Štom pokradnyć spytali

Trjebin. Na njewšědnu rubiznu měrjachu so njeznaći minjeny kónc tydźenja w Trjebinje. Tam podachu so na priwatnu ležownosć a započachu aziski klon wuryć. Dokónčili pak woni swój njeskutk njejsu. Snano je jich něchtó mylił, snano pak bě dźěło přećežke, přetož aziski klon ma chětro sylne korjenje. Přiwšěm je policija na městnje slědy zawěsćiła a nětko za skućićelemi pyta.

Z wobchoda pjenjezy spakosćili

Budyšin. Njeznaći su so w nocy na njedźelu do wobchoda na Budyskej Bohatej hasy zadobyli. Kaž policija rozprawja, woni we wobchodźe njemdrje zachadźachu, mobiliar skóncowachu a pjenjezy pokradnychu. Wo kotru sumu so jedna, bohužel znate njeje.

Rakecy. „Moja serbska domizna“ je hesło projektoweho tydźenja 5. lětnika Rakečanskeje Pawołskeje šule, z kotrymž so šulerki a šulerjo tutón tydźeń zaběraja. Mjez druhim wopytaja studijo Serbskeho rozhłosa, rejuja ze SLA, wobhladaja sej staru cyrkwinsku biblioteku a nawjerća krótke filmy wo serbskich temach. Sobotu wot 14 do 17 hodź. wuslědki w šuli prezentuja. Předwidźane su dale kwis, hudźba a reje. K tomu su zajimcy witani.

DZA so předstaji

Wojerecy. Z Němskim centrumom za astrofyziku (DZA) ma we Łužicy wulki slědźenski centrum z mjezynarodnym wuprudźenjom nastać, kiž stwori perspektiwy za cyły region. Što pak DZA dokładnje čini a što wón za region wunjese? Na tutej prašeni a dalše wotmołwjeja dr. Christian Stegmann, dr. Maria Krause a Katharina Henjes-Kunst jutře, srjedu, wot 19 hodź. we Wojerowskej kulturnej fabrice na Piwarskej hasce 1. Wšitcy ­zajimcy su na informaciske zarjadowanje přeprošeni.

W radiju wo Zejlerju

Zapadnje sprjewineho města ma nowotwarska štwórć nastać

Budyšin (SN/MWj). Dźeń a wjace ludźi so w Budyšinje naprašuje, hdźe móhli sej ležownosć kupić a na njej jednoswójbny dom twarić. Kaž měšćanski zarjad wčera zdźěli, chce město tuž na swojej zapadnej kromje ležownosće předać a tak nowu bydlensku štwórć wutworić. W Ratarjecach je něhdźe 135 000 kwadratnych metrow wulka płonina w planje wužiwanja ležownosćow hižo za bydlenske zaměry wupisana. Tuž móža tam trěbny twarski plan nastajić.

Po informacijach města móhło ně­hdźe 150 jednoswójbnych domow z 500 do 800 kwadratnych metrow wulkimi ležownosćemi nastać. Za to pytaja nětko inwestora, kiž bydlensku štwórć jako cyłk wuwije. „Wón ma za płoninu swójski koncept zdźěłać. Inowatiwne měšćanskotwarske ideje pod wobkedźbowanjom aktualnych towaršnostnych a wobswětopolitiskich tendencow su wuraznje witane“, rěka w nowinskej zdźělence ­města. Bydlensku štwórć planować a ju k trěbnym medijam přizamknyć móže so we wjacorych wotrězkach stać. Při tym pak maja cyłkowne planowanje ­wulkeje płoniny wobkedźbować.

Bóšicy (MiR/SN). Bóščanska wohnjowa wobora wobsteji lětsa 8. oktobra dokładnje 146 lět, štož njeje jubilejna ličba. Přiwšěm bě to zańdźenu sobotu wobydlerjam gmejny hódna přičina swjećić. Wšako dósta wohnjowa wobora nowe wohnjowoborne awto. Jězdźiło bu po trochu njezwučenych měrach wrotow gratownje natwarjene. Awto je trochu dlěše a niše hač to jězdźidła su, kotrež druhe gmejny wobstaraja. „Před třomi lětami, w nowembru 2019“, tak wjesnjanosta Stanij Ryćer (rjemjesło Bóšicy), „smy jězdźidło skazali. A tež hdyž je nětko mamy, njeje wone hišće doskónčnje wuhotowane. To pak so přichodne tydźenje nachwata.“ Jězdźidło, kotrehož je Budyski wokrjes pjenježnje podpěrał, płaći něhdźe 370 000 eurow.