Worklecy. Serbska zakładna a wyša šula „Michał Hórnik“ Worklecy přeprošujetej wšitkich šulerjow, wučerjow, staršich a dalšich wobydlerjow na dworowy swjedźeń z mejemjetanjom. Wón wotměje so pjatk, 12. meje, wot 18 hodź. Wo ćělne derjeměće budźe z jědźemi a napojemi postarane. Tradicionalne zarjadowanje wobeju kubłanišćow wobohaća lětsa prěni raz čaporowe wiki, na čož smědźa wopytowarjo wosebje wćipni być.

Nalětni koncert w klóštrje

Pančicy-Kukow. Chór Lipa přeproša hromadźe z Křesćansko-socialnym kubłanskim skutkom na nalětni koncert njedźelu, 14. meje, w 15.30 hodź. do zahrody klóštra Marijineje hwězdy w Pančicach-Kukowje. Hižo wot 15 hodź. poskića tam swačinu z kofejom a tykancom. Publikumej zanjesu spěwarjo wěnc znatych a mjenje znatych pěsnjow, w kotrychž powěda so wo lubosći a rejach na korčmarjec žurli. Dale wustupi Lipjanska ­dźěćina „Lipki“ a dźěćaca band „Šwintuchi“, kotraž chce připosłucharstwu ­porjadnje zapyrić. Organizatorojo so na bohaty wopyt wjesela.

Wjele pjenjez pokradnyli

Kamjenc. Njeznatej wosobje stej předwčerawšim w Kamjencu 82lětnej žonje wulku škodu načinili. Jej chcyštaj pječa drohotne knihi pokazać a zaplećeštaj ju do rozmołwy. W tym času jedyn ze sku­ćićelow w tamnej rumnosći kamory přepyta. Z nich pokradny wón 30 000 eurow pjenjez a debjenki w hódnoće 20 000 ­eurow. Na to so paduchaj spěšnje zminyštaj. Pozdźišo staruška padustwo pytny a informowaše policiju.

Zarjadniski zwjazk dyrbi swoje připowědźenja tež přesadźić

Pančicy-Kukow (SN/MWj). Připowědźenje zarjadniskeho zwjazka Při Klóšterskej wodźe, zo chce so přichodnje w přisłušnych gmejnach sylnišo problemej njedowoleneho parkowanja wěnować, je so na wčerawšim posedźenju zhromadźizny zarjadniskeho zwjazka wo krótku diskusiju postarało.

Nastorčił bě ju radźićel Ralbic-Róžanta René Wjacławk. Wón so prašeše, kak chce zarjadniski zwjazk připowědźenje w gmejnskej nowinje Ralbic-Róžanta přesadźić. W Ralbicach je pječa často wujězd wohnjoweje wobory zaparkowany, tak zo njemóhli so wobornicy w nuzowym padźe zasadźeć. Po słowach před­sydy zarjadniskeho zwjazka Stefana ­Andersa njeby wón žadyn problem měł, sej njedźelu dopołdnja do Ralbic dojěć a sej čisła wotpowědnych awtow napisać. Tež Pětr Brězan z Worklečanskeje gmejny wupraji so za to, zo dyrbjeli po pisomnym připowědźenju tež wotpowědnje jednać.

Wojerecy (KD/SN). Z Łužiskim centerom a Łužiskej halu w nowym měsće, zwěrjencom a Kulturnej fabriku w starym měsće kaž tež z dalšimi poskitkami maja we Wojerecach mnohostronske móžnosće, za kotrež měło so hišće lěpje wabić a kotrež dyrbjeli so lěpje zwjazować. Runočasnje maja towarstwa, angažowani jednotliwcy a předewzaćeljo wjele idejow, kak hodźało so kulturne žiwjenje na ­woběmaj bokomaj Čorneho Halštrowa wobohaćić. Wobstejace poskitki a ideje walčkować je nadawk centrumoweho managementa. Jeho sobudźěłaćerce Anja Hillmann a Carolin Gropler stej předwčerawšim w Kulturnej fabrice swoje dźěło předstajiłoj. Pola njeju móža wšitcy zajimcy z města swoje ideje zapodać a so tak spěchowanja we wobjimje 50 procentow nadźijeć. Wo pjenjezach ze zwjazkoweho programa „Za přichod kmane nutřkowne města a centrumy“ rozsudźi přirada, kotrejž přisłušeja zastupjerjo kulturnych zarjadnišćow, měšćanskeho zarjadnistwa a měšćanskeje rady.