčny centrum WITAJ organizuje čitanja w serbskich kubłanišćach. Štóž chce rady serbskim abo serbsce wuknjacym dźěćom předčitać, njech so hišće dźensa w Rěčnym centrumje WITAJ přizjewi. Sćelće e-mejlku na abo zazwońće pod 03591 550 414. Wjace informacijow pod: .
Jubilej w Chrósćicach
Chrósćicy. Składnostnje jubileja prěnjeho naspomnjenja Chrósćic před 800. lětami chcedźa w juniju 2025 swjedźenski ćah wotměć. W přihotach na to přeproša gmejna zastupjerjow wšitkich wsow a towarstwow na prěnje zetkanje. Wone budźe štwórtk, 9. nowembra, w 19 hodź. na Chróšćanskej farje na předstajenje wobrazow za swjedźenski ćah. Prěni naćisk je hižo na gmejnskej a wosadnej homepage wozjewjeny.
Dwurěčne kemše
Trojozynk w Hórkach wustupił
60 wopytowarjow, mjez kotrymiž běchu dźěći ze staršimi kaž tež seniorojo, witaše předsydka towarstwa „Při skale“ a regionalna rěčnica za teritorij Kamjenskeje župy „Michał Hórnik“ Katharina Jurkowa na nazymski koncert do Hórkow.
Nimo ilegalneje migracije policisća tež druhe přeńdźenja ...
Zhorjelc. „Dobry dźeń, powšitkowna wobchadna kontrola, jězbnu dowolnosć a přizwolenje za jězdźidło prošu.“ Ničo njewšědne to hladajo na namołwu, wo kotruž policisća šoferow wšědnje proša. Wot 16. oktobra pak sej zastojnicy předewšěm na mjezy do Pólskeje a Čěskeje žadaja, zo maja wodźerjo transportnych jězdźidłow tohorunja nakładowanske płoniny pokazać. W jednotliwych padach kontroluje policija kófrowy rum wozydłow.
W nadawku wječornika podach so k němsko-pólskemu namjeznemu přechodej w Zhorjelcu a wobkedźbowach dźěło policije. Nimo toho prašach so šoferow, kotřiž z Pólskeje do Němskeje jědźechu, za jich zaćišćemi noweje situacije dla.
