Njezbožo z lochce zranjenymaj

Budyšin. Na njezbožu, kotrež bě so wutoru nawječor njewobkedźbowanja předjězby dla stało, stej so wobdźělenaj lochce zraniłoj. 65lětna šoferka wosoboweho awta marki Seat chcyše z Bórkskeje dróhi dolěwa na zwjazkowu dróhu 156 do směra na Delnju Hórku wotbočić. Při tym njeje wona předjězbu 59lětneho šofera wosoboweho awta marki Opel dosć derje wobkedźbowała. Wobaj šoferaj dyrbještaj so lochkeho zranjenja dla do chorownje na lěkowanje podać. Wěcna škoda wučinja něhdźe 18 000 eurow.

Hrodźišćo. Na swjedźenskej žurli Hrodźišćanskeho hroda wotmě so wčera wječor knižna premjera. Mechthild a Wolfgang Opel přestajištaj něhdźe 40 zajimcam swoju runje wušłu biografiju serbskeho misionara Jana Awgusta Měrćinka „Weil ich ein Inuk bin“. Měrćink bě so 1817 ­do chudych wobstejnosćow w Hrodźišću narodźił. W nadawku Ochranowskeje bratrowskeje wosady skutkowaše na Labradorje a w Južnej Africe. Sławny bu jako wobdźělnik jendźelskeje ekspedicije do lodoweho morja. Při swojim skutkowanju je so wšudźe jako Serb wuznawał. Pochowany je w Małym Wjelkowje, hdźež je Serbske ewangelske towarstwo jeho row w lěće 2005 wobnowić dało. Awtoraj wobohaćištaj knižnu premjeru z mnoho historiskimi a načasnymi wobrazami, kiž znazornichu žiwjenski puć Měrćinka. Wudaće wobšěrneje knihi bě mjez druhim Załožba za serbski lud spěchowała. Zajimcy maja dźensa (štwórtk 29.) wječor składnosć, předstajenje knihi w sotrowni w Małym Wjelkowje dožiwić. Trudla Malinkowa

„Krabat a potajna kniha“ rěka musical, kotryž so wot 30. septembra do 10. oktobra na lětušim Krabatowym tydźenju w Krabatowym regionje pokaza. ­Najwažniši wotmysł inscenacije je, zo w njej wjele dźěći na jewišću sobuskutkuje­.

Wojerecy (KD/SN). Hudźbna a wuměłstwowa šula Bischof z Wojerec nadźěła ze swojej činohrajnej skupinu, chórom zakładneje šule „Při parku“ a baletnymi skupinami Łužiskeje hale kóžde lěto znowa musical, kotryž na jewišću Lužiskeje hale předstaja. Lětsa móža zajimcy inscenaciju na sławnym jewišću jutře, 30. septembra, dožiwić. Wosebje šulerjo budu sej hudźbnu stawiznu „Krabat a potajna kniha“ wobhladać. 1. oktobra poskića swójbne předstajenje. Wobě předstajeni zahajitej so dopołdnja w jědnaćich. Nawoda hudźbneje šule André Bischof so na inscenaciju wjeseli. Wšako su lisćiki požadane.

Bioratar Ignac Wjesela neple wuchwalujo do Chrósćic přeprošuje

Chrósćicy (SN/MiR). Wšojedne, kajke wjedro mamy –, hdyž su płody zrałe, čaka na ratarjow dźěło. Tuchwilu zběraja na wšěch polach běrny, neple abo kulki – cyle po tym, w kotrej kónčinje bur swoje ratarstwo wobhospodari, rěka tak za čłowjeka přewšo wužitna dula ze swójby wrónidłowych rostlinow. Ignac Wjesela ratari w Chrósćicach. Tež wón a jeho sobudźěłaćerjo kaž tež pomocnicy tuchwilu neple zběraja. „Aktualnje stej dwě družinje zrałej“, tak bioratar powěda, „dalše hišće trjebaja. Spadki, kotrež smy zašły čas měli, zrawjenje neplow trochu podlěša.“ W cyłku maja na Wjeselic polach dźesać wšelkich družinow nepli. „Lěpšina, hdyž telko družinow plahuju je, zo je kóžde lěto znajmjeńša jedna družina wosebje derje z klimatiskimi wobstejnosćemi wobchadźała, dalša nic. Tak su žně lěto wob lěto wurunane. Wulki wliw na to, kak dulki bubnja, ma włóžnota. Jedna družina lěpje rosće, hdyž je trochu suche, druha trjeba wjace dešćoweje wody.