Sowrjecy (UM/SN). Nowy móst nad Wuježčanskej wodu w Kubšiskim wjesnym dźělu Sowrjecy (Soritz) ma jutře hotowy być. Z tym podlěšichu so twarske dźěła porno spočatnym planam wo něhdźe dwaj měsacaj. „Po tym zo bě stary móst wottorhany, dyrbješe so za nowy dohromady 21 stołpow do zemje točić, a to hač na skału. To je dlěje trało hač wočakowane, čehoždla je cyły projekt dlěje trał“, zdźěli Budyski krajnoradny zarjad. „Nimo toho su twarskej firmje nalětnje zliwki a z tym zwjazany wyši staw Wuježčanskeje wody dźěło poćežili.“ Wot twarskich dźěłow njeprofituja jenož šoferojo, ale tež wohnjowi wobornicy. Za nich natwarichu schód, zo móhli rěku jednorišo zahaćić a tak z njeje hašensku wodu klumpać. Nowy móst su w februaru 2023 twarić započeli. Projekt płaći dohromady něhdźe 590 000 eurow.

Wojerecy. Składnostnje zahajenja Krabatoweho tydźenja jutře, 29. septembra, před radnicu w starym měsće Wojerec dźěći z Němčanskeje pěstowarnje w 14.30 hodź. serbski program předstaja. W 16.30 hodź. móža wopytowarjo dźěćacu rejwansku skupinu Brětnja dožiwić. Tomu so w 17.30 hodź. Serbska ludowa rejwanska skupina Ćisk přizamknje, kiž tradicionelne młóćenje z cypami pokaza. Tež „připołdnica“ steji na programje – w kamishibai-dźiwadle. Při jewišću je stejnišćo župy „Handrij Zejler“. Rěčnaj motiwatoraj Marija Šołćić a Lucian Kaulfürst budźetaj z keramiku resp. dudami přitomnaj. Oficielne zahajenje přewjedźe wyši měšćanosta Torsten Ruban-Zeh (SPD) w 14 hodź. Krabatowy tydźeń budźe hač do 8. oktobra trać. Dalše informacije: .

Kupjel zawrjena

Kamjenc. W Kamjenskej halowej kupjeli dyrbja w nazymskich prózdninach nuznje trěbne reparatury přewjesć. Tohodla wostanje kupjel wot póndźele, 2. oktobra, hač do njedźele, 15. oktobra za zjawne płuwanje zawrjena. Sawna hodźi so w tym času we wobmjezowanej měrje wužiwać, a to wot póndźele do pjatka stajnje wot 12 do 22 hodź. 3. oktobra wostanje sawna zawrjena.

Plantažu konopje namakali

Hermsdorf. Pódla awtodróhi A 4 pola Hermsdorfa su wobydlerjo póndźelu plantažu konopje namakali a policiju informowali. Zastojnicy zwěsćichu na to 250 tajkich rostlin na kromje pola ze słónčnymi róžemi. Kriminalna policija pad přepytuje.

Gmejna přewozmje techniku a nastroje sportoweho towarstwa

Trjebin (AK/SN). Prawniski dohladowanski zarjad Zhorjelskeho wokrjesa je gmejnski etat za lěto 2023 schwalił – to zhonichu gmejnscy radźićeljo na njedawnym posedźenju gmejnskeje rady w Trjebinje. Tamniša komornica Dana Piehl předstaji mjezyrozprawu financow. „Naša gmejna njeje zadołžena. Wjetše kredity nochcemy brać. Byrnjež přichod jenož ćežko posudźować móhli, zwažu sej prajić: Naša financielna si­tuacija je stabilna, smy we wšěch wob­łukach po planje“, podšmórny wona. ­Hladajo na dochody je gmejna dohromady 2,4 miliony eurow zaplanowała, wot toho je dotal 770 000 eurow dóšło. Nastupajo wudawki kalkuluje komuna lětsa z cyłkownje 2,7 milionami eurow – z toho je dotal 900 000 eurow wu­dała.