Dobra powěsć za wobydlerjow
Strowotniski centrum w Hamorje móža planować započeć
Hamor (AK/SN). Regionalny přewodźenski wuběrk je spočatk junija projekt „Strowotniski centrum Hamor“ pozitiwnje pohódnoćił. Tole rjekny Hamorski wjesnjanosta Hendryk Balko (Hamorske wolerske zjednoćenstwo) na zašłym posedźenju tamnišeje gmejnskeje rady. „To bě zwjeselaca powěsć. Nětko móžemy započeć“, wón rjekny. Tuž móžachu gmejnscy radźićeljo wobzamknyć, zo ma Drježdźanske předewzaće za měšćanske wuwiće STEG proces přihotow přewodźeć a zo dóstanje za to 22 000 eurow.
Hamorski strowotniski centrum je najwažniši projekt gmejny we wobłuku strukturneje změny. Dokelž ma předewzaće dohromady něhdźe 9,75 milionow eurow płaćić, dyrbja wšitke planowanske dźěła po wšej Europje wupisać. Za to chcedźa wubědźowanje přewjesć.
Před kapałku maja nětko zwóńcu
Nuknica (SN/MWj). Kapałka w Nuknicy, kotraž je ze stareje wohnjowoborneje gratownje nastała, je wot wčerawšeho takrjec wo wažny dźěl wudospołnjena. W přitomnosći mnohich wjesnjanow a wosadnych je Chróšćanski farar Měrćin Deleńk před kapałku nowu zwóńcu poswjećił. Nyšpor na patronatnym swjedźenju swjateho Antoniusa, kotremuž je kapałka poswjećena, wobrubichu Chróšćanscy dujerjo a šola Nukničanskich dźěći.
Zwóńcu natwarichu z čestnohamtskimi pomocnikami ze wsy a z cyłeje wosady. Wona wobsteji ze štyrjoch wysokich hrjadow z larika, kotrež dóstachu Nukničenjo darjene. Železny horni dźěl, do kotrehož je zwón powěsnjeny, je kowar Pěčka twarił. Drjewjane hrjady a železny horni dźěl Nukničenjo a dalši mužojo hromadźe zestajichu a wutoru do swjedźenja Božeho ćěła před kapałku nastajichu. Zwóńca je nimale pjeć metrow wysoka a 50 centimetrow šěroka. Zwón pochadźa z Mnichowa. Jón su minjeny pjatk instalowali. Nětko móže wón k zhromadnym modlenjam a k druhim składnosćam zwonić.
W katolskich Serbach změje młody muž bórze swoju premjeru jako ...
Z protesta lěkarnje začinjene byli
Krótkopowěsće (14.06.23)
Kulturny pas nětko płaćiwy
Berlin. Kulturny pas, kotryž zmóžni młodostnym, kotřiž woswjeća lětsa swoje wosomnate narodniny, dobro we wysokosći dwěsćě eurow za kulturne poskitki wužiwać, je wot dźensa płaćiwy. Přez wosebitu app móža młodostni wone pjenjezy na přikład za tikety kulturnych eventow, ale tež za knihi, tačele a instrumenty wužiwać. Za to pak je trjeba, zo so młodostni za pas registruja.
Ze Šwedskeje do Delnjeje Łužicy
Bad Liebenwerda. Braniborske wobswětowe ministerstwo je projekt znowa zasydlenych hłucharjow w Delnjej Łužicy z ELER-projektom měsaca junij wuznamjeniło. Za mjenom ELER chowa so europski ratarski fonds za wuwiće wjesnych kónčin. Z pjenjezami fondsa ze Šwedskeje pochadźacych hłucharjow w Delnjej Łužicy zasydla.
Romojo přećiwo Ukrainjanam
Ze šmóratkom na bibliju słuchać
Na staru chorownju lědma hišće něšto dopomina
Štóž bě před třomi lětami posledni raz při Kamjenskim wustawje miłosćiwosće a jón nětko znowa wopyta, starodawne twarjenje lědma zaso spóznaje. A to ma dobru přičinu.
Kamjenc (UM/SN). Tak mjenowany wustaw miłosćiwosće, kotremuž tež Bönischowy wustaw rěkaja, je w Kamjencu zamołwitym wjele lět starosće činił. Wot časa, zo je chorownja maltezow w lěće 2020 do noweho twarjenja na kromje města přećahnyła, dom prózdny steji. Lěta 2019 móžeše wyši měšćanosta Roland Dantz (Swobodni wolerjo) zwjeseleny zdźělić, zo je so z Budyskej twarskej firmu Hentschke inwestor namakał.
Zjawny charakter šmórnyli
Gmejna dalši krok za přesydlenje Miłoraza wobzamknyła
Trjebin (AK/SN). Přesydlenje Miłoraza ma hač do kónca lěta 2024 wotzamknjene być. Jako dalši krok na tutym puću je Trjebinska gmejna nětko zjawne wěnowanje gmejnskeho wobsydstwa šmórnyła. Na swojim zašłym posedźenju gmejnscy radźićeljo jednohłósnje wobzamknychu, zo wjesny towarstwowy dom, kupjel a sportnišćo wot 1. julija hižo zjawne njejsu. Samsny krok za wohnjowobornu gratownju a pohrjebnišćo ma pozdźišo slědować.
„Z tym zo wěnowanje šmórnjemy, mjenowane zarjadnišća hižo zjawne twarjenja njejsu. Wone njemóža so tuž hižo zjawnje wužiwać“, gmejnski rjadowar Robert Sprejz rozłoži. Pozadk je planowane wotbagrowanje Miłoraza. Za to stej gmejna a LEAG w decembru 2022 kupne zrěčenje podpisałoj. Wone předwidźi, zo energijowy koncern gmejnje dospołne komunalne wobsydstwo wotkupi. Zapřijate su wšitke komunalne twarjenja kaž tež wotpowědne ležownosće a nimo toho tež zjawne puće a naměsta w Miłorazu.
Jutře na kofej do Serbskeho muzeja
Wo podrywanju demokratije
Kulow. „Kedźbu pasle! Kak prawicarscy ekstremisća a reichsbürgerojo demokratiju podrywaja“ rěka hesło zarjadowanja, kotrež wotměje so srjedu, 14. junija, wot 19 hodź. w Kulowskim Jakubetzowym wustawje. Referentaj budźetaj dr. Harald Lamprecht, społnomócnjeny za prašenja swětonahlada Ewangelsko-lutherskeje krajneje cyrkwje Sakskeje, a Christian Schäfer, ze Syće za demokratiju a wšelakorosć w Budyskim wokrjesu.
Přednošuje wo Klukšu
Klukš. Wo Klukšu jako mjezynarodnym nabožnym centrumje we 18. lětstotku přednošuje historikarka w Serbskim instituće dr. Lubina Malinkowa srjedu, 14. junija, w 19.30 hodź. w Klukšanskej cyrkwi. W srjedźišću přednoška steja Klukšanski seminar a z nim zwjazane wosobiny a podawki. Wobliwowane wot Franckowych wustawow w Halle a Bratrowskeje jednoty w Ochranowje nasta w Klukšu seminar, na kotrymž so němscy, serbscy a čěscy duchowni a wučerjo wukubłachu. Chowancy seminara přełožichu nimo toho knihi do serbšćiny a přihotowachu šulerjow na wopyt wyšeje šule. Přednošk wotměje so w němskej rěči.
Při pomniku rjedźa
